સિડનીમાં હાર બાદ કોચ ગૌતમ ગંભીરે રોહિત-વિરાટની નિવૃત્તિ પર આપ્યું મોટું નિવેદન, જાણો શું કહ્યું

સિડની ટેસ્ટમાં છ વિકેટથી હાર સાથે ભારતે એક દાયકા પછી બોર્ડર-ગાવસ્કર ટ્રોફી ગુમાવી છે. આ હાર બાદ કોહલી અને રોહિતની ટેસ્ટ કારકિર્દી પર સવાલો ઉઠી રહ્યા છે. તમને જણાવી દઈએ કે ભારત અને ઓસ્ટ્રેલિયા વચ્ચે 22 નવેમ્બર 2024થી 5 જાન્યુઆરી 2025 સુધી પાંચ મેચની ટેસ્ટ સિરીઝ રમાઈ હતી, ઓસ્ટ્રેલિયાએ આ ટેસ્ટ સિરીઝ 3-1થી જીતી હતી. રોહિત શર્મા અને વિરાટ કોહલીના ટેસ્ટ ભવિષ્યને લઈને સવાલ ટીમ ઈન્ડિયાના હેડ કોચ ગૌતમ ગંભીર સામે પણ આવ્યો હતો, જેનો જવાબ તેણે મીડિયાની સામે આપ્યો હતો.

આ પણ વાંચો: સિડનીની હારથી તૂટ્યા કરોડો દિલ! ભારત WTC ફાઈનલની રેસમાંથી બહાર; ઓસ્ટ્રેલિયા થયું ક્વોલિફાય

રોહિત-વિરાટના ટેસ્ટ ભવિષ્ય પર ગંભીરનો જવાબ

સિડની ટેસ્ટમાં હાર બાદ પ્રેસ કોન્ફરન્સમાં ટીમ ઈન્ડિયાના હેડ કોચ ગૌતમ ગંભીરે સિનિયર ખેલાડીઓ વિરાટ કોહલી અને રોહિત શર્માના ટેસ્ટ ક્રિકેટના ભવિષ્ય અંગે પ્રતિક્રિયા આપી હતી. ગંભીરે સ્પષ્ટ કહ્યું કે ખેલાડીઓએ પોતાનું ભવિષ્ય નક્કી કરવું જોઈએ. તેમણે ડોમેસ્ટિક ક્રિકેટ રમવા પર પણ ભાર મૂક્યો હતો. ગંભીરે આ ચર્ચાઓને સમાપ્ત કરવાનો પ્રયાસ કર્યો અને કહ્યું, "હું કોઈપણ ખેલાડીના ભવિષ્ય વિશે ટિપ્પણી નથી કરી શકતો. આ સંપૂર્ણપણે તેમનો અંગત નિર્ણય છે. પણ હા, તેમની પાસે હજુ પણ જુસ્સો અને ભૂખ છે. તેઓ મજબૂત ખેલાડીઓ છે. મને આશા છે કે તેઓ ભારતીય ક્રિકેટને આગળ લઈ જવા માટે પોતાનું સર્વશ્રેષ્ઠ આપશે."

ગંભીરે ડોમેસ્ટિક ક્રિકેટની ફોર્મ્યુલા આપી

ગૌતમ ગંભીરે સ્પષ્ટ કહ્યું કે ખેલાડીઓએ રેડ બોલ ક્રિકેટમાં પોતાનું પ્રદર્શન સુધારવા માટે ડોમેસ્ટિક ક્રિકેટ રમવું જોઈએ. તેણે કહ્યું, "હું હંમેશા ઈચ્છું છું કે જો ઉપલબ્ધ હોય તો તમામ ખેલાડીઓ ડોમેસ્ટિક ક્રિકેટ રમે. રેડ બોલ ક્રિકેટમાં પોતાની જાતને સુધારવાની આ શ્રેષ્ઠ રીત છે."

રોહિત-કોહલીનું ખરાબ પ્રદર્શન

છેલ્લા એક વર્ષમાં ટેસ્ટ ક્રિકેટમાં રોહિત શર્મા અને વિરાટ કોહલીનું પ્રદર્શન અપેક્ષા મુજબ નથી રહ્યું. રોહિતે છેલ્લી 15 ટેસ્ટ ઇનિંગ્સમાં માત્ર 164 રન બનાવ્યા હતા, જેમાં એક અડધી સદી સામેલ હતી. ઓસ્ટ્રેલિયા પ્રવાસ પર તેણે ત્રણ ટેસ્ટ મેચમાં 31 રન બનાવ્યા હતા અને ખરાબ ફોર્મના કારણે તેને છેલ્લી ટેસ્ટમાંથી બહાર કરવામાં આવ્યો હતો.

વિરાટ કોહલીનું પ્રદર્શન પણ નિરાશાજનક રહ્યું હતું. તેણે છેલ્લી 19 ટેસ્ટ ઈનિંગ્સમાં 382 રન બનાવ્યા હતા, જેમાં એક સદી અને એક અડધી સદી સામેલ હતી. ઓસ્ટ્રેલિયા પ્રવાસ દરમિયાન કોહલી સાતમાંથી છ વખત ઓફ સ્ટમ્પની બહારના બોલ પર આઉટ થયો હતો.