VIDEO: ભગવાન જગન્નાથની પરંપરાગત ચંદન યાત્રા, શ્રદ્ધાળુઓ મોટી સંખ્યામાં ઉમટી પડ્યા

અમદાવાદમાં આગામી 16 જુલાઈના રોજ નીકળનારી ઐતિહાસિક રથયાત્રાની તૈયારીઓનો આજથી વિધિવત પ્રારંભ થઈ રહ્યો છે. અખાત્રીજના પવિત્ર દિવસે ભગવાન જગન્નાથની પરંપરાગત ચંદન યાત્રા યોજાશે. આ પ્રસંગે ભગવાનના ત્રણેય રથોનું વિધિવત પૂજન કરી સમારકામ માટેની અનુમતિ લેવામાં આવશે.વર્ષોની પરંપરા મુજબ, અખાત્રીજના દિવસે ભગવાન જગન્નાથ, બહેન સુભદ્રા અને ભાઈ બલભદ્રના રથોને ચંદનથી પૂજવામાં આવે છે. આ ધાર્મિક વિધિ બાદ જ રથોના સમારકામ અને રંગરોગાનની પ્રક્રિયા શરૂ કરવામાં આવશે. ચંદન યાત્રા એ રથયાત્રાના ઉત્સવનું પ્રથમ મહત્વનું ચરણ માનવામાં આવે છે, જેમાં શ્રદ્ધાળુઓ મોટી સંખ્યામાં ઉમટી પડ્યા છે.

રથોનું વિધિવત પૂજન અને સુશોભન

અખાત્રીજ નિમિત્તે જગન્નાથ મંદિરની સામે ભગવાન જગન્નાથ, ભાઈ બલભદ્ર અને બહેન સુભદ્રાજીના ત્રણેય રથોને વિવિધ રંગબેરંગી ફૂલોથી અત્યંત સુંદર રીતે સુશોભિત કરવામાં આવ્યા હતા. વિદ્વાન બ્રાહ્મણો દ્વારા મંત્રોચ્ચાર સાથે રથોનું વિધિવત પૂજન-અર્ચન કરવામાં આવ્યું હતું. આ ધાર્મિક વિધિ સાથે જ આગામી રથયાત્રાની તૈયારીઓના શ્રીગણેશ થયા છે.

ચંદનયાત્રા મહોત્સવ

ઉનાળાની અસહ્ય ગરમીથી ભગવાનને શીતળતા આપવા માટે દર વર્ષે અખાત્રીજથી ચંદનયાત્રાનો પ્રારંભ થાય છે. આ વિધિ હેઠળ ભગવાનના વિગ્રહ પર ચંદનનો લેપ કરવામાં આવે છે. શ્રદ્ધાળુઓ માટે આ એક લ્હાવો હોય છે, જેને જોવા માટે મોટી સંખ્યામાં ભક્તો ઉમટી પડ્યા હતા.

ચુસ્ત પોલીસ બંદોબસ્ત

મંદિર પરિસરમાં ભક્તોની ભીડ અને સુરક્ષાને ધ્યાનમાં રાખીને પોલીસ દ્વારા પૂરતો બંદોબસ્ત ગોઠવી દેવામાં આવ્યો છે. કોઈપણ પ્રકારની અનિચ્છનીય ઘટના ન બને તે માટે પોલીસ દ્વારા સતત મોનિટરિંગ કરવામાં આવી રહ્યું છે.

રથયાત્રાની તારીખ

નોંધનીય છે કે, આ વર્ષે ભગવાન જગન્નાથજીની ભવ્ય રથયાત્રા 16-7-2026 ના રોજ નીકળશે. અખાત્રીજના આ પૂજન સાથે જ ખલાસી ભાઈઓ અને મંદિરના ટ્રસ્ટીઓ દ્વારા રથયાત્રાના આયોજનને આખરી ઓપ આપવાની કામગીરી તેજ કરી દેવામાં આવી છે.