VIDEO/ નીતીશ કુમારના ઉત્તરાધિકારી કોણ? પટનામાં લાગ્યા પોસ્ટર- ‘બિહારના ભવિષ્યના CM નિશાંત કુમાર’

બિહારના રાજકારણમાં છેલ્લા કેટલાક સમયથી ચાલી રહેલી નેતૃત્વ પરિવર્તનની અટકળો હવે તેજ બની છે. મુખ્યમંત્રી નીતીશ કુમારે રાજ્યસભાના સભ્ય તરીકે શપથ લીધા બાદ પટનામાં જેડીયુ (JD-U) કાર્યાલયની બહાર લાગેલા પોસ્ટરોએ સમગ્ર રાજ્યમાં ભારે ચર્ચા જગાવી છે. આ પોસ્ટરોમાં નીતીશ કુમારના પુત્ર નિશાંત કુમારને બિહારના 'ભવિષ્યના મુખ્યમંત્રી' તરીકે રજૂ કરવામાં આવ્યા છે.

“નીતીશજીનું અધૂરું મિશન, નિશાંત કુમાર જ પૂરું કરશે”

પાર્ટીના કાર્યકરો દ્વારા લગાવવામાં આવેલા આ પોસ્ટરોમાં સૂત્ર લખવામાં આવ્યું છે કે, "નીતીશજીનું અધૂરું મિશન, નિશાંત કુમાર જ પૂરું કરશે." જેડીયુના કાર્યકરો હવે ખુલ્લેઆમ માંગ કરી રહ્યા છે કે નીતીશ કુમાર પોતાનો રાજકીય વારસો તેમના પુત્ર નિશાંત કુમારને સોંપે. આ ઘટનાક્રમે બિહારમાં પરિવારવાદના મુદ્દે ફરી એકવાર રાજકીય ગરમાવો લાવી દીધો છે.

નીતીશ કુમારનું રાષ્ટ્રીય રાજનીતિ પર ધ્યાન

ઉલ્લેખનીય છે કે, નીતીશ કુમાર હવે રાજ્યના રાજકારણમાંથી બહાર નીકળીને રાષ્ટ્રીય રાજનીતિ પર ધ્યાન કેન્દ્રિત કરી રહ્યા હોય તેવું જણાય છે. તેમના રાજ્યસભામાં ગયા બાદ બિહારની કમાન કોણ સંભાળશે તે મોટો પ્રશ્ન હતો, પરંતુ હવે નિશાંત કુમારના નામે આ પ્રશ્નનો જવાબ આપવાનો પ્રયાસ કાર્યકરો દ્વારા કરવામાં આવી રહ્યો છે.

નેતૃત્વ પરિવર્તનની અટકળો તેજ

બિહારમાં જેડીયુના આંતરિક વર્તુળોમાં પણ હવે ઉત્તરાધિકારી તરીકે નિશાંત કુમારના નામની જોરશોરથી ચર્ચાઓ શરૂ થઈ છે. જો નીતીશ કુમાર ખરેખર નિશાંત કુમારને આગળ કરે છે, તો બિહારના રાજકારણમાં આ એક ખૂબ જ મોટો વળાંક સાબિત થશે. વિપક્ષી દળો પણ આ પોસ્ટર વોર પર ચાંપતી નજર રાખી રહ્યા છે અને આગામી દિવસોમાં આ મુદ્દે આકરા પ્રહારો થવાની શક્યતા છે.

હાલમાં પટનાનું રાજકીય તાપમાન વધી રહ્યું છે અને સૌની નજર નીતીશ કુમારના આગામી સત્તાવાર નિવેદન પર ટકેલી છે.