"જ્ઞાનેશ કુમારે જવું જ પડશે": ચૂંટણી પંચને સુપ્રીમ કોર્ટની નોટિસ બાદ TMC સાંસદ કલ્યાણ બેનર્જીનો મોટો હુમલો

પશ્ચિમ બંગાળના કોલકાતા ખાતે તૃણમૂલ કોંગ્રેસ (TMC - મમતા બેનર્જી જૂથ) ના વરિષ્ઠ નેતા અને સાંસદ કલ્યાણ બેનર્જીએ સ્પેશિયલ ઈન્ટેન્સિવ રિવિઝન (SIR) અને મતદાર યાદીમાંથી કથિત નામ કમી કરવા સામે વિપક્ષી ઈન્ડિયા ગઠબંધનની અરજી પર સુપ્રીમ કોર્ટ દ્વારા પાઠવવામાં આવેલી નોટિસનું સ્વાગત કર્યું છે. તેમણે મુખ્ય ચૂંટણી કમિશનર જ્ઞાનેશ કુમાર સામે સીધો મોરચો ખોલતા જણાવ્યું કે, તેમના પદ પરથી હટવાની ઘડીઓ હવે ગણાઈ રહી છે.

કલ્યાણ બેનર્જીએ પ્રતિક્રિયા આપતાં જણાવ્યું હતું કે, "તે ખૂબ જ સારી બાબત છે કે સુપ્રીમ કોર્ટે ચૂંટણી પંચને નોટિસ પાઠવી છે. અમે લાંબા સમયથી જે મુદ્દાઓ અને ગેરરીતિઓ સામે અવાજ ઉઠાવી રહ્યા હતા, તેને દેશની સર્વોચ્ચ અદાલતે ધ્યાને લીધા છે અને માન્યતા આપી છે."

મુખ્ય ચૂંટણી કમિશનર પર સીધો પ્રહાર કરતાં તેમણે વધુમાં કહ્યું કે, "જ્ઞાનેશ કુમારે જે પ્રકારની મનમાની અને નિર્ણયો લીધા છે તે જોતાં હવે તેમણે જવું જ પડશે." ઉલ્લેખનીય છે કે, વિપક્ષી ગઠબંધન દ્વારા ચૂંટણી પંચની કાર્યપ્રણાલી અને મતદાર યાદીમાં ફેરફાર સામે સતત દેશવ્યાપી આંદોલન ચલાવવામાં આવી રહ્યું છે, ત્યારે સુપ્રીમ કોર્ટના આ વલણથી વિપક્ષને મોટું રાજકીય અને કાનૂની બળ મળ્યું છે.