'ખેડૂતો પણ દેશના નાગરિક છે...', સુપ્રીમે શંભુ બોર્ડર બ્લોક કરવા બાબતે હરિયાણા સરકારને લગાવી ફટકાર

સુપ્રીમ કોર્ટે શંભુ બોર્ડરને લઈને હરિયાણા સરકારને ખખડાવી છે. કોર્ટે પંજાબ અને હરિયાણા હાઈકોર્ટના આદેશ પર મોટી ટિપ્પણી કરતા કહ્યું કે, રાજ્ય સરકાર હાઈવે પર ટ્રાફિક કેવી રીતે રોકી શકે? ટ્રાફિકને નિયંત્રિત કરવાનું કામ રાજ્ય સરકારનું છે. અમે કહી રહ્યા છીએ કે સરહદ ખુલ્લી રાખો પણ નિયંત્રણ પણ રાખો. આખરે, રાજ્ય સરકાર બોર્ડર ખોલવાના હાઈકોર્ટના આદેશને કેમ પડકારવા માંગે છે?

જસ્ટિસ કાંતે હરિયાણા સરકારને આ મામલે એફિડેવિટ દાખલ કરવા કહ્યું છે. સુપ્રીમ કોર્ટે કહ્યું કે ખેડૂતો પણ દેશના નાગરિક છે, તેમને પણ સુવિધાઓની જરૂર છે. તેમને ભોજન અને સારી તબીબી સુવિધાઓ પણ આપવી જોઈએ. તેઓ આવશે, સૂત્રોચ્ચાર કરશે અને પાછા ચાલ્યા જશે. પંજાબ અને હરિયાણા હાઈકોર્ટે રસ્તો ખોલવાનો આદેશ આપ્યો હતો. સુપ્રીમ કોર્ટ આ મામલાની સુનાવણી આગામી શુક્રવારે કરશે.

શું છે મામલો?

જસ્ટિસ સૂર્યકાંત અને જસ્ટિસ ઉજ્જવલ ભુયાંની બેંચે શંભુ બોર્ડરને ફરીથી ખોલવાના પંજાબ અને હરિયાણા હાઈકોર્ટના આદેશને પડકારતી હરિયાણા સરકારની અરજી પર સુનાવણી કરતી વખતે આ વાત કહી. જણાવી દઈએ કે, પંજાબ અને હરિયાણા હાઈકોર્ટે ખેડૂતોના આંદોલન દરમિયાન વિરોધ કરી રહેલા 22 વર્ષના યુવકના મોતની ન્યાયિક તપાસનો આદેશ આપ્યો હતો. આ આદેશ સામે હરિયાણા સરકારે સુપ્રીમ કોર્ટનો સંપર્ક કર્યો હતો.

પંજાબ અને હરિયાણા હાઈકોર્ટે શું કહ્યું?

પંજાબ અને હરિયાણા હાઈકોર્ટે પોતાના આદેશમાં કહ્યું હતું કે જ્યારે શંભુમાં સ્થિતિ શાંતિપૂર્ણ છે તો ખેડૂતોને આગળ વધતા રોકવાનો કોઈ અર્થ નથી. કેન્દ્ર સરકાર પાસે માંગણી કરવામાં આવી રહી છે અને તેમને જવા દેવા જોઈએ. હરિયાણા સરકારે સુનાવણી દરમિયાન કોર્ટને જણાવ્યું હતું કે બેરિકેડ્સને હટાવવાથી ખેડૂતો માટે રાજ્યમાં પ્રવેશવું અને એસપી ઓફિસનો ઘેરાવ કરવો સરળ બનશે. ન્યાયાધીશોએ કહ્યું કે વિરોધ કરવો એ લોકતાંત્રિક અધિકાર છે અને ખેડૂતોને હરિયાણામાં પ્રવેશતા અટકાવી શકાય નહીં. હાઈકોર્ટની બેન્ચે પંજાબ અને હરિયાણા સરકારને હાઈવેના પુનઃસ્થાપન દરમિયાન કાયદો અને વ્યવસ્થા જાળવવા માટે પણ નિર્દેશ આપ્યો હતો.

શંભુ બોર્ડર પાંચ મહિનાથી બંધ

જણાવી દઈએ કે, ખેડૂતોએ પાંચ મહિના પહેલા દિલ્હી કૂચની જાહેરાત કરી ત્યારથી શંભુ બોર્ડર બંધ કરી દેવાઈ હતી. પંજાબ અને હરિયાણાની સરહદને અલગ કરતી શંભુ સરહદ પર હરિયાણા પોલીસે 7 લેવલનું બેરિકેડિંગ કરી દેવામાં આવ્યું છે. ખેડૂતોના વિરોધને ધ્યાનમાં રાખીને શંભુ બોર્ડરના વેપારીઓએ બોર્ડર ખોલવા અંગે હાઇકોર્ટનો સંપર્ક કર્યો હતો. પંજાબના વિવિધ વિસ્તારોમાંથી અંદાજે 400 ખેડૂતો હજુ પણ શંભુ બોર્ડર પર પડાવ નાખીને રહ્યા છે. ખેડૂત સંગઠનોએ હજુ સુધી નક્કી કર્યું નથી કે તેઓ તેમની કૂચ ક્યારે શરૂ કરશે. આ અઠવાડિયે શંભુ બોર્ડર ખાતે ખેડૂત સંગઠનોની બેઠક યોજાવાની હતી.

કિસાન મઝદૂર મોરચા (KMM) અને સંયુક્ત કિસાન મોરચા (બિન-રાજકીય) દ્વારા શંભુ સરહદ પર વિરોધ પ્રદર્શન કરવામાં આવી રહ્યું છે. ખેડૂતોએ ત્રણ પ્રદર્શનકારીઓને મુક્ત કરવાની માંગ સાથે શંભુ રેલ્વે સ્ટેશનને જામ કર્યું હતું. એ પછી તેને ખાલી કરાવાયું હતું. ખેડૂત સંગઠનોની માંગમાં બે ડઝન પાક માટે લઘુત્તમ ટેકાના ભાવની ગેરંટી, વૃદ્ધ ખેડૂતો અને મજૂરો માટે માસિક પેન્શન અને લોન માફીનો સમાવેશ થાય છે.