AAP ધારાસભ્યનું ગોળી વાગવાથી મોત, અચાનક થયું ફાયરિંગ

લુધિયાણા પશ્ચિમના આમ આદમી પાર્ટી (AAP) ના ધારાસભ્ય ગુરપ્રીત બસ્સી ગોગીનું શુક્રવારે મોડી રાત્રે ગોળી વાગવાથી અવસાન થયું. ગંભીર હાલતમાં તેમને ડીએમસી હોસ્પિટલમાં દાખલ કરવામાં આવ્યા હતા, જ્યાં તેમનું મૃત્યુ થયું. ધારાસભ્ય ગોગી એક કાર્યક્રમમાં હાજરી આપીને ઘરે પાછા ફર્યા હતા અને તેમના રૂમમાં ભોજન કરી રહ્યા હતા. આ દરમિયાન ગોળીબારનો અવાજ સંભળાયો. જ્યારે તેમના પત્ની ડૉ. સુખચૈન કૌર ગોગી રૂમમાં પહોંચ્યા ત્યારે ગોગી લોહીલુહાણ હાલતમાં જોવા મળ્યા હતા. તેમને તાત્કાલિક લુધિયાણાની ડીએમસી હોસ્પિટલમાં લઈ જવામાં આવ્યા, જ્યાં તેમનું મૃત્યુ થયું. તેમને પોતાની લાઇસન્સવાળી પિસ્તોલથી ગોળી મારી દેવામાં આવી હતી.

આ પણ વાંચો : છત્તીસગઢમાં પત્રકારના આખા પરિવારનું મર્ડર, માતા-પિતા અને ભાઈની કુહાડીથી ઘા ઝીંકી હત્યા

ઘટનાની માહિતી મળતા જ લુધિયાણા કમિશનરેટના પોલીસ કમિશનર કુલદીપ ચહલ ડીએમસી હોસ્પિટલ પહોંચ્યા. ડીસીપી શુભમ અગ્રવાલ, એડીસીપી રમણદીપ ભુલ્લર, એસીપી અક્ષરશી જૈન પણ ઘટનાસ્થળે પહોંચ્યા. ડીએમસીની આસપાસ મોટી સંખ્યામાં પોલીસકર્મીઓ તૈનાત કરવામાં આવ્યા હતા.

રિવોલ્વર સાફ કરતાં વાગી ગોળી 

પોલીસ દ્વારા હજુ સુધી ગોળીબારના કારણની સત્તાવાર પુષ્ટિ કરવામાં આવી નથી. પરંતુ સૂત્રો કહે છે કે તે પોતાની લાઇસન્સવાળી રિવોલ્વર સાફ કરી રહ્યા હતા, ત્યારે અચાનક ગોળી વાગી ગઈ. માહિતી મળતા જ પોલીસ કમિશનર, AAP ધારાસભ્ય અને અન્ય અધિકારીઓ ઘટનાસ્થળે પહોંચી ગયા. પોલીસે આ મામલાની તપાસ શરૂ કરી દીધી છે.

પહેલા કોંગ્રેસમાં હતા અને ચૂંટણી પહેલા AAPમાં જોડાયા હતા

પંજાબ વિધાનસભા ચૂંટણી પહેલા ગુરપ્રીત ગોગી કોંગ્રેસ છોડીને આમ આદમી પાર્ટીમાં જોડાયા હતા. AAP એ તેમને લુધિયાણા પશ્ચિમ મતવિસ્તારમાંથી પાર્ટીના ઉમેદવાર બનાવ્યા અને તેઓ ચૂંટણી જીતી ગયા. AAPમાં જોડાતા પહેલા ગોગી 23 વર્ષ સુધી કોંગ્રેસમાં હતા. તેઓ કોંગ્રેસના ભૂતપૂર્વ જિલ્લા પ્રમુખ અને ત્રણ વખત કાઉન્સિલર પણ હતા. તેમણે કોંગ્રેસ સરકારમાં પંજાબ સ્મોલ ઇન્ડસ્ટ્રીઝ એન્ડ એક્સપોર્ટ કોર્પોરેશનના ચેરમેન તરીકે પણ સેવા આપી હતી.

ગુરપ્રીત ગોગી વિધાનસભા ચૂંટણીમાં ઉમેદવારી નોંધાવવા માટે સ્કૂટર પર પહોંચ્યા હતા અને તેના વિશે ચર્ચા પણ થઈ હતી. પંજાબ વિધાનસભા 2022 ની ચૂંટણીમાં, ગુરપ્રીત સિંહ ગોગીને લુધિયાણા પશ્ચિમથી લગભગ 40 હજાર મત મળ્યા.

ગોગીની પત્ની મ્યુનિસિપલ ચૂંટણી હારી ગઈ હતી

તાજેતરમાં યોજાયેલી લુધિયાણા મ્યુનિસિપલ કોર્પોરેશનની ચૂંટણીમાં, લુધિયાણા પશ્ચિમના AAP ધારાસભ્ય ગુરપ્રીત ગોગીના પત્ની ડૉ. સુખચૈન બસ્સીએ પણ વોર્ડ નંબર 61 માં કોંગ્રેસના પરમિંદર કૌર સામે 86 મતોથી ચૂંટણી લડી હતી પરંતુ તેઓ હારી ગયા હતા.