IRCTCના CMD સંજય જૈનનું અચાનક રાજીનામું: નિવૃત્તિના 6 મહિના પહેલાં પદ છોડતા રેલવે તંત્રમાં ભારે ચર્ચા

રેલવે મંત્રાલય (Ministry of Railways) હેઠળ આવતી જાહેર ક્ષેત્રની નફાકારક કંપની ઇન્ડિયન રેલવે કેટરિંગ એન્ડ ટૂરિઝમ કોર્પોરેશન (IRCTC)માંથી એક મોટા સમાચાર સામે આવી રહ્યા છે. IRCTCના ચેરમેન અને મેનેજિંગ ડિરેક્ટર સંજય કુમાર જૈને પોતાના પદ પરથી અચાનક રાજીનામું આપી દીધું છે. મહત્વની વાત એ છે કે તેઓ નિવૃત્ત થવાના આશરે છ મહિના પહેલાં જ પદ છોડી રહ્યા છે. રેલવે મંત્રાલય દ્વારા તેમનું રાજીનામું સ્વીકારી લેવામાં આવ્યું છે અને તેઓ આગામી 20 જુલાઈ 2026ના રોજ પોતાના પદ પરથી મુક્ત થઈ જશે.

રાજીનામું આપવા પાછળનું અસલી કારણ શું? સસ્પેન્સ વધ્યું

સત્તાવાર અહેવાલો અનુસાર, સંજય જૈને અંગત કારણોસર પોતાના પદ પરથી રાજીનામું આપ્યું હોવાનું જણાવ્યું છે. જોકે, આ અચાનક લેવાયેલા નિર્ણય પાછળ મીડિયા વર્તુળોમાં અલગ જ ચર્ચા ચાલી રહી છે.

કેટલાક મીડિયા રિપોર્ટ્સમાં એવો સનસનાટીભર્યો દાવો કરવામાં આવી રહ્યો છે કે સંજય જૈન પાસેથી બળજબરીપૂર્વક (જબરન) રાજીનામું લેવામાં આવ્યું છે. આ રિપોર્ટ્સ અનુસાર, તેમને વહીવટી સ્તરે કંઈક એવું કામ કરવા માટે કહેવામાં આવ્યું હતું, જે પક્ષે કે નિયમો અનુસાર તેમને મંજૂર નહોતું. આ આંતરિક મતભેદો બાદ તેમણે પદ છોડવાનો નિર્ણય કર્યો હોવાની આશંકા છે. સંજય જૈનનો અસલી કાર્યકાળ 31 ડિસેમ્બર 2026 સુધીનો હતો, પરંતુ તે પૂરો થાય તે પહેલાં જ મંત્રાલયે તેમનું રાજીનામું સ્વીકારી લીધું છે.

કોણ છે સંજય કુમાર જૈન?
 સંજય કુમાર જૈન ઇન્ડિયન રેલવે ટ્રાફિક સર્વિસ (IRTS)ના 1990 બેચના અત્યંત અનુભવી અને વરિષ્ઠ અધિકારી છે. IRCTCના સીએમડીનું સર્વોચ્ચ પદ સંભાળતા પહેલાં તેઓ નોર્થ રેલવેમાં પ્રિન્સિપલ ચીફ કોમર્શિયલ મેનેજર તરીકે જવાબદારી નિભાવી ચૂક્યા છે. તેઓ વહીવટી ક્ષેત્રના અનુભવ સાથે એક ક્વોલિફાઇડ ચાર્ટર્ડ એકાઉન્ટન્ટ (CA) પણ છે.

તેઓ મૂળ બિહારના ભાગલપુરના વતની છે અને તેમનો પરિવાર બિઝનેસ બેકગ્રાઉન્ડ ધરાવે છે. તેમનો પ્રારંભિક અભ્યાસ ભાગલપુરમાં થયો હતો અને સીએની ડિગ્રી મેળવવા માટે તેઓ થોડા વર્ષો કોલકાતામાં પણ રહ્યા હતા. રેલવેના આટલા મોટા અને સક્ષમ અધિકારી દ્વારા નિવૃત્તિના ગણતરીના મહિનાઓ બાકી હોય ત્યારે અચાનક પદ છોડવું અને રેલવે મંત્રાલયે પણ તેને તાત્કાલિક મંજૂરી આપી દેતા આ મામલો હવે બિઝનેસ અને રાજકીય વર્તુળોમાં ભારે ચર્ચાનો વિષય બન્યો છે.