Video: કાપોદ્રામાં હીરાના કારખાનેથી પરત ફરતા રત્નકલાકારની ઘાતકી હત્યા, બે હુમલાખોરો ફરાર

સુરતમાં ફરી એકવાર મોડી રાત્રે હત્યાની ચકચારી ઘટના સામે આવી છે. શહેરના કાપોદ્રા વિસ્તારમાં આવેલા હિંમતનગરમાં 40 વર્ષીય રત્નકલાકારની ચપ્પુના ઘા મારીને નિર્મમ હત્યા કરવામાં આવી છે. 

ઘટનાની વિગતો

મૃતકનું નામ સુરેશ ચિત્રોડા (ઉંમર આશરે 40 વર્ષ) હોવાનું જાણવા મળ્યું છે, જેઓ વ્યવસાયે રત્નકલાકાર હતા. બુધવારે મોડી રાત્રે સુરેશ ચિત્રોડા હીરાના કારખાના પરથી કામ પતાવીને પોતાના ઘરે પરત આવી રહ્યા હતા. આ સમયે, બે જેટલા અજાણ્યા ઈસમોએ તેમના પર હુમલો કર્યો હતો. હુમલાખોરોએ સુરેશ ચિત્રોડાને ચપ્પુના ઉપરા-છાપરી ઘા માર્યા હતા અને ઘટનાને અંજામ આપીને ત્યાંથી ફરાર થઈ ગયા હતા.

ઘટનાસ્થળે જ મોત

ચપ્પુના ગંભીર ઘા વાગવાના કારણે યુવકનું ઘટનાસ્થળે જ કરુણ મૃત્યુ થયું હતું. આ હત્યાના બનાવની જાણ થતાં જ પોલીસ વિભાગમાં દોડધામ મચી ગઈ હતી. પોલીસના ઉચ્ચ અધિકારીઓ તાત્કાલિક ઘટના સ્થળે પહોંચી ગયા હતા અને સમગ્ર વિસ્તારને કોર્ડન કરી લીધો હતો.

પોલીસે મૃતદેહનો કબજો લઈ તેને પીએમ (પોસ્ટમોર્ટમ) અર્થે હોસ્પિટલ ખસેડ્યો છે. પોલીસે હત્યા પાછળનું કારણ જાણવા અને ફરાર થયેલા બંને આરોપીઓને ઝડપી લેવા માટે વધુ તપાસના ચક્રો ગતિમાન કર્યા છે.