Video: ઈથેનોલ પ્લાન્ટ સ્થાપવા મુદ્દે ખેડૂતોનો ઉગ્ર વિરોધ, પોલીસ સાથે થઈ અથડામણ
રાજસ્થાનના હનુમાનગઢ જિલ્લાના રાઠી ખેડા ગામમાં ઇથેનોલ પ્લાન્ટ સ્થાપવાને લઈને ગ્ર
રાજસ્થાનના હનુમાનગઢ જિલ્લાના રાઠી ખેડા ગામમાં ઇથેનોલ પ્લાન્ટ સ્થાપવાને લઈને ગ્રામજનોનું પ્રદર્શન બુધવારે ઉગ્ર બન્યું હતું. ખેડૂતો દ્વારા પ્લાન્ટની નિર્માણાધીન દીવાલ તોડવામાં આવતા પોલીસે લાઠીચાર્જ કર્યો હતો, જેના પગલે પરિસ્થિતિ વધુ વણસી હતી.
ખેડૂતો ઉશ્કેરાયા, પોલીસ સાથે બબાલ
ખેડૂતો અને પોલીસકર્મીઓ વચ્ચે થયેલી અથડામણમાં એક ડઝનથી વધુ લોકો ઘાયલ થયા હતા. ઉશ્કેરાયેલા ખેડૂતોએ પોલીસકર્મીઓ અને વહીવટીતંત્રના વાહનોને આગ ચાંપી દીધી હતી અને પોલીસકર્મીઓ પર પથ્થરમારો પણ કર્યો હતો. જવાબમાં, પોલીસે પરિસ્થિતિને કાબૂમાં લેવા માટે આંસુ ગેસના ગોળા છોડ્યા હતા.
મામલો કેમ બગડ્યો?
રાઠી ખેડા ગામમાં આશરે ₹450 કરોડના ખર્ચે ઇથેનોલ પ્લાન્ટ સ્થાપવાનું કામ શરૂ થયું છે. ખેડૂતો આ પ્લાન્ટનો વિરોધ કરી રહ્યા છે. તેમનો આરોપ છે કે પ્લાન્ટ સ્થાપવાથી આ વિસ્તારમાં પ્રદૂષણ ફેલાશે, જે પર્યાવરણ અને સ્થાનિક લોકોના સ્વાસ્થ્ય માટે હાનિકારક રહેશે.
પ્લાન્ટની દીવાલ તોડી પડાઈ
બુધવારે, ખેડૂતોએ સૌપ્રથમ ઉપખંડ અધિકારી (SDM) કાર્યાલય સામે સભા યોજી હતી અને ત્યારબાદ ટ્રેક્ટર વડે પ્લાન્ટની દીવાલ તોડી પાડી હતી. આ ઘટના દરમિયાન માહોલ તંગ બન્યો હતો. પોલીસકર્મીઓ અને ખેડૂતો વચ્ચેની અથડામણમાં કોંગ્રેસના ધારાસભ્ય અભિમન્યુ પુનિયા પણ ઘાયલ થયા હતા, અને તેમને હનુમાનગઢ જિલ્લા હોસ્પિટલમાં દાખલ કરવામાં આવ્યા હતા.
ઈન્ટરનેટ સેવા બંધ...
પ્રશાસને પરિસ્થિતિને જોતા ટિબ્બી અને તેની આસપાસના વિસ્તારોમાં ઇન્ટરનેટ સેવાઓ બંધ કરવાનો આદેશ આપ્યો છે. વધુમાં, આગામી આદેશ સુધી શાળાઓ અને દુકાનોને પણ બંધ રાખવાનો નિર્દેશ આપવામાં આવ્યો છે. સમગ્ર વિસ્તારમાં કલમ 144 લાગુ કરવામાં આવી છે અને સ્થળ પર ભારે પોલીસ બંદોબસ્ત ગોઠવી દેવામાં આવ્યો છે, જેથી વધુ હિંસા ન થાય.
