'મને PM પદની ઓફર કરવામાં આવી હતી...' નીતિન ગડકરીનો દેશના મોટા નેતાએ કર્યો હતો સંપર્ક

કેન્દ્રીય મંત્રી નીતિન ગડકરીએ શનિવારે એક મોટું નિવેદન આપતા કહ્યું હતું કે જો તેઓ વડાપ્રધાન પદની રેસમાં સામેલ થાય તો એક રાજનેતાએ તેમને સમર્થનની ઓફર કરી હતી, પરંતુ તેમણે આ ઓફરને એમ કહીને ફગાવી દીધી હતી કે તેમની પાસે આવી કોઈ મહત્વાકાંક્ષા નથી.

નાગપુરમાં એક કાર્યક્રમમાં ગડકરીએ કહ્યું, 'મને એક ઘટના યાદ છે... હું કોઈનું નામ નહીં લઉં. વ્યક્તિએ કહ્યું હતું કે, 'જો તમે વડાપ્રધાન બનવાના છો તો અમે તમને સમર્થન આપીશું.' જોકે, આ વાતચીત ક્યારે થઈ તે તેણે જણાવ્યું નથી.

નાગપુરમાં પત્રકારોને સન્માનિત કરવા માટે આયોજિત એક કાર્યક્રમમાં ભાગ લઈ રહેલા નીતિન ગડકરીએ કહ્યું, 'મને કોઈએ કહ્યું કે જો તમે વડાપ્રધાન બનો તો અમે તમને સમર્થન આપીશું, મેં કહ્યું કે તમે મને કેમ સમર્થન કરશો અને હું તમારૂ સમર્થન કેમ લઈશ? વડા પ્રધાન બનવું એ મારા જીવનનું લક્ષ્ય નથી. હું મારા મૂલ્યો અને મારા સંગઠનને વફાદાર છું... હું કોઈપણ પદ માટે સમાધાન કરતો નથી. આ મૂલ્ય ભારતીય લોકશાહીનો આધાર છે.

2024 અને 2019ની લોકસભા ચૂંટણી દરમિયાન નીતિન ગડકરીનું નામ વડાપ્રધાન પદના સંભવિત ઉમેદવાર તરીકે ચર્ચામાં આવ્યું હતું. આ વર્ષે ફેબ્રુઆરીમાં સામાન્ય ચૂંટણીઓ પહેલા એક સર્વેમાં, કેન્દ્રીય ગૃહ પ્રધાન અમિત શાહ અને ઉત્તર પ્રદેશના મુખ્ય પ્રધાન યોગી આદિત્યનાથ પછી ગડકરીને નરેન્દ્ર મોદીના સ્થાને સૌથી યોગ્ય નેતા તરીકે ત્રીજું સ્થાન આપવામાં આવ્યું હતું. 

2019માં પણ પીએમ પદ માટે નામ ઉછળ્યું હતું

જ્યારે 2019માં પણ આવી જ ચર્ચાઓ થઈ હતી, ત્યારે ગડકરીએ તેમને ફગાવી દીધા હતા. 2019માં ગડકરીએ કહ્યું હતું કે, "ભારતના વડાપ્રધાનનું પદ નરેન્દ્ર મોદીના સક્ષમ હાથમાં છે. અમે બધા તેમની (PM મોદી) પાછળ છીએ. તેમના વિઝનને સાકાર કરવામાં હું એક અન્ય કાર્યકર છું. મારા PM બનવાનો પ્રશ્ન જ ક્યાં છે?"  હું પીએમ બનવાની રેસમાં નથી.

ગડકરી, જેમણે ત્રણ વખત નાગપુર લોકસભા સીટ જીતી છે, તે ભાજપમાં એક અગ્રણી વ્યક્તિ છે અને તેમને આરએસએસનું મજબૂત સમર્થન છે. તેઓ હાલમાં સૌથી લાંબા સમય સુધી રોડ ટ્રાન્સપોર્ટ અને હાઇવેના કેન્દ્રીય મંત્રી છે, જેમણે દસ વર્ષથી વધુ સમય સુધી આ પદ સંભાળ્યું છે. તેઓ 2009 થી 2013 સુધી ભાજપના રાષ્ટ્રીય અધ્યક્ષ તરીકે પણ રહી ચૂક્યા છે.