VIDEO: તરણેતર મેળામાં દુર્ઘટના: મોતના કૂવાનો ભાગ તૂટી પડતાં 10થી વધુ બાળકોને ઈજા, રાઈડ મંજૂરી સામે પ્રશ્નાર્થ

સુરેન્દ્રનગરના ભાતીગળ તરણેતર મેળામાં અચાનક દુર્ઘટના સર્જાતા ભારે અફરાતફરી મચી ગઈ હતી. મેળામાં લોકોની ભારે ભીડ વચ્ચે મોતના કૂવાનો એક ભાગ અચાનક તૂટી પડતાં આસપાસ ઉભેલા લોકો તેની અડફેટે આવ્યા હતા. આ દુર્ઘટનામાં 10થી વધુ બાળકો સહિત મેળામાં આવેલા કેટલાક યાત્રિકોને ઈજા પહોંચી હોવાનું સામે આવ્યું છે. ઘટનાને પગલે મેળામાં ભયનો માહોલ સર્જાયો હતો.

ઈજાગ્રસ્તોમાં બાળકોનો પણ સમાવેશ

મળતી માહિતી મુજબ, તરણેતર મેળામાં મોતના કૂવાની રાઈડ ચાલી રહી હતી ત્યારે અચાનક તેનો એક ભાગ તૂટી પડ્યો હતો. રાઈડનો ભાગ તૂટીને નીચે પડતાં તેની આસપાસ ઉભેલા લોકોમાં નાસભાગ મચી ગઈ હતી. ઘટનાસ્થળે હાજર લોકોમાં પણ ભારે ગભરાટ ફેલાયો હતો. ઈજાગ્રસ્તોમાં બાળકોનો પણ સમાવેશ થતો હોવાનું જાણવા મળી રહ્યું છે.

ઘટનાની જાણ થતાં પોલીસ અને સ્થાનિક તંત્રના અધિકારીઓ પણ ઘટનાસ્થળે દોડી આવ્યા હતા. મેળામાં રાઈડ તૂટી પડવાની ઘટનાને પગલે વહીવટી તંત્રની કામગીરી અને મેળો શરૂ કરવા માટે આપવામાં આવેલી મંજૂરી સામે પણ સવાલો ઉઠી રહ્યા છે.

રાઈડ મંજૂરી સામે પ્રશ્નાર્થ

ખાસ કરીને મેળો શરૂ કરતા પહેલાં રાઈડના સ્ટ્રક્ચર અંગેનો રિપોર્ટ, જરૂરી દસ્તાવેજો અને વિવિધ મંજૂરીઓ રજૂ કરવામાં આવી હતી કે કેમ તે અંગે ચર્ચા શરૂ થઈ છે. રાઈડની સુરક્ષા અને નિયમોનું પૂરતું પાલન થયું હતું કે નહીં તે અંગે પણ સવાલો ઉઠી રહ્યા છે. જો જરૂરી સુરક્ષા માપદંડોનું સંપૂર્ણ પાલન ન થયું હોય તો આવી રાઈડને મેળામાં મંજૂરી કેવી રીતે આપવામાં આવી તે મુદ્દો પણ ચર્ચાનો વિષય બન્યો છે.

સ્થાનિક લોકોમાં એવી પણ ચર્ચા છે કે સરકારી નિયમો અને સુરક્ષા માપદંડોને નેવે મૂકીને મેળો શરૂ કરવામાં આવ્યો હોવાના કારણે આ પ્રકારની દુર્ઘટના સર્જાઈ છે. જોકે, આ અંગે સત્તાવાર તપાસ બાદ જ હકીકત સ્પષ્ટ થશે. રાઈડ સંચાલકો દ્વારા રજૂ કરવામાં આવેલા સ્ટ્રક્ચર રિપોર્ટ અને અન્ય દસ્તાવેજોની ચકાસણી કરવામાં આવે તેવી માંગ પણ ઉઠી રહી છે.

તરણેતર મેળો ગુજરાતના જાણીતા ભાતીગળ મેળાઓ પૈકીનો એક છે અને દર વર્ષે મોટી સંખ્યામાં લોકો અહીં ઉમટે છે. આવા મેળામાં રાઈડ અને અન્ય મનોરંજનના સાધનોની સુરક્ષા અત્યંત મહત્વપૂર્ણ બની જાય છે. ત્યારે મોતના કૂવાનો ભાગ તૂટી પડવાની ઘટનાએ મેળાની વ્યવસ્થા અને રાઈડને આપવામાં આવેલી મંજૂરીની પ્રક્રિયા પર ગંભીર પ્રશ્નો ઉભા કર્યા છે.

હાલ સમગ્ર મામલે ઈજાગ્રસ્તોની સારવાર અને ઘટનાની તપાસ ચાલી રહી છે. તંત્ર દ્વારા રાઈડના સ્ટ્રક્ચર, મંજૂરીના દસ્તાવેજો તથા સુરક્ષાના નિયમોનું પાલન થયું હતું કે નહીં તેની તપાસ કરવામાં આવે તો જ દુર્ઘટના પાછળનું સાચું કારણ સામે આવી શકે છે.