અખિલેશના સાવકા ભાઈએ પત્નીને છૂટાછેડા આપવાનો ઈરાદો કર્યો જાહેર

સમાજવાદી પાર્ટીના નેતા મુલાયમ સિંહ યાદવના પરિવારમાં વિવાદ સામે આવ્યો છે. તેમના પુત્ર પ્રતીક યાદવે પત્ની અપર્ણા યાદવને છૂટાછેડા આપવાનો ઇરાદો જાહેર કર્યો છે.

સમાજવાદી પાર્ટીના દિવંગત નેતા મુલાયમ સિંહ યાદવના પુત્ર પ્રતીક યાદવે તેમની પત્ની અપર્ણા યાદવને છૂટાછેડા આપવાનો ઇરાદો જાહેર કર્યો છે. નોંધનીય છે કે પ્રતીક યાદવ મુલાયમ સિંહ યાદવ અને તેમની બીજી પત્ની સાધના ગુપ્તાનો પુત્ર છે. તેઓ સમાજવાદી પાર્ટીના વડા અખિલેશ યાદવના સાવકા ભાઈ છે.  અપર્ણા યાદવે સમાજવાદી પાર્ટીના રાજકારણથી દૂર રહીને ભાજપમાં જોડાયા હતા અને હાલમાં તેઓ ભાજપના નેતા છે.

પ્રતીક યાદવે સોશિયલ મીડિયા પર કરી પોસ્ટ

પ્રતીક યાદવે પોતાના ઇન્સ્ટાગ્રામ હેન્ડલ પર અપર્ણા યાદવનો ફોટો પોસ્ટ કરતા લખ્યું કે, "હું આ સ્વાર્થી સ્ત્રીને શક્ય તેટલી વહેલી તકે છૂટાછેડા આપવાનો છું. તેણે મારા પારિવારિક સંબંધો બગાડ્યા છે. તે ફક્ત પ્રખ્યાત અને પ્રભાવશાળી બનવા માંગે છે. અત્યારે મારી માનસિક સ્થિતિ ખૂબ જ ખરાબ છે. પરંતુ તેને તેની કંઈ પડી નથી. તે ફક્ત પોતાની જ ચિંતા કરે છે. મેં ક્યારેય આવી દુષ્ટ આત્મા જોઈ નથી, અને મારું દુર્ભાગ્ય હતું કે મેં તેની સાથે લગ્ન કર્યા."

પ્રતિક સક્રિય રાજકારણમાં નથી, અપર્ણાનું વલણ સંપૂર્ણપણે તેનાથી વિરુદ્ધ છે. પ્રતિક યાદવ સપાના વડા અખિલેશ યાદવના સાવકા ભાઈ છે, પરંતુ તે હંમેશા સક્રિય રાજકારણથી દૂર રહ્યા છે. તે મુખ્યત્વે વ્યવસાયમાં વ્યસ્ત રહે છે અને ઉચ્ચ પ્રોફાઇલ જીવન જીવે છે. તે ઘણીવાર તેના કાર સંગ્રહને લઈને લાઈમલાઈટમાં રહે છે. તે અનેક લક્ઝરી કારનો કાફલો ધરાવે છે.  તેનાથી વિપરીત અપર્ણા યાદવ રાજકારણમાં સક્રિય રીતે સામેલ છે અને ભાજપ નેતા છે. તેણીએ ચૂંટણી પણ લડી છે. અપર્ણા યાદવ ઉત્તર પ્રદેશ રાજ્ય મહિલા આયોગના વર્તમાન ઉપાધ્યક્ષ પણ છે.

જણાવી દઈએ કે અપર્ણા યાદવ તરફથી પ્રતીક યાદવની સોશિયલ મીડિયા પોસ્ટ પર કોઈ પ્રતિક્રિયા આવી નથી. પ્રતીક અને અપર્ણાને એક પુત્રી પણ છે.