Video/ ગરીબોની આશા પર પાણી: છોટાઉદેપુરમાં માનવ કલ્યાણ યોજનાની કીટમાં ISI માર્કા વગરનો સામાન
છેલ્લું અપડેટ : 12 Dec 2025
છોટાઉદેપુર જિલ્લાના કવાંટ ખાતે ગુજરાત સરકારની માનવ કલ્યાણ યોજના હેઠળ વિવિધ સ્વ-રોજગાર માટેની કીટ વિતરણની કામગીરીમાં ગંભીર વિવાદ સર્જાયો છે. જિલ્લાના 6 તાલુકાના કુલ 746 ગરીબ લાભાર્થીઓને આપવામાં આવેલી કીટમાં ISI માર્કા વગરનો અને હલકી કક્ષાનો સામાન હોવાનું સામે આવતા હોબાળો મચી ગયો હતો.
ISI માર્કાનો ભંગ અને ગુપ્ત વિતરણ
સરકાર દ્વારા ISI માર્કાવાળી ગુણવત્તાયુક્ત વસ્તુઓ આપવાનું ફરમાન હોવા છતાં, કીટ વિતરણ કરતી એજન્સી દ્વારા તેનું ઉલ્લંઘન કરવામાં આવ્યું હોવાનો આક્ષેપ છે.
ISI માર્કાનો અભાવ: લાભાર્થીઓને આપવામાં આવેલી રૂ. 10,000 થી રૂ. 20,000 ની કિંમતની કીટમાં કોઈ પણ સામાન પર ISI માર્કો જોવા મળ્યો ન હતો.
ગુણવત્તા પર સવાલ: લાભાર્થીઓએ સ્પષ્ટ આક્ષેપ કર્યો હતો કે કીટમાં આપવામાં આવેલો સામાન અત્યંત હલકી કક્ષાનો છે, જે રોજગાર માટે યોગ્ય નથી.
બારોબાર વિતરણ: વિતરણની આખી પ્રક્રિયા ગુપ્ત રીતે એક ગોડાઉનમાં કરવામાં આવી હતી. સ્થાનિક આગેવાનો અને અધિકારીઓને પણ તેની જાણ કરવામાં આવી ન હતી. સ્થાનિક નેતાઓને જાણ થતાં તેમણે આ કૌભાંડને બહાર પાડ્યું હતું.
દૂરથી આવેલા 746 લાભાર્થીઓને હાલાકી
છોટાઉદેપુર જિલ્લાના નસવાડી, બોડેલી, સંખેડા, કવાંટ, પાવીજેતપુર, અને છોટાઉદેપુર તાલુકામાંથી 746 લાભાર્થીઓએ વિવિધ કીટ માટે અરજી કરી હતી, જેમાં ભરતકામ કીટ, બ્યુટીપાર્લર કીટ, દૂધ દહીં વેચનાર કીટ, ઇલેક્ટ્રિક એપ્લાયન્સ રિપેરિંગ કીટ, પંચર કીટ, પ્લમ્બર કીટ, વગેરેનો સમાવેશ થાય છે.
50 થી 60 કિલોમીટર દૂરથી ભાડું ખર્ચીને કવાંટ ખાતે કીટ લેવા આવેલા ગરીબ લાભાર્થીઓને જ્યારે હલકી કક્ષાનો સામાન મળ્યો ત્યારે તેમનામાં ભારે નારાજગી જોવા મળી હતી. લાભાર્થીઓએ કીટ વિતરણ કરવા આવેલી એજન્સીના કર્મચારીઓને ઘેરી વળીને આક્રમક રજૂઆત કરી હતી.