મહિલા સશક્તિકરણ: નવા મંત્રીમંડળમાં આ ત્રણ મહિલાઓનો સમાવેશ, જાણો કોણ છે?

ગુજરાત રાજ્યના નવા મંત્રીમંડળની રચનામાં મુખ્યમંત્રી દ્વારા મહિલા સશક્તિકરણ પર ખાસ ધ્યાન કેન્દ્રિત કરવામાં આવ્યું છે. રાજ્યની રાજનીતિમાં મહિલાઓના પ્રતિનિધિત્વને વધુ મજબૂત કરવાના ઉદ્દેશ્યથી, આ વખતે મંત્રીમંડળમાં ત્રણ મહિલા ધારાસભ્યોને સ્થાન આપવામાં આવ્યું છે. આ ત્રણેય મહિલા નેતાઓમાં દર્શના વાઘેલા, રીવાબા જાડેજા, અને મનીષા વકીલનો સમાવેશ થાય છે. આ સમાવેશ માત્ર સંખ્યામાં વધારો નથી, પરંતુ વહીવટી પ્રક્રિયા અને નીતિ નિર્ધારણમાં મહિલાઓની ભૂમિકાને વધારે મહત્વ આપવાનો સ્પષ્ટ સંકેત છે.

ત્રણ મહિલાઓનો સમાવેશ 

મંત્રીમંડળમાં મહિલાઓને સ્થાન આપીને મુખ્યમંત્રીએ રાજ્યની મહિલાઓને રાજકીય અને સામાજિક ક્ષેત્રે આગળ વધવાનો મજબૂત સંદેશ આપ્યો છે. આ મહિલાઓ રાજ્યના વિવિધ પ્રદેશોનું પ્રતિનિધિત્વ કરે છે, જે પ્રાદેશિક સંતુલન જાળવવાની સાથે-સાથે વિવિધ સમાજની મહિલાઓના મુદ્દાઓને સરકાર સુધી પહોંચાડવામાં મદદરૂપ થશે. મનીષા વકીલ જેવા અનુભવી નેતાઓની સાથે રીવાબા જાડેજા અને દર્શના વાઘેલા જેવા નવા અને યુવા ચહેરાઓને તક મળવાથી મંત્રીમંડળમાં અનુભવ અને નવી ઊર્જાનું સંતુલન જળવાશે.

આ નિર્ણયથી ગુજરાતના રાજકારણમાં મહિલાઓનું નેતૃત્વ વધુ પ્રબળ બનશે અને તેઓ રાજ્યના વિકાસલક્ષી કાર્યોમાં સક્રિય ભાગીદારી નોંધાવી શકશે.

મનીષા વકીલ (Manisha Vakil)

વડોદરા શહેરની રાજનીતિમાં એક મજબૂત મહિલા ચહેરો ગણાતા અને ભાજપના સંનિષ્ઠ કાર્યકર્તા મનીષા વકીલે ફરી એકવાર ગુજરાતના મંત્રીમંડળમાં સ્થાન મેળવીને પોતાની રાજકીય સફરને વધુ ઊંચાઈ આપી છે. વડોદરા શહેર (અનામત બેઠક)ના ધારાસભ્ય મનીષા વકીલની સફર, તેમનું શિક્ષણ અને તેમની સંપત્તિની વિગતો અહીં પ્રસ્તુત છે.

શૈક્ષણિક અને વ્યવસાયિક પૃષ્ઠભૂમિ

મનીષા વકીલનો જન્મ 25  માર્ચ, 1975 ના રોજ વડોદરા ખાતે થયો હતો.

શિક્ષણ: તેમણે પોસ્ટ ગ્રેજ્યુએટ સુધીનો અભ્યાસ કર્યો છે, જેમાં એમ.એ. (M.A.) અને બી.એડ. (B.Ed.) (અંગ્રેજી સાહિત્ય) ની ડિગ્રીઓ મેળવી છે. ઉપરાંત, તેઓ ડિગ્રી ઑફ ફિલોસોફી (Ph.D.) સુધીનો અભ્યાસ પણ ધરાવે છે.

