"અમારી અરજી ફગાવી નથી, નોટિસ મોકલી છે!" ડી. રાજાનો દાવો: હવે ચૂંટણી પંચે સુપ્રીમ કોર્ટમાં આપવો પડશે જવાબ!

નવી દિલ્હી ખાતે ઈન્ડિયા (INDIA) ગઠબંધન દ્વારા એસઆઈઆર (SIR) પ્રક્રિયા અને મતદાર યાદીમાંથી મોટા પાયે નામો કાઢી નાખવાના કથિત આક્ષેપો સામે દાખલ કરાયેલી અરજી પર સુપ્રીમ કોર્ટે મહત્વનું પગલું ભર્યું છે. આ મામલે સીપીઆઈ (CPI) ના જનરલ સેક્રેટરી ડી. રાજાએ મહત્વનું નિવેદન આપતા જણાવ્યું કે સુપ્રીમ કોર્ટે તેમની અરજીને ફગાવી નથી, પરંતુ સ્વીકારીને ચૂંટણી પંચ અને ચૂંટણી કમિશનરોને નોટિસ પાઠવી છે.

ડી. રાજાએ જણાવ્યું કે, "હવે જોવાનું એ રહે છે કે કાયદો આ બાબતે આગળ કઈ દિશા પકડે છે અને ચૂંટણી પંચ સુપ્રીમ કોર્ટને શું જવાબ રજૂ કરે છે. ચૂંટણી પ્રક્રિયા અને મતદાર યાદીની પારદર્શિતા સામે અનેક ગંભીર પ્રશ્નો ઊભા થયા છે, જેને ઈન્ડિયા ગઠબંધનના તમામ પક્ષોએ રાષ્ટ્રીય સ્તરે ઉઠાવ્યા છે."

તેમણે ઉમેર્યું હતું કે સામાન્ય જનતા અને દેશના નાગરિકો માટે તેમના લોકશાહી અધિકારોનું રક્ષણ કરવા માટે ન્યાયતંત્ર જ આખરી આશા છે, અને એટલા માટે જ તેઓ ન્યાય મેળવવા માટે સુપ્રીમ કોર્ટના દ્વારે પહોંચ્યા છે.