દિવાળી પહેલાં કર્મચારીઓની થઈ ગઈ બલ્લે-બલ્લે! 0 દિવસના બોનસની જાહેરાત! જાણો કેટલું બોનસ મળશે
કેન્દ્ર સરકારે દિવાળી પહેલાં સરકારી કર્મચારીઓ માટે મોટી જાહેરાત કરી છે. નાણાકીય વર્ષ 2025-26 માટે પાત્ર કર્મચારીઓને 30 દિવસનું નોન-પ્રોડક્ટિવિટી લિંક્ડ (એડ-હોક) બોનસ આપવાની મંજૂરી આપવામાં આવી છે. નાણા મંત્રાલયના ખર્ચ વિભાગે 15 ઓક્ટોબર, 2026ના રોજ આ અંગે ઓફિસ મેમોરેન્ડમ જાહેર કર્યો છે. આ નિર્ણય હેઠળ પાત્ર કર્મચારીઓને મહત્તમ ₹6,908 સુધીનું બોનસ મળી શકશે. આ લાભ ગ્રુપ ‘C’ અને બિન-ગેઝેટેડ ગ્રુપ ‘B’ના કર્મચારીઓ ઉપરાંત સેન્ટ્રલ આર્મ્ડ પોલીસ ફોર્સિસ (CAPF) અને સશસ્ત્ર દળોના પાત્ર જવાનોને પણ મળશે.
કોને મળશે 30 દિવસના બોનસનો લાભ?
આ બોનસ એવા પાત્ર કેન્દ્રીય સરકારી કર્મચારીઓને મળશે, જેઓ પ્રોડક્ટિવિટી-લિંક્ડ બોનસ યોજનામાં આવરી લેવાયેલા નથી. કેન્દ્ર સરકારનું પગાર માળખું ધરાવતા કેન્દ્રશાસિત પ્રદેશોના પાત્ર કર્મચારીઓ પણ આ યોજનાનો લાભ મેળવી શકશે. જોકે, બોનસ મેળવવા માટે નક્કી કરાયેલી સેવા સંબંધિત શરતો પૂર્ણ કરવી જરૂરી છે.
બોનસ માટેની પાત્રતા અને શરતો
બોનસ મેળવવા માટે કર્મચારીએ નાણાકીય વર્ષ 2025-26 દરમિયાન ઓછામાં ઓછી છ મહિનાની સતત સેવા પૂર્ણ કરેલી હોવી જોઈએ અને 31 માર્ચ, 2026ના રોજ સેવામાં હોવું જરૂરી છે. છ મહિનાથી એક વર્ષ સુધી સેવા આપનારા કર્મચારીઓને તેમની સેવા અવધિ પ્રમાણે પ્રમાણસર (Pro-rata) બોનસ મળશે.
31 માર્ચ, 2026 પહેલાં નિવૃત્ત થયેલા, તબીબી કારણોસર નિવૃત્તિ લેનારા અથવા અવસાન પામેલા કર્મચારીઓ પણ નિર્ધારિત શરતો પૂર્ણ કરતા હોય તો પાત્ર બની શકે છે. રાજ્ય સરકારો અથવા જાહેર ક્ષેત્રના ઉપક્રમો (PSU)માં ડેપ્યુટેશન પર ગયેલા કર્મચારીઓ માટે સંબંધિત સંસ્થાના નિયમો લાગુ પડશે.
₹6,908ના બોનસની ગણતરી કેવી રીતે થશે?
બોનસની ગણતરી માટે માસિક વેતનની મહત્તમ મર્યાદા ₹7,000 નક્કી કરવામાં આવી છે. આ મર્યાદા પ્રમાણે ગણતરીનું સૂત્ર ₹7,000 × 30 ÷ 30.4 છે. તેના આધારે કર્મચારીને ₹6,908 બોનસ મળશે. જો કર્મચારીનું સરેરાશ માસિક વેતન ₹7,000થી ઓછું હશે, તો બોનસની ગણતરી વાસ્તવિક વેતનના આધારે કરવામાં આવશે.
દૈનિક વેતન પર કામ કરતા શ્રમિકોને પણ લાભ
કેન્દ્ર સરકારે કેઝ્યુઅલ લેબરર્સ એટલે કે દૈનિક વેતનભોગીઓ માટે પણ બોનસની જોગવાઈ કરી છે. છ દિવસના કાર્ય સપ્તાહવાળી કચેરીમાં છેલ્લા ત્રણ વર્ષ દરમિયાન દર વર્ષે ઓછામાં ઓછા 240 દિવસ અને પાંચ દિવસના કાર્ય સપ્તાહવાળી કચેરીમાં ઓછામાં ઓછા 206 દિવસ કામ કરેલું હોવું જોઈએ. તેમના માટે માસિક વેતનની ગણતરી મર્યાદા ₹1,200 રાખવામાં આવી છે. તેના આધારે 30 દિવસનું બોનસ ₹1,184 થશે. વાસ્તવિક વેતન ઓછું હોય તો તે મુજબ ચુકવણી થશે.
કયા બજેટમાંથી થશે ચુકવણી?
બોનસની ચુકવણી માટેનો ખર્ચ સંબંધિત મંત્રાલયો અને વિભાગોના નાણાકીય વર્ષ 2026-27ના મંજૂર બજેટમાંથી કરવામાં આવશે. ચુકવણીની રકમ નજીકના પૂર્ણાંક રૂપિયામાં રાઉન્ડ ઓફ કરવામાં આવશે.
