ઘરના ખાવાને બનાવો શાહી અને ટેસ્ટી: મસાલેદાર હૈદરાબાદી બઘારે રીંગણ બનાવવાની સરળ રીત

ભારતીય રસોઈમાં રીંગણનું ખાસ સ્થાન છે. તેની મદદથી ઘણી બધી સ્વાદિષ્ટ વાનગીઓ તૈયાર કરવામાં આવે છે. અવારનવાર આપણે રીંગણનો ઓળો, ભરેલા રીંગણ અને રીંગણ ભાજા જેવી વાનગીઓ ખૂબ જ ખાતા હોઈએ છીએ. આમાંથી જ એક 'હૈદરાબાદી બઘારે રીંગણ' પણ છે, જે તેના ખાસ સ્વાદ અને બનાવટ માટે જાણીતું છે. આ હૈદરાબાદની પ્રખ્યાત અને પરંપરાગત વાનગી છે, જે નાના રીંગણ અને સીંગદાણા, તલ, કોપરું તથા મસાલાઓ વડે તૈયાર કરવામાં આવે છે. તેનો ખાટો, મસાલેદાર અને હળવો મીઠો સ્વાદ ભોજનને ખાસ બનાવે છે. આને તમે ઘરે પણ સરળતાથી બનાવી શકો છો. તો અહીં જાણો આ વાનગી બનાવવા માટે જરૂરી સામગ્રી અને રીત વિશે...

હૈદરાબાદી બઘારે રીંગણ માટેની સામગ્રી

500 ગ્રામ નાના રીંગણ
4-5 મોટી ચમચી તેલ
અડધી નાની ચમચી જીરૂં
અડધી નાની ચમચી રાઈ
8-10 મીઠા લીમડાના પાન
એક ચમચી હળદર પાવડર
અડધી થી 1 નાની ચમચી લાલ મરચું પાવડર
સ્વાદાનુસાર મીઠું
જરૂર મુજબ પાણી
2 મોટી ચમચી ઝીણી સમારેલી લીલી કોથમરી

ગ્રેવી તૈયાર કરવા માટેની સામગ્રી

3 મોટી ચમચી સીંગદાણા
1 મોટી ચમચી સફેદ તલ
2 મોટી ચમચી સૂકું કોપરું (છીણ કે ટુકડા)
2 મધ્યમ કદના કાંદા (ડુંગળી)
1 ઈંચનો આદુનો ટુકડો
5-6 લસણની કળીઓ
અડધી નાની ચમચી જીરૂં
1 નાની ચમચી આખા ધાણા
1 મોટી ચમચી આમલીનો પલ્પ

જરૂર મુજબ પાણી

હૈદરાબાદી બઘારે રીંગણ બનાવવાની સરળ રીત

સૌથી પહેલા નાના રીંગણને સારી રીતે ધોઈને લૂછી લો. હવે દરેક રીંગણમાં નીચેની તરફથી બે કાપા (કટ) એવી રીતે લગાવો કે તેનું ડીંટડું જોડાયેલું રહે અને રીંગણ આખું અલગ ન થઈ જાય. આનાથી મસાલો રીંગણની અંદર સુધી પહોંચશે. ત્યારબાદ એક કડાઈમાં સીંગદાણાને ધીમા તાપે શેકો, જ્યાં સુધી તેમાંથી સુગંધ ન આવવા લાગે ત્યાં સુધી શેકીને કાઢી લો. હવે એ જ કડાઈમાં તલ અને સૂકા કોપરાને અલગ-અલગ હળવા ગુલાબી થાય ત્યાં સુધી શેકી લો.

એ જ કડાઈમાં થોડું તેલ નાખો અને સમારેલા કાંદાને ગુલાબી/સોનેરી થાય ત્યાં સુધી સાંતળી લો. તેમાં આદુ અને લસણ નાખીને એક-બે મિનિટ પકવો. પછી તેને ઠંડુ થવા દો. શેકેલા સીંગદાણા, તલ, કોપરું, કાંદા-આદુ-લસણનું મિશ્રણ, જીરૂં અને આખા ધાણાને મિક્સરમાં નાખીને થોડું પાણી ઉમેરીને ઝીણી અને ઘટ્ટ પેસ્ટ તૈયાર કરી લો. આમલીને ગરમ પાણીમાં પલાળીને તેનો રસ કાઢી અલગ રાખી મૂકો.

હવે કડાઈમાં 2-3 મોટી ચમચી તેલ ગરમ કરો. તેમાં રીંગણ નાખીને મધ્યમ તાપે ચારેય બાજુથી હળવા સોનેરી થાય ત્યાં સુધી સાંતળો. રીંગણને વચ્ચે-વચ્ચે ફેરવતા રહીને હળવા સોનેરી અને થોડા નરમ થાય ત્યાં સુધી પકવો. પછી તેને કાઢીને અલગ રાખી દો. હવે એ જ કડાઈમાં જરૂર મુજબ તેલ નાખી રાઈ અને જીરૂં તતડાવો, પછી લીમડાના પાન નાખો. તૈયાર કરેલી પેસ્ટ ઉમેરીને ધીમા થી મધ્યમ તાપે 5-7 મિનિટ સુધી સાંતળો. તેમાં હળદર, લાલ મરચું અને મીઠું ઉમેરો. મસાલો કડાઈના તળિયે ચોંટવા લાગે તો થોડું થોડું પાણી ઉમેરતા રહો.

ગ્રેવીમાં આમલીનો રસ અને લગભગ 1 થી દોઢ કપ પાણી નાખીને સારી રીતે મિક્સ કરો. હવે તળેલા રીંગણ તેમાં ઉમેરો અને ઢાંકીને ધીમા તાપે 15-20 મિનિટ પકવો. વચ્ચે-વચ્ચે હળવા હાથે હલાવતા