"કેમેરા સામે આવવાના ઉત્સાહમાં...", ફજેતી બાદ Galgotias યુનિવર્સિટીએ પ્રોફેસર પર ફોડ્યું ઠિકરું

ગ્રેટર નોઇડામાં Galgotias યુનિવર્સિટી એક પછી એક વિવાદમાં ફસાઈ છે. રોબોડોગથી લઈને ફૂટબોલ ડ્રોન, Galgotias યુનિવર્સિટી ઉપર સવાલો પેદા કરી દીધા છે. યુનિવર્સિટી પ્રશાસને હવે યુનિવર્સિટીના પ્રોફેસર નેહા સિંહ દ્વારા આપવામાં આવેલા નિવેદનો મુદ્દે નિવેદન જારી કર્યું છે.

યુનિવર્સિટીએ ચીની કંપનીના રોબોટિક ડોગને લગતી મૂંઝવણ માટે માફી માંગતું નિવેદન આપ્યું છે. યુનિવર્સિટીએ જણાવ્યું છે કે કેમેરા સામે આવવાના ઉત્સાહમાં તેમના પ્રતિનિધિએ હકીકતમાં ખોટી માહિતી પૂરી પાડી હતી.

ગ્રેટર નોઈડા સ્થિત યુનિવર્સિટી પર AI સમિટમાં ચીનથી આયાત કરાયેલ ઉપકરણ રજૂ કરવાનો આરોપ મૂકવામાં આવ્યો છે, જેમાં દાવો કરવામાં આવ્યો છે કે તે તેની પોતાની શોધ છે. યુનિવર્સિટીએ સ્પષ્ટતા કરી છે કે મીડિયા સાથે વાત કરનાર સ્ટાફ સભ્ય વિગતોથી અજાણ હતા અને તેમને પ્રેસ સાથે વાત કરવાનો અધિકાર નહોતો.

18 ફેબ્રુઆરીના રોજ જારી કરાયેલ એક પ્રેસ રિલીઝમાં યુનિવર્સિટીએ જણાવ્યું હતું કે, "અમે Galgotias યુનિવર્સિટી તાજેતરના AI સમિટમાં થયેલી મૂંઝવણ માટે દિલથી માફી માંગીએ છીએ." અમારા સ્ટોલ ઉપર હાજર રહેલા એક પ્રતિનિધિ પાસે આ બાબત અંગે પૂરતી માહિતીનો અભાવ હતો. તેઓ ઉત્પાદનના ટેકનિકલ મૂળથી અજાણ હતા અને કેમેરા સામે રહેવાના ઉત્સાહમાં મીડિયા સાથે વાત કરવાનો અધિકાર ન હોવા છતાં તેમણે હકીકતમાં ખોટું નિવેદન આપ્યું.

જણાવી દઈએ કે, સોશિયલ મીડિયા પર એક વીડિયો વાયરલ થતાં વિવાદ શરૂ થયો. તેમાં દાવો કરવામાં આવ્યો હતો કે યુનિવર્સિટીના પ્રોફેસર નેહા સિંહે સમિટમાં ઓરિયન નામનો રોબોટિક ડોગ રજૂ કરતાં દાવો કર્યો હતો કે, તેમની યુનિવર્સિટીનું ઉત્પાદન છે. જોકે રોબોટ વાસ્તવમાં ચીની કંપની યુનિટ્રી દ્વારા ઉત્પાદિત AI-સંચાલિત યુનિટ્રી Go2 હતો. આ ઉપકરણ લગભગ US$2,800 (આશરે રૂ. 2.3 લાખ) માં ઓનલાઈન ઉપલબ્ધ છે.

ઘણા સોશિયલ મીડિયા યુઝર્સે આરોપ લગાવ્યો હતો કે આ ઉપકરણને સ્વદેશી રીતે વિકસિત ઉત્પાદન તરીકે રજૂ કરવામાં આવ્યું હતું. અગાઉ, X પર પ્રકાશિત એક નિવેદનમાં યુનિવર્સિટીએ જણાવ્યું હતું કે રોબોટ યુનિટ્રી પાસેથી ખરીદવામાં આવ્યો હતો અને તેનો ઉપયોગ શિક્ષણ સાધન તરીકે કરવામાં આવી રહ્યો હતો.
 
નિવેદનમાં કહેવામાં આવ્યું છે કે, "તાજેતરમાં યુનિટ્રી પાસેથી ખરીદેલ રોબોડોગ આ સફરમાં એક પગલું છે. તે હાલતો ચાલતો વર્ગખંડ છે. અમારા વિદ્યાર્થીઓ તેનો પ્રયોગ કરી રહ્યા છે, તેની મર્યાદાઓનું પરીક્ષણ કરીને તેમના જ્ઞાનમાં વધારો કરી રહ્યા છે. અમે સ્પષ્ટ કરવા માંગીએ છીએ કે Galgotias યુનિવર્સિટીએ આ રોબોડોગ બનાવ્યો નથી, અને ન તો અમે ક્યારેય દાવો કર્યો છે.

સમિટમાંથી ખસી જવા અંગે વિવાદ

સરકારી સૂત્રોએ દાવો કર્યો હતો કે, વિવાદ બાદ Galgotias યુનિવર્સિટીને એઆઈ સમિટમાંથી ખસી જવાનું કહેવામાં આવ્યું હતું. જોકે, સંસ્થાએ આ વાતનો ઇનકાર કરતા કહ્યું કે તેને સરકાર તરફથી આવી કોઈ સૂચના મળી નથી.

તાજેતરના એક પ્રેસ નિવેદનમાં, યુનિવર્સિટીએ કહ્યું કે તેણે આયોજકોની લાગણીઓને માન આપીને, જાતે જ સ્થળ ખાલી કર્યું છે. નિવેદનમાં કહેવામાં આવ્યું છે કે, "આયોજકોની લાગણીઓને સમજીને, અમે જાતે જ કેમ્પસ ખાલી કર્યો છે.