ખામનેઈ બચ્યા કે માર્યા ગયા? તેહરાનમાં સુપ્રીમ લીડરના ઘર અને ઓફિસ પર અમેરિકા-ઈઝરાયેલનો સીધો મિસાઈલ હુમલો

અમેરિકા અને ઇઝરાયલે ઇરાન સામે મોટો લશ્કરી હુમલો કર્યો છે, જેનાથી સમગ્ર ક્ષેત્રમાં અભૂતપૂર્વ તણાવ ફેલાયો છે. આ કાર્યવાહીનું સૌથી મહત્ત્વપૂર્ણ અને સંવેદનશીલ પાસું એ છે કે ઇરાનના સુપ્રીમ લીડર અલી ખામનેઈના કાર્યાલયને સીધા નિશાન બનાવવામાં આવ્યું હતું. રાજધાની તેહરાનના મધ્યમાં તેમના સત્તાવાર કાર્યાલય પર હુમલો થયાના અહેવાલો બહાર આવ્યા બાદ પરિસ્થિતિ વધુ ગંભીર બની છે.

સુપ્રીમ નેતા ખામનેઈ તેહરાનમાં નથી અને યુએસ-ઇઝરાયલી હુમલા પહેલા તેમને સુરક્ષિત સ્થળોએ ખસેડવામાં આવ્યા હતા. તેહરાન સહિત અનેક મોટા શહેરોમાં જોરદાર વિસ્ફોટો સંભળાયા હતા. શરૂઆતના તબક્કામાં, ઈરાની લશ્કરી એકમો અને ઇસ્લામિક રિવોલ્યુશનરી ગાર્ડ કોર્પ્સના ઠેકાણાઓને નિશાન બનાવવામાં આવ્યા હતા.

અહેવાલ મુજબ, ઈરાનમાં થયેલા હુમલાઓમાં મંત્રીઓ અને લશ્કરી વડાઓના ઘરો, સંરક્ષણ અને ગુપ્તચર મંત્રાલયના ઠેકાણાઓ અને રાષ્ટ્રપતિ સુવિધાઓને નિશાન બનાવવામાં આવી હતી.

થોડા સમય પછી, સમાચાર આવ્યા કે સુપ્રીમ લીડરના ઓફિસ કોમ્પ્લેક્સ પર પણ હુમલો કરવામાં આવ્યો છે, જેનાથી હુમલાનો વ્યાપ વધ્યો છે. આ પગલું પ્રતીકાત્મક અને વ્યૂહાત્મક બંને દ્રષ્ટિકોણથી અત્યંત મહત્ત્વપૂર્ણ માનવામાં આવે છે, કારણ કે સુપ્રીમ લીડરનું કાર્યાલય ઈરાનમાં શક્તિનું કેન્દ્ર છે. હુમલામાં રાષ્ટ્રપતિ મહેલ અને રાષ્ટ્રપતિના નિવાસસ્થાનને પણ નિશાન બનાવવામાં આવ્યા હોવાના અહેવાલ છે, પરંતુ તેઓ સુરક્ષિત હોવાનું જાણવા મળ્યું છે.

એવું કહેવામાં આવી રહ્યું છે કે હુમલાઓ એક સ્થાન સુધી મર્યાદિત ન હતા. તેહરાન ઉપરાંત, તબ્રીઝ, કોમ, કરજ, ખોરામાબાદ, કરમાનશાહ અને ઇલામ જેવા શહેરોમાં પણ વિસ્ફોટ થયાના અહેવાલ છે. ઈરાની મીડિયાએ પુષ્ટિ આપી છે કે રાજધાનીના ડાઉનટાઉન વિસ્તારમાં સુપ્રીમ લીડરના કાર્યાલયની આસપાસ સુરક્ષા દળોની ભારે તૈનાતી કરવામાં આવી હતી. જોકે, વિગતવાર નુકસાનની માહિતી સત્તાવાર રીતે જાહેર કરવામાં આવી નથી.

હવાઈ અને દરિયાઈ બંને રીતે ઈરાન પર હુમલો

ઈઝરાયલે આ હુમલાને પૂર્વ-આયોજિત અને સંકલિત કાર્યવાહી ગણાવી છે. યુએસ અધિકારીઓએ પણ સંકેત આપ્યો છે કે હુમલો હવા અને દરિયાઈ બંને રીતે કરવામાં આવ્યો હતો. જોકે લક્ષ્યોની સંપૂર્ણ વિગતો જાહેરમાં શેર કરવામાં આવી નથી, વિવિધ અહેવાલો સૂચવે છે કે સુપ્રીમ લીડરના કાર્યાલય, લશ્કરી થાણાઓ અને ઉચ્ચ કક્ષાના કમાન્ડરોને નિશાન બનાવવામાં આવ્યા હતા.

ઈરાન હાઈ એલર્ટ પર, ઈઝરાયલને બદલો લેવાની ચેતવણી આપી

હુમલા બાદ, ઈરાને તેનું હવાઈ ક્ષેત્ર અસ્થાયી રૂપે બંધ કરી દીધું. દેશભરની સુરક્ષા એજન્સીઓને હાઈ એલર્ટ પર રાખવામાં આવી છે.