'ટેક્સટાઈલ ઉપર '0' ટેરિફ કરી શકે છે અમેરિકા', પીયુષ ગોયલે ડિલ અંગે આપી માહિતી

અમેરિકાના રાષ્ટ્રપ્રમુખ ડોનાલ્ડ ટ્રમ્પે તાજેતરમાં જ ભારત પરનો ટેરિફ દર 25 ટકાથી ઘટાડી 18 ટકા કરવાની જાહેરાત કરી હતી. ત્યારે હવે અમેરિકન તંત્ર તરફથી વધુ એક રાહત મળવાના અહેવાલ સામે આવ્યા છે. કેન્દ્રીય વાણિજ્ય મંત્રી પિયુષ ગોયલે આજે (12 ફેબ્રુઆરી) કહ્યું છે કે, ‘અમેરિકાએ બાંગ્લાદેશના કાપડ ઉદ્યોગને મોટો લાભ આપ્યો છે, તેવી જ રીતે ભારતને પણ લાભ મળશે.’

ભારતીય ટેક્સટાઈલ સેક્ટરને મળશે મોટી રાહત

ભારત-અમેરિકા વચ્ચે વેપાર સમજૂતીમાં મહત્ત્વની ભૂમિકા નિભાવના ગોયલે સંકેત આપ્યો છે કે, બાંગ્લાદેશની જેમ ભારતીય ટેક્સટાઈલ સેક્ટર (Indian Textile Sector Tariff) માટે અંતિમ સમજૂતી પર હસ્તાક્ષરની પ્રક્રિયા ચાલી રહી છે, જેમાં ટેરિફ શૂન્ય થવાની આશા છે. આનાથી ભારતીય કાપડની નિકાસ કરતા ઉદ્યોગોને મોટી રાહત મળશે.

ભારતને બાંગ્લાદેશ જેવી મળશે રાહત

અમેરિકાએ બાંગ્લાદેશના ટેક્સટાઈલ સેક્ટરને મોટી રાહત આપ્યા બાદ ભારતીય કાપડ ઉદ્યોગ સામે અનેક પડકારો ઉભા થયા છે. ત્યારે આ નિર્ણયથી ભારતના ઉદ્યોગને મોટી રાહત મળી શકે છે. ગોયલે કહ્યું કે, ‘અમેરિકા-બાંગ્લાદેશ વચ્ચે થયેલી સમજૂતી મુજબ, જો તે અમેરિકા પાસેથી કાચો માલ ખરીદે, પછી પ્રોસેસ કરીને કાપડ તૈયાર કરે, ત્યારબાદ તે કપડાની નિકાસ કરશે તો તેના પર કોઈપણ ટેરિફ લાગુ નહીં પડે.

2025માં નિકાસમાં 9.1 ટકાનો વધારો

ઉલ્લેખનીય છે કે, યુએસ ઇન્ટરનેશનલ ટ્રેડ એડમિનિસ્ટ્રેશનના એકમ, ટેક્સટાઇલ અને વસ્ત્રોની ઓફિસના ડેટા મુજબ જુલાઈ-2025માં ભારતની નિકાસમાં એક વર્ષ પહેલાના સમાન સમયગાળાની તુલનામાં 9.1 ટકાનો વધારો નોંધાયો છે. તેવી જ રીતે, જૂન-2025માં પણ, એક મહિના પહેલાની તુલનામાં નિકાસમાં 12 ટકાનો વધારો થયો છે. અમેરિકન રાષ્ટ્રપતિ ડોનાલ્ડ ટ્રમ્પ દ્વારા ભારત પર લાદવામાં આવેલા બદલો ટેરિફ અમલમાં આવ્યા તે પહેલાં ભારતીય નિકાસકારોએ યુએસમાં ઘણો માલ મોકલ્યો હતો. કાપડ અને વસ્ત્ર કંપનીઓ અને તેમના ભારતીય સપ્લાયર્સ દ્વારા માલ મોકલવા માટે ધસારો થયો હતો. 2024-જુલાઈની સરખામણીમાં 2025-જુલાઈમાં વિયેતનામ અને બાંગ્લાદેશથી યુએસમાં કાપડની આયાત 14.2 ટકા વધી હતી અને વસ્ત્રોની આયાત 5.2 ટકા વધી હતી. જૂનની સરખામણીમાં વૃદ્ધિમાં મંદી હોવા છતાં, બંને દેશોએ યુએસમાં તેમની બજાર સ્થિતિ મજબૂત કરવાનું ચાલુ રાખ્યું છે.

GDPમાં 2 ટકાનું યોગદાન

ભારતનો કાપડ અને વસ્ત્ર ક્ષેત્ર દેશના જીડીપીમાં લગભગ 2 ટકાનું યોગદાન આપે છે અને તે રોજગાર અને આજીવિકા પૂરી પાડતા સૌથી મોટા ક્ષેત્રોમાંનું એક છે. અમેરિકા ભારતના કાપડ અને વસ્ત્રો ઉત્પાદનો માટે સૌથી મોટું બજાર છે. ભારતના કાપડ અને વસ્ત્રોની નિકાસનો લગભગ 28 ટકા અમેરિકા જાય છે.