Video: વઢવાણ તાલુકા પંચાયતના ધાબા પર 7/12 સહિતના કિંમતી દસ્તાવેજ નષ્ટ, 100થી વધુ ગાંસડી માવઠાથી પલળી 

સુરેન્દ્રનગરની વઢવાણ તાલુકા પંચાયત ફરી એકવાર તેની ઘોર બેદરકારીને કારણે વિવાદમાં આવી છે. આ વખતે પંચાયત દ્વારા ખેડૂતોના મહત્ત્વના ૭/૧૨ (સાતબાર) ની નકલો સહિતના જરૂરી દસ્તાવેજો કચેરીના ધાબા પર ખુલ્લી જગ્યામાં રઝળતી હાલતમાં ફેંકી દેવામાં આવતા મોટી ચકચાર મચી છે.

 માવઠાના વરસાદથી કિંમતી દસ્તાવેજોનો નાશ
અધિકારીઓની આ ગંભીર બેદરકારીને કારણે અનેક મહત્ત્વપૂર્ણ દસ્તાવેજો નષ્ટ થઈ ગયા છે. અંદાજિત ૧૦૦થી વધુ ગાંસડી ભરીને રાખેલા કિંમતી દસ્તાવેજો ધાબા પર રઝળતા હતા, અને તાજેતરમાં થયેલા માવઠાના વરસાદને કારણે તે સંપૂર્ણપણે પલળી જતાં તેનો નાશ થયો છે.

આ ઘટના સ્પષ્ટપણે દર્શાવે છે કે, તાલુકા પંચાયતના અધિકારીઓ દસ્તાવેજોની જાળવણી પ્રત્યે કેટલા બેદરકાર છે.

આ ગંભીર બેદરકારીને કારણે એક મોટો પ્રશ્ન ઊભો થયો છે કે, અરજદારો પાસેથી ફી લઈને ઉઘરાવવામાં આવતા મહત્ત્વના દસ્તાવેજો પણ જો સરકારી કચેરીઓમાં સુરક્ષિત ન હોય, તો સામાન્ય જનતાએ કોના પર વિશ્વાસ કરવો? વહીવટી તંત્ર દ્વારા આ બેદરકારી બદલ જવાબદાર અધિકારીઓ સામે કડક કાર્યવાહી થવી જરૂરી છે.