વડોદરામાં એક જ પરિવારના ત્રણ સભ્યોનો આપઘાતનો મામલો, આર્થિક સંકડામણમાં પગલું ભર્યું હોવાની આશંકા

વડોદરા શહેરના એમ.જી. રોડ પર આવેલી દલા પટેલની પોળના નરસિંહજીની પોળમાં સોની પરિવારના ત્રણ સભ્યોનાં આપઘાતની ઘટનાથી ચકચાર મચી ગઈ છે.  માતા, પુત્ર અને પુત્રીનાં મૃતદેહ ઘરમાંથી મળી આવતાં સમગ્ર વિસ્તારમાં શોકની લાગણી ફેલાઈ હતી. ઘટનાની જાણ થતાં પોલીસની ટીમ સ્થળ પર પહોંચી હતી અને તપાસ હાથ ધરી હતી. પ્રાથમિક તપાસમાં પરિવાર આર્થિક સંકડામણનો સામનો કરી રહ્યો હોવાની વિગતો સામે આવી છે.

માતા, પુત્ર અને પુત્રીનાં મોતથી પરિવારજનોમાં શોક

મળતી માહિતી મુજબ, મૃતકોમાં આરતીબેન સોની, તેમના પુત્ર નીલકંઠ સોની અને પુત્રી જેનીબેન સોનીનો સમાવેશ થાય છે. પ્રાથમિક વિગતો અનુસાર, ત્રણેયનાં મોત ઘરમાં થયાં હતાં. ઘટનાની જાણ થતાં સિટી પોલીસ સ્થળ પર પહોંચી હતી અને જરૂરી કાર્યવાહી શરૂ કરી હતી. જોકે, સમગ્ર ઘટનાના સંજોગો અંગે પોલીસ દ્વારા વધુ તપાસ કરવામાં આવી રહી છે.

બે વર્ષ પહેલાં પરિવારના મોભીનું થયું હતું અવસાન

મળતી વિગતો અનુસાર, પરિવારના મોભી ચેતન સોનીનું બે વર્ષ અગાઉ હૃદયરોગના હુમલાથી અવસાન થયું હતું. તેમના અવસાન બાદ પુત્ર નીલકંઠ કેનેડાથી પરત આવ્યો હતો, જ્યારે પુત્રી જેનીબેન આયુર્વેદિક હોસ્પિટલ ધરાવતાં હોવાનું જાણવા મળ્યું છે. પરિવારની વર્તમાન આર્થિક સ્થિતિ અને અન્ય સંજોગો અંગે પોલીસ તપાસ કરી રહી છે.

પોલીસને ત્રણેયની હસ્તલિખિત ચિઠ્ઠીઓ મળી

આ ઘટનામાં પોલીસને ત્રણેય સભ્યોની હસ્તલિખિત ચિઠ્ઠીઓ મળી આવી હોવાનું જાણવા મળ્યું છે. પોલીસે આ ચિઠ્ઠીઓ કબજે કરીને તપાસ શરૂ કરી છે. પ્રાથમિક માહિતી અનુસાર, ચિઠ્ઠીઓમાં પરિવાર આર્થિક મુશ્કેલીઓનો સામનો કરી રહ્યો હોવાનો ઉલ્લેખ છે. જોકે, ચિઠ્ઠીઓમાં કરવામાં આવેલા ઉલ્લેખોની સત્તાવાર પુષ્ટિ અને સમગ્ર ઘટનાનું કારણ તપાસ બાદ જ સ્પષ્ટ થશે.

મકાનના સોદા અને રૂ. 33 લાખનો પણ ઉલ્લેખ

તપાસ દરમિયાન પરિવાર જે મકાનમાં રહેતો હતો તેનો સોદો કરવામાં આવ્યો હોવાની વિગતો પણ સામે આવી છે. મકાનના સોદા પેટે મળનારી રૂ. 33 લાખની રકમ બેંકમાં જમા કરાવી દેવું ચૂકતે કરવાની વાતનો ચિઠ્ઠીમાં ઉલ્લેખ હોવાનું જાણવા મળ્યું છે. આર્થિક વ્યવહારો અને પરિવારