'ભારતના નિયમ માનવા જ પડશે',એલન મસ્કના Xને મોટો ઝટકો; હાઇકોર્ટે અરજી ફગાવી

સોશિયલ મીડિયા પ્લેટફોર્મ Xને કર્ણાટક હાઇકોર્ટને ઝટકો આપ્યો છે. કેન્દ્ર સરકારના ટેકડાઉન ઓર્ડરને પડકારતી Xની અરજીને કોર્ટે ફગાવી દીધી છે. કોર્ટે કહ્યું કે સોશિયલ મીડિયા પ્લેટફોર્મ્સે ભારતમાં કામ કરવા માટે અહીં કાયદાનું પાલન કરવું જ પડશે.

કેન્દ્ર સરકારે Xને કેટલાક એકાઉન્ટ અને પોસ્ટ બ્લૉક કરવાનો આદેશ આપ્યો હતો પરંતુ એલન મસ્કની કંપનીએ તેને પડકારતા કર્ણાટક હાઇકોર્ટનો દરવાજો ખખડાવ્યો હતો. X તરફથી કોર્ટમાં કહેવામાં આવ્યું કે તે અમેરિકન કાયદા હેઠળ કામ કરે છે અને તેને અભિવ્યક્તિની આઝાદીનો અધિકાર છે, આ કારણે ભારત સરકારના ટેકડાઉનના આદેશોનું પાલન કરવાની જરૂર નથી.

જવાબમાં સરકાર તરફથી કહેવામાં આવ્યું કે આર્ટિકલ 19 (2) માત્ર ભારતીય નાગરિકો માટે અભિવ્યક્તિની સ્વતંત્રતાની ગેરંટી આપે છે ના કે વિદેશી કંપનીઓ કે ગૈર નાગરિકોને. કેન્દ્ર તરફથી કહેવામાં આવ્યું કે સોશિયલ મીડિયા પ્લેટફોર્મે દેશના કાયદા અને નિયમનું પાલન કરવું જ પડશે.

કર્ણાટક હાઇકોર્ટે કહ્યું કે આજના સમયમાં સોશિયલ મીડિયા રેગ્યુલેશનની જરૂર છે અને કંપનીઓને નિયંત્રણ વગર કામ કરવાની પરવાનગી ના આપી શકાય. જસ્ટિસ એમ.નાગપ્રસન્નાની પીઠે ચુકાદો સંભળાવતા કહ્યું, "સૂચના અને સંચારને ક્યારેય પણ રેગ્યુલેશન વગર ના છોડી શકાય. જેમ જેમ ટેકનિક આગળ વધી છે નિયંત્રણ અને રેગ્યુલેશન પણ લાગુ થયા છે."

કોર્ટે કહ્યું, "ન્યાયિક સુરક્ષા મેળવવા માંગતા કોઈપણ નાગરિક રાષ્ટ્રનો નાગરિક હોવો જોઈએ. સહાય પોર્ટલ નાગરિકો અને મધ્યસ્થીઓ વચ્ચેના સહકારનું પ્રતીક છે, તેથી આ પડકારનું કોઈ વાજબીપણું નથી. સોશિયલ મીડિયાને અરાજક સ્વતંત્રતા પર છોડી શકાય નહીં. દરેક સાર્વભૌમ રાષ્ટ્ર સોશિયલ મીડિયાનું નિયમન કરે છે. કોઈપણ પ્લેટફોર્મ ભારતીય બજારને ફક્ત રમતના મેદાન તરીકે ચલાવી શકે નહીં."