કેરળમાં નિપાહ વાયરસનો કહેર,  કુલ 425 દર્દીઓ મળી આવ્યા

કેરળમાં નિપાહ વાયરસના કેસમાં વધારો નોંધાયો છે. રાજ્યના આરોગ્ય પ્રધાન વીણા જ્યોર્જે કેરળમાં નિપાહ વાયરસના વધતા જતા કેસ અંગે ચિંતા વ્યક્ત કરી છે. તેમણે કહ્યું કે રાજ્યમાં નિપાહ વાયરસના ફાટી નીકળવાના કારણે કુલ 425 લોકો દેખરેખ હેઠળ છે. આમાંથી, સૌથી વધુ 228 લોકો મલપ્પુરમના, 110 પલક્કડના અને 87 લોકો કોઝિકોડ જિલ્લાના છે. મલપ્પુરમમાં 12 દર્દીઓની સારવાર ચાલી રહી છે, જેમાંથી 5 દર્દીઓની હાલત ગંભીર છે અને તેમને ICUમાં રાખવામાં આવ્યા છે.

આરોગ્ય મંત્રીએ જણાવ્યું હતું કે કોઝિકોડમાં મોનિટરિંગ લિસ્ટમાં સમાવિષ્ટ તમામ 87 લોકો આરોગ્ય કર્મચારીઓ છે, જ્યારે પલક્કડમાં 61 આરોગ્ય કર્મચારીઓ દેખરેખ હેઠળ છે. એક વ્યક્તિનો રિપોર્ટ નેગેટિવ આવ્યો છે. પલક્કડમાં એક ચેપગ્રસ્ત વ્યક્તિને આઇસોલેશનમાં રાખવામાં આવ્યો છે.

આરોગ્ય વિભાગ એલર્ટ મોડ પર

આરોગ્ય વિભાગે સંબંધિત જિલ્લાઓમાં તાવ સર્વે, હોમ વિઝિટ અને માનસિક કાઉન્સેલિંગ સુનિશ્ચિત કરવા સૂચનાઓ આપી છે. પલક્કડ અને મલપ્પુરમમાં પોઝિટિવ મળી આવેલા લોકોનો રૂટ મેપ પણ જાહેર કરવામાં આવ્યો છે. 108 એમ્બ્યુલન્સ સેવા સહિતની તમામ તબીબી સુવિધાઓ એલર્ટ મોડ પર છે. આ સાથે, ચેપના સ્ત્રોતને શોધવા માટે પણ પ્રયાસો તીવ્ર બનાવવામાં આવ્યા છે.

આરોગ્ય મંત્રી વીણા જ્યોર્જની અધ્યક્ષતામાં યોજાયેલી ઉચ્ચ સ્તરીય બેઠકમાં વધારાના મુખ્ય સચિવ, રાજ્ય આરોગ્ય મિશનના નિયામક, તબીબી શિક્ષણ નિયામક, જિલ્લા કલેક્ટર, DMO, પોલીસ અધિકારી અને અન્ય વિભાગોના અધિકારીઓ હાજર રહ્યા હતા.

મલપ્પુરમમાં યુવતીનું મોત

દરમિયાન, મલપ્પુરમ જિલ્લાની 18 વર્ષીય મહિલાનું નિપાહ ચેપને કારણે મૃત્યુ થયું હોવાની પુષ્ટિ કરવામાં આવી છે, જ્યારે પલક્કડની 38 વર્ષીય મહિલાનો પણ ટેસ્ટ પોઝિટિવ આવ્યો છે. પલક્કડ જિલ્લામાં આરોગ્ય કર્મચારીઓએ અત્યાર સુધીમાં 2,000 થી વધુ ઘરોની મુલાકાત લીધી છે અને તપાસ હાથ ધરી છે.

સરકારે લોકોને ખાસ કરીને કન્ટેઈનમેન્ટ ઝોનમાં સાવધાની રાખવા, બિનજરૂરી ભીડ ન કરવા, N95 માસ્ક પહેરવા અને મુસાફરી ટાળવા અપીલ કરી છે. આ સાથે, તેમને ક્વોરેન્ટાઇનના ધોરણોનું કડક પાલન કરવા, વારંવાર હાથ સેનિટાઇઝ કરવા અને શરદી, ઉધરસ, તાવ, માથાનો દુખાવો અથવા શ્વાસ લેવામાં તકલીફ જેવા લક્ષણો પર તાત્કાલિક આરોગ્ય કર્મચારીઓને જાણ કરવા કહેવામાં આવ્યું છે.