બરફવર્ષા પહેલાં આતંકીઓનો ખતરનાક પ્લાન નિષ્ફળ, કુપવાડામાં સુરક્ષાદળો સાથેની અથડામણમાં 2 આતંકવાદીઓ ઠાર

જમ્મુ-કાશ્મીરમાં ભારત-પાકિસ્તાન નિયંત્રણ રેખા (LoC) નજીક સુરક્ષાદળોને મોટી સફળતા મળી છે. કુપવાડા જિલ્લાના કેરન સેક્ટરમાં આવેલા જુમાગુંડ વિસ્તારમાં શનિવારે વહેલી સવારે લગભગ 3:30 વાગ્યે સેના અને આતંકવાદીઓ વચ્ચે ભીષણ અથડામણ શરૂ થઈ હતી, જેમાં બે આતંકીઓને ઠાર કરવામાં આવ્યા છે. હાલ સમગ્ર વિસ્તારમાં સેના દ્વારા સઘન સર્ચ ઓપરેશન ચલાવવામાં આવી રહ્યું છે.

અધિકારીઓના જણાવ્યા અનુસાર, ઉત્તર કાશ્મીરના કેરન સેક્ટરમાં LoC નજીક તહેનાત સતર્ક જવાનોને અંધારામાં કેટલીક શંકાસ્પદ હિલચાલ જોવા મળી હતી. જવાનોએ તાત્કાલિક કાર્યવાહી કરીને આતંકીઓને પડકાર્યા હતા અને તેમને ચારેય તરફથી ઘેરી લીધા હતા. આ ઘૂસણખોરીનો પ્રયાસ હતો કે કેમ તે અંગે હાલ ચોક્કસ માહિતી સામે આવી નથી, પરંતુ જવાનોની ત્વરિત કાર્યવાહીથી મોટી જાનહાનિ ટળી ગઈ છે.

સપ્ટેમ્બરમાં પણ 2 પાકિસ્તાની આતંકી માર્યા ગયા હતા

આ ઘટનાના બરાબર એક મહિના પહેલાં એટલે કે 17 સપ્ટેમ્બરના રોજ પણ જમ્મુના ઉધમપુર જિલ્લામાં સેનાના એક ઓપરેશન દરમિયાન જૈશ-એ-મોહમ્મદના બે પાકિસ્તાની આતંકવાદીઓ માર્યા ગયા હતા, જ્યારે એક શંકાસ્પદ વ્યક્તિની ધરપકડ કરવામાં આવી હતી. માર્યા ગયેલા આતંકીઓની ઓળખ સદ્દામ અને મુસ્તફા તરીકે થઈ હતી. તેમની પાસેથી એક AK-47 રાઈફલ (4 મેગેઝિન), એક M4 કાર્બાઈન (3 મેગેઝિન), એક ગ્લોક પિસ્તોલ અને ચાર ગ્રેનેડ સહિતનો મોટો દારૂગોળો જપ્ત કરવામાં આવ્યો હતો.

શિયાળો શરૂ થતાં જ ઘૂસણખોરી વધવાની આશંકા

નિયંત્રણ રેખા પર શિયાળાની ઋતુ શરૂ થતાં પહેલાં ઘૂસણખોરીની ઘટનાઓમાં અવારનવાર વધારો જોવા મળે છે. ભારે હિમવર્ષાના કારણે પહાડી રસ્તાઓ અને પાસ બંધ થઈ જાય તે પહેલાં આતંકી સંગઠનો ખીણમાં વધુમાં વધુ આતંકીઓને ધકેલવાનો પ્રયાસ કરે છે. આ જોખમને ધ્યાનમાં રાખીને ભારતીય સેનાએ LoC પર નજરબંધી, પેટ્રોલિંગ અને ઓપરેશન વધુ તેજ બનાવી દીધા છે જેથી સરહદ પારથી થતાં દરેક નાપાક ષડયંત્રને નિષ્ફળ બનાવી શકાય.