ભારતીય ક્રિકેટર મોહમ્મદ શમીની બહેન અને બનેવી છે મનરેગા કામદાર? જાણો કેટલા રૂપિયા મળ્યા

ઉત્તર પ્રદેશના અમરોહામાં મનરેગા યોજનામાં એક મોટી છેતરપિંડી સામે આવી છે, જેને સાંભળીને બધા ચોંકી ગયા છે. જોયા બ્લોકના પલૌલા ગામમાં, ગામના વડા ગુલે આઈશાએ પોતાના પરિવાર અને ઓળખીતા લોકોને કાગળ પર મજૂર બનાવ્યા. સૌથી ચોંકાવનારું નામ ક્રિકેટર મોહમ્મદ શમીની બહેન શબીનાનું છે. સરપંચ ગુલે આયેશા, શમીની બહેન શબીનાની સાસુ છે. શબીનાના સસરા શકીલ અને પતિ ગઝનવી બધા કામ સંભાળે છે.

અહેવાલ મુજબ, પલૌલા ગામમાં 657 મનરેગા જોબ કાર્ડ છે, જેમાંથી 150 સક્રિય છે. શબીનાએ 2022 થી 2024 સુધી 374 દિવસ કામ કર્યું અને 70000 રૂપિયા કમાયા, જોકે, ડરના કારણે નવેમ્બરમાં તેનું નામ કાઢી નાખવામાં આવ્યું. તેના પતિ ગઝનવીએ પણ 300 દિવસ કામ કર્યા પછી 66 હજાર રૂપિયા લીધા.

એવો દાવો કરવામાં આવે છે કે ગઝનવીએ આ સમાચાર દબાવવા માટે પૈસાની પણ ઓફર કરી હતી. તેણે મહેન્દ્ર સિંહ ધોની, ઉત્તરાખંડના ધારાસભ્ય ઉમેશ કુમાર અને અન્ય સેલિબ્રિટીઓ સાથેના પોતાના ફોટોગ્રાફ્સ પણ બતાવ્યા.

પરિવારના અનેક સભ્યો બન્યા મજૂર 

શબીનાના દિયર MBBS ડોક્ટર આમિર સુહેલે 284 દિવસમાં 61 હજાર કમાયા. બીજા દિયર શેખુ દિલ્હીમાં વકીલ છે, તેણે 290 દિવસમાં 65 હજાર રૂપિયાથી વધુ કમાણી કરી. ગુલે આયેશાની પુત્રી નેહા, પતિ શકીલનો ભાઈ શહજર અને કોન્ટ્રાક્ટર ઝુલ્ફીકારનો એન્જિનિયર પુત્ર પણ મજૂર બન્યા.

સ્થાનિક લોકોનો આરોપ છે કે ગામના સરપંચના પતિ શકીલના ઉદ્ધત વર્તનને કારણે, તેમની સામે કોઈ ફરિયાદ કરી શકાતી નથી; લોકોને પૈસા આપીને ચૂપ કરવામાં આવે છે.