દિલ્હી જિમખાના ક્લબ વિવાદ: 'જબરદસ્તી નહીં, કાયદાકીય પ્રક્રિયાથી જ ખાલી કરાવીશું' - કેન્દ્ર સરકાર

દિલ્હી હાઈકોર્ટમાં આજે દિલ્હી જિમખાના ક્લબ સાથે જોડાયેલા એ મામલાની સુનાવણી થઈ જેમાં કેન્દ્ર સરકાર દ્વારા 5 જૂન સુધીમાં જિમખાના ક્લબ ખાલી કરવાના આદેશને પડકારવામાં આવ્યો છે. આ અંગે એક અરજી ક્લબના જૂના સભ્ય વિજય ખુરાના દ્વારા દાખલ કરવામાં આવી છે, જ્યારે બીજી અરજી દિલ્હી જિમખાનાના સ્ટાફ વેલ્ફેર એસોસિએશન તરફથી ફાઈલ કરાઈ છે. કેન્દ્ર સરકારે લ્યુટિયન્સ દિલ્હીમાં આવેલ દિલ્હી જિમખાના ક્લબ 5 જૂન સુધીમાં સરકારને સોંપી દેવા જણાવ્યું છે. સરકારે કહ્યું છે કે 27.3 એકરનો આ પ્લોટ ‘ડિફેન્સ ઇન્ફ્રાસ્ટ્રક્ચરને મજબૂત અને સુરક્ષિત કરવા’ માટે અત્યંત જરૂરી છે.

કેન્દ્ર સરકાર વતી હાજર રહેલા સોલિસિટર જનરલ તુષાર મહેતાએ હાઈકોર્ટમાં સુનાવણી દરમિયાન જણાવ્યું હતું કે, કલમ-4 (ક્લોઝ-4) હેઠળ એક એવી વ્યવસ્થા આપવામાં આવી છે જેના આધારે અમે લીઝ સમાપ્ત કરી શકીએ છીએ. આ અંતર્ગત તેમને સરકાર દ્વારા આર્થિક વળતર અથવા જમીનનો બીજો ટુકડો પણ આપી શકાય છે.

તુષાર મહેતાએ હાઈકોર્ટને જણાવ્યું કે, કેન્દ્ર સરકારે ક્લબને 5 જૂન સુધીમાં સ્વેચ્છાએ જગ્યા ખાલી કરવાની નોટિસ આપી છે. જો તેઓ સ્વેચ્છાએ ખાલી નહીં કરે, તો એવું નથી કે પોલીસ તાત્કાલિક ત્યાં ધસી જશે અને કેન્દ્ર સરકાર જબરદસ્તી ક્લબના પરિસર પર કબજો મેળવી લેશે. તેમણે આગળ કહ્યું કે, કબજો કાયદાની પ્રક્રિયા મુજબ જ લેવામાં આવશે. અમે સીધા જઈને તેને ખાલી કરાવી શકીએ નહીં. અમે નક્કી કરેલી કાનૂની પ્રક્રિયા અનુસાર જ કબજો લઈશું, તેના સિવાય નહીં. આ પ્રક્રિયા 5 તારીખે જ પૂરી ન થઈ શકે, કારણ કે અમારે નોટિસ વગેરે ઈશ્યૂ કરવી પડશે.

'નોટિસ કે સુનાવણી વિના જ આપી દીધો આદેશ'

આ દલીલ પર ક્લબના સભ્ય વિજય ખુરાના વતી હાજર રહેલા વરિષ્ઠ વકીલ અભિષેક મનુ સિંઘવીએ હાઈકોર્ટને વિનંતી કરી હતી કે, તેઓ કેન્દ્રને નોટિસ આપ્યા વિના કોઈ પણ આગામી કાર્યવાહી ન કરવાનો નિર્દેશ આપે. સિંઘવીએ આક્ષેપ કર્યો હતો કે કોઈ પણ નોટિસ આપ્યા વિના કે સુનાવણીની તક આપ્યા વિના જ આ આદેશ પસાર કરી દેવામાં આવ્યો હતો.

બીજી તરફ, દિલ્હી જિમખાના ક્લબની અગાઉની ચૂંટાયેલી સંસ્થા વતી હાજર રહેલા વરિષ્ઠ વકીલ કપિલ સિબ્બલે જણાવ્યું હતું કે ક્લોઝ-4 બંધારણ બન્યા પહેલા જ ઉમેરવામાં આવ્યો હતો. તેમણે કહ્યું કે સરકાર આવો આદેશ પસાર ન કરી શકે અને આ આદેશ બંધારણની કલમ 14ની વિરુદ્ધ છે. કેન્દ્રીય આવાસ અને શહેરી બાબતોના મંત્રાલય હેઠળની લેન્ડ એન્ડ ડેવલપમેન્ટ ઓફિસ દ્વારા જારી કરાયેલા આદેશમાં જણાવાયું છે કે, દિલ્હીના અત્યંત સંવેદનશીલ અને વ્યૂહાત્મક રીતે મહત્વપૂર્ણ વિસ્તારમાં આવેલું જિમખાના ક્લબ પરિસર ડિફેન્સ સ્ટ્રક્ચરને મજબૂત અને સુરક્ષિત કરવા તેમજ જાહેર સુરક્ષા સાથે જોડાયેલા અન્ય મહત્વના ઉદ્દેશ્યો માટે ખૂબ જ જરૂરી છે. આદેશ અનુસાર, લેન્ડ એન્ડ ડેવલપમેન્ટ ઓફિસ 5 જૂને આ પરિસરનો કબજો મેળવશે.

100 વર્ષથી વધુ જૂની છે આ ક્લબ

નોંધનીય છે કે, લ્યુટિયન્સ દિલ્હીની મધ્યમાં આવેલી વિશાળ દિલ્હી જિમખાના ક્લબ લોક કલ્યાણ માર્ગ પર વડાપ્રધાન આવાસની બિલકુલ નજીક આવેલી છે. દિલ્હી જિમખાના ક્લબ રાજધાનીની સૌથી કિંમતી અને વ્યૂહાત્મક રીતે મહત્વપૂર્ણ જમીનો પર આવેલી છે. આ વિસ્તાર હાઈ-સિક્યોરિટી ધરાવતો વહીવટી ઝોન છે. બ્રિટિશ શાસનકાળ દરમિયાન સ્થપાયેલી આ ક્લબે વર્ષ 1913માં 'ઇમ્પિરિયલ દિલ્હી જિમખાના ક્લબ'ના નામે આ સ્થળ પરથી સંચાલન શરૂ કર્યું હતું. ભારતની આઝાદી પછી તેનું નામ બદલીને 'દિલ્હી જિમખાના ક્લબ' કરવામાં આવ્યું હતું અને હાલનું આખું માળખું 1930ના દાયકામાં તૈયાર કરવામાં આવ્યું હતું.