અમેરિકા જતા વિદ્યાર્થીઓ માટે મોટા સમાચાર, ડ્યુરેશન ઓફ સ્ટેટસનો નિયમ રદ, નાણા-સમય બચશે

અમેરિકામાં ઉચ્ચ અભ્યાસ માટે જતા હજારો ગુજરાતી અને ભારતીય વિદ્યાર્થીઓ માટે એક અત્યંત રાહતના સમાચાર સામે આવ્યા છે. અમેરિકાની એક ફેડરલ કોર્ટે ડિપાર્ટમેન્ટ ઓફ હોમલેન્ડ સિક્યુરિટી (DHS) દ્વારા લાવવામાં આવેલા વિવાદાસ્પદ ‘ડ્યુરેશન ઓફ સ્ટેટસ’ (Duration of Status) સમાપ્ત કરવાના નિયમને સત્તાવાર રીતે રદબાતલ ઠેરવ્યો છે. કોર્ટના આ ઐતિહાસિક ચુકાદાથી F-1 અને J-1 વિઝા પર અભ્યાસ કરતા લાખો વિદ્યાર્થીઓ પર લટકતી વિઝા એક્સટેન્શનની તલવાર હટી ગઈ છે.
શું હતો આ વિવાદાસ્પદ નિયમ અને તેની શું અસર થવાની હતી?
અત્યાર સુધીના નિયમ મુજબ, વિદેશી વિદ્યાર્થીઓ જ્યાં સુધી તેમનો અભ્યાસક્રમ પૂર્ણ ન થાય ત્યાં સુધી (Duration of Status) અમેરિકામાં કાયદેસર રીતે રહી શકતા હતા. પરંતુ, DHS દ્વારા આ વ્યવસ્થા બદલીને વિદ્યાર્થીઓને ચોક્કસ સમયમર્યાદા (Fixed Admission Period) માટે જ વિઝા આપવાનો નિયમ લાવવામાં આવ્યો હતો.
આ નિયમ લાગુ થયો હોત તો માસ્ટર્સના વિદ્યાર્થીઓને દર વખતે વિઝા એક્સટેન્શન માટે અરજી કરવી પડત
જો આ નિયમ લાગુ થયો હોત, તો જો કોઈ વિદ્યાર્થીનો રિસર્ચ પ્રોજેક્ટ લંબાય કે ડિગ્રી પૂરી કરવામાં સહેજ પણ વિલંબ થાય, તો તેણે દર વખતે USCIS સમક્ષ વિઝા એક્સટેન્શન માટે અરજી કરવી પડત. આ પ્રક્રિયા અત્યંત ખર્ચાળ અને સમય માગી લે તેવી હોવાથી ગુજરાતી વિદ્યાર્થીઓ અને તેમના વાલીઓમાં ભારે ચિંતાનું મોજું ફરી વળ્યું હતું. ખાસ કરીને માસ્ટર્સ અને પીએચડી કરતા વિદ્યાર્થીઓ માટે આ નિયમ મોટી મુશ્કેલી સર્જી શકે તેમ હતો.
વિદ્યાર્થીઓમાં ખુશીની લહેર, પણ આગળનો રસ્તો કઠિન
16 નવેમ્બર, 2026ના રોજ ફેડરલ જજે આ નિયમને રદ કરતા હવે જૂની વ્યવસ્થા યથાવત્ રહેશે. અમદાવાદ સ્થિત વિદેશ અભ્યાસના નિષ્ણાતોના મતે, આ નિર્ણયથી વિદ્યાર્થીઓના હજારો ડોલર અને કિંમતી સમય બચી જશે, જેથી તેઓ કોઈપણ માનસિક તણાવ વિના પોતાના અભ્યાસ પર ધ્યાન કેન્દ્રિત કરી શકશે. જોકે, નિષ્ણાતો એવી પણ ચેતવણી આપી રહ્યા છે કે અભ્યાસ દરમિયાન ભલે રાહત મળી હોય, પરંતુ ગ્રેજ્યુએશન પૂર્ણ કર્યા બાદ અમેરિકામાં સ્થાયી થવાનો રસ્તો હજુ પણ પડકારજનક છે. તાજેતરમાં જ DHS દ્વારા H-1B વિઝા એક્સટેન્શનના નિયમો કડક બનાવવાનો અને ગ્રીન કાર્ડ માટેની ‘PERM’ પ્રક્રિયામાં આકરી તપાસ કરવાનો પ્રસ્તાવ મૂકવામાં આવ્યો છે. આમ, હાલ પૂરતી વિદ્યાર્થીઓને મોટી રાહત મળી છે, પરંતુ ભવિષ્યમાં નોકરી અને વિઝા રિન્યુઅલ માટે વિદ્યાર્થીઓએ વધુ સતર્ક રહેવું પડશે.