વ્યવસાય: રાજકારણમાં આવતા પહેલા, તેમણે વડોદરાની બ્રાઇટ ડે સ્કૂલમાં પ્રાથમિક વિભાગના સુપરવાઇઝર અને શિક્ષિકા તરીકે ફરજ બજાવી હતી.

સફળ રાજકીય કારકિર્દી
મનીષા વકીલની રાજકીય કારકિર્દી તેમના મતવિસ્તારમાં તેમની લોકપ્રિયતા દર્શાવે છે.

જીતની હેટ્રીક : વર્ષ 2012 ની વિધાનસભા ચૂંટણીમાં ભાજપે તેમને શહેર વાડી વિધાનસભા બેઠક પરથી ઉમેદવાર બનાવ્યા અને તેઓ વિજયી થયા. 2017 માં ફરી રિપીટ કરાયા અને જીત મેળવી. 2022 ની વિધાનસભા ચૂંટણીમાં તેમણે ત્રીજી વખત ચૂંટણી જીતીને પોતાની મજબૂત પકડ સાબિત કરી. આ ચૂંટણીમાં તેઓ 1  લાખ 30  હજાર 705  મતોના મોટા માર્જિનથી જીત્યા હતા.

મંત્રી તરીકેની ભૂમિકા:

વર્ષ 2021 માં તેમને સૌપ્રથમ વખત મંત્રીમંડળમાં સ્થાન મળ્યું અને તેઓ મહિલા અને બાળ કલ્યાણ વિભાગના મંત્રી બન્યા. 2025 માં ફરી એકવાર તેમને નવા મંત્રીમંડળમાં સ્થાન મળ્યું છે. તેઓ ધારાસભ્ય તરીકે સતત બીજી ટર્મમાં કાર્યરત છે.

 રીવાબા જાડેજા (Rivaba Jadeja)

રીવાબા જાડેજા રાજ્યના રાજકારણમાં એક નવો અને લોકપ્રિય ચહેરો છે.

મતવિસ્તાર: જામનગર ઉત્તર

રાજકીય કારકિર્દી: તેઓ 2022 ની ગુજરાત વિધાનસભા ચૂંટણીમાં જામનગર ઉત્તર બેઠક પરથી ચૂંટાયા હતા.

શિક્ષણ: તેમણે ગુજરાત ટેકનોલોજીકલ યુનિવર્સિટી (GTU), અમદાવાદમાંથી મિકેનિકલ એન્જિનિયરિંગમાં સ્નાતક (Bachelor of Engineering) ની ડિગ્રી મેળવી છે.

પિતા-માતા: તેમના પિતા હરદેવ સિંહ સોલંકી એક જાણીતા ઉદ્યોગપતિ છે અને લાંબા સમયથી સામાજિક કાર્યો સાથે સંકળાયેલા છે, જ્યારે માતાનું નામ પ્રફુલ્લબા સોલંકી છે.

સામાજિક કાર્ય: તેઓ માત્ર રાજકારણી જ નહીં, પણ એક સક્રિય સામાજિક કાર્યકર પણ છે. તેમણે મહિલા સશક્તિકરણના ઉદ્દેશ્યથી માતૃશક્તિ ચેરિટેબલ ટ્રસ્ટ નામનું એક NGO શરૂ કર્યું છે, જેના દ્વારા તેઓ સામાન્ય નાગરિકની જેમ મહિલાઓની સેવા અને મદદ માટે હંમેશા તત્પર રહે છે.  રીવાબા જાડેજા પોતાની સંસ્કૃતિ અને સંસ્કારોને વળગી રહેવા માટે જાણીતા છે. મોટાભાગના પ્રસંગોમાં તેમને સાડીમાં જોઈ શકાય છે.

કરણી સેનાના સભ્ય: તેઓ કરણી સેનાના સભ્ય પણ રહી ચૂક્યા છે. વર્ષ ૨૦૧૮માં જ્યારે પ્રસિદ્ધ ફિલ્મ 'પદ્માવત' નો કરણી સેના દ્વારા વિરોધ કરવામાં આવ્યો હતો, ત્યારે રીવાબા જાડેજાએ આ વિરોધનો અવાજ બનીને મહત્વની ભૂમિકા ભજવી હતી. આ ઘટના બાદ જ તેમને કરણી સેનાની મહિલા વિંગના વડા બનાવવામાં આવ્યા હતા.

ભાજપમાં પ્રવેશ: રીવાબાએ રાજકારણમાં પ્રવેશ વર્ષ 2019 માં ભારતીય જનતા પાર્ટી (BJP) માં જોડાઈને કર્યો હતો. તેમના ઘરમાં બાળપણથી જ રાજકારણનું વાતાવરણ રહ્યું હોવાથી, તેઓ પહેલેથી જ સેવાભાવી સ્વભાવના રહ્યા છે. તેમના કાકા હરિસિંહ સોલંકી પણ કોંગ્રેસના નેતા રહી ચૂક્યા હતા, જેઓ પાછળથી ભાજપમાં જોડાયા હતા.

વૈવાહિક જીવન
રીવાબાએ વર્ષ 2016 માં ભારતીય ક્રિકેટ ટીમના ઓલરાઉન્ડર રવીન્દ્ર જાડેજા સાથે લગ્ન કર્યા હતા. એક ફેમિલી ફંકશનમાં જાડેજાના બહેને રીવાબાને જોયા બાદ પરિવાર દ્વારા આ સંબંધ નક્કી કરવામાં આવ્યો હતો. આ દંપતીને હાલમાં એક પુત્રી છે. રીવાબા જાડેજાએ હંમેશા પોતાના સંસ્કાર અને સંસ્કૃતિને જાળવી રાખી છે અને તેઓ અનેક મેચો દરમિયાન રવીન્દ્ર જાડેજા સાથે સ્ટેડિયમમાં જોવા મળે છે.

દર્શના વાઘેલા: અમદાવાદના પૂર્વ ડેપ્યુટી મેયરથી ગુજરાત મંત્રીમંડળના સભ્ય સુધીની સફર

ગુજરાતના નવા મંત્રીમંડળમાં સ્થાન પામેલા મહિલા ધારાસભ્ય દર્શના વાઘેલા અમદાવાદના રાજકારણમાં એક જાણીતું નામ છે. ભારતીય જનતા પાર્ટી (BJP)ના આ નેતાની રાજકીય અને શૈક્ષણિક સફર નીચે મુજબ છે:

રાજકીય કારકિર્દી
ભારતીય જનતા પાર્ટી (BJP)ના MLa

મતવિસ્તાર: તેઓ અમદાવાદ જિલ્લામાં અનુસૂચિત જાતિ (SC) સમુદાય માટે અનામત અસારવા મતવિસ્તારનું પ્રતિનિધિત્વ કરે છે.

વિધાનસભામાં પ્રવેશ: તેમણે 2022 ની ગુજરાત વિધાનસભાની ચૂંટણીમાં અસારવા બેઠક પરથી જીત મેળવીને ધારાસભ્ય તરીકે ચૂંટાયા હતા. 

અમદાવાદ મ્યુનિસિપલ કોર્પોરેશન (AMC) માં યોગદાન
દર્શના વાઘેલાએ રાજ્યની રાજનીતિમાં પ્રવેશતા પહેલા અમદાવાદ મહાનગરપાલિકામાં (AMC)  મહત્ત્વની ભૂમિકા ભજવી હતી.

પૂર્વ ડેપ્યુટી મેયર: તેઓ અમદાવાદના ભૂતપૂર્વ ડેપ્યુટી મેયર તરીકે સેવા આપી ચૂક્યા છે.

કાર્યકાળ: તેમણે બે વખત એક-એક વર્ષના કાર્યકાળ માટે ડેપ્યુટી મેયર તરીકે સેવા આપી હતી. તેઓ ઓક્ટોબર 2010 માં ફરીથી આ પદ માટે ચૂંટાયા હતા.

શૈક્ષણિક લાયકાત
અભ્યાસ: દર્શના વાઘેલાએ મહિલા કોલેજમાંથી બીકોમ (B.Com.) સુધીનો અભ્યાસ પૂર્ણ કરેલો છે.

દર્શના વાઘેલાને મંત્રીમંડળમાં સ્થાન મળવાથી અમદાવાદ શહેરના પ્રતિનિધિત્વને મજબૂતી મળી છે, અને તેમના મહાનગરપાલિકાના અનુભવનો લાભ રાજ્ય સરકારના વહીવટમાં મળશે.