Video/ Rajkot માં ચાંદીની ચોરીનો ભેદ ઉકેલાયો:  'મોડસ ઓપરેન્ડી' જાણી ચોંકી જશો 

રાજકોટ શહેરના LCB ઝોન-1 ની ટીમે એક મહિના પહેલા થયેલી 17 લાખ રૂપિયાની ચાંદીની ચોરીના કેસમાં મુખ્ય આરોપીને મુદ્દામાલ સાથે ઝડપી પાડ્યો છે. આ આરોપીની ધરપકડ સાથે પોલીસે લાખોની કિંમતની ચાંદી અને ગુનામાં વપરાયેલ વાહન કબજે કર્યું છે.

એક મહિના પહેલા થઈ હતી ચોરી

રાજકોટમાં આશરે એક માસ પૂર્વે મોટી માત્રામાં ચાંદીના દાગીના અને ચીજવસ્તુઓની ચોરી થઈ હતી. આ કેસમાં પોલીસ સતત તપાસ કરી રહી હતી. LCB ઝોન-1 ની ટીમે બાતમીના આધારે વિજય નાગણી નામના આરોપીને દબોચી લીધો છે. પોલીસે આરોપી પાસેથી 15.019 કિલોગ્રામ ચાંદીનો મુદ્દામાલ અને એક બાઇક જપ્ત કર્યું છે.

ચોરી કરવાની અનોખી 'મોડસ ઓપરેન્ડી'

આરોપી વિજય નાગણીની પૂછપરછમાં ચોંકાવનારી હકીકત સામે આવી છે. તે ચોરી કરવા માટે એક ખાસ પદ્ધતિ અપનાવતો હતો. તે લોકોના ઘરે નાના-મોટા કામ કરવા માટે (ઘરઘાટી તરીકે) રહેતો હતો. પરિવારનો વિશ્વાસ જીત્યા બાદ તે ઘરની કીમતી ચીજવસ્તુઓ અને દાગીનાની ચોરી કરી ફરાર થઈ જતો હતો.

ગુનાહિત ઇતિહાસ

ઝડપાયેલ આરોપી વિજય નાગણી કોઈ સામાન્ય ગુનેગાર નથી, પરંતુ રીઢો આરોપી છે. આ અગાઉ પણ તેની વિરુદ્ધ રાજકોટના માલવીયાનગર પોલીસ મથક અને બી-ડિવિઝન પોલીસ મથકમાં ફરિયાદો નોંધાઈ ચૂકી છે.