રશિયન પ્રમુખ મોસ્કો જવા રવાના, એરપોર્ટ પર વિદેશમંત્રી જયશંકર સહિત ઉચ્ચ અધિકારીઓ રહ્યા ઉપસ્થિત

આજે રશિયાના રાષ્ટ્રપતિ વ્લાદિમીર પુતિનના ભારત પ્રવાસનો બીજો દિવસ હતો. કાર્યક્રમના ભાગરૂપે, રશિયન રાષ્ટ્રપતિ આજે રાષ્ટ્રપતિ ભવન પહોંચ્યા હતા. ત્યાં તેમનું ઔપચારિક સ્વાગત કરવામાં આવ્યું હતું. ત્યારબાદ પુતિનના સન્માનમાં રાત્રિભોજનનું આયોજન કરવામાં આવ્યું હતું. રાષ્ટ્રપતિ દ્રૌપદી મુર્મુ દ્વારા આયોજિત આ રાત્રિભોજનમાં પીએમ મોદી સહિત અનેક મહાનુભાવોએ હાજરી આપી હતી. રાત્રિ   ભોજન પછી, પુતિન મોસ્કો જવા રવાના થયા હતા. જ્યાં એરપોર્ટ પર વિદેશમંત્રી એસ.જયશંકર સહિતના અધિકારીઓ ઉપસ્થિત હતા. 

રશિયાના પ્રમુખ વ્લાદિમીર પુતિનની ભારત મુલાકાત દરમિયાન વડાપ્રધાન નરેન્દ્ર મોદી અને પુતિને સંયુક્ત પત્રકાર પરિષદ યોજીને દ્વિપક્ષીય સહયોગને મજબૂત બનાવવા માટે 7 મહત્ત્વપૂર્ણ કરારો પર હસ્તાક્ષરની જાહેરાત કરી હતી. આ કરારોમાં પ્રવાસન, હેલ્થકેયર, ખાદ્ય સુરક્ષા, યુરિયા ઉત્પાદન જેવા ક્ષેત્રોને આવરી લેવામાં આવ્યા છે.

બંને દેશો વચ્ચે થયા આ કરાર

•કોઑપરેશન અને માઇગ્રેશન એગ્રીમેન્ટ

•અસ્થાયી શ્રમિક ગતિવિધિ પર કરાર

•હેલ્થકેર અને મેડિકલ એજ્યુકેશન પર કરાર

•ફૂડ સેફ્ટી અને સ્ટાન્ડર્ડ્સ પર કરાર

•પોલર શિપ (Polar Ship) પર કરાર

•મેરિટાઇમ કોઑપરેશન પર કરાર

•ફર્ટિલાઇઝર (ખાતરો) પર કરાર

યુરિયા ઉત્પાદનમાં આત્મનિર્ભરતા તરફ

ફર્ટિલાઇઝર અંગેના કરારને ભારત માટે મોટો ફાયદો માનવામાં આવે છે. આ કરાર હેઠળ, ભારત અને રશિયા સંયુક્ત રીતે યુરિયાનું ઉત્પાદન કરશે.ભારત હાલમાં રશિયાથી મોટા પાયે યુરિયાની આયાત કરે છે. સંયુક્ત ઉત્પાદન શરૂ થવાથી ભારતને યુરિયાની આયાત પરની નિર્ભરતા ઘટાડવામાં મદદ મળશે.

ભારતીય શ્રમિકો અને રશિયનોને લાભ

ભારતીય શ્રમિકો માટે આ કરાર ખૂબ સારા સમાચાર છે. આનાથી ભારતીય શ્રમિકો વ્યવસ્થિત રીતે રશિયા મુસાફરી કરી શકશે અને વધુ સારા પગાર મેળવી શકશે. યુરોપિયન દેશોમાં નિયમો કડક થતાં આ કરાર મહત્ત્વપૂર્ણ બન્યો છે. વડાપ્રધાન મોદીએ રશિયાના લોકો માટે એક મહત્ત્વપૂર્ણ જાહેરાત કરી કે ભારતે રશિયનો માટે મફત ઇ-ટૂરિસ્ટ વિઝા શરૂ કર્યા છે, જે 30 દિવસ માટે માન્ય રહેશે. નોંધનીય છે કે, કેનેડા અને યુકે જેવા યુરોપિયન દેશોમાં વધતા કડક સ્થળાંતર નિયમો વચ્ચે આ કરાર રાહત પૂરી પાડે છે.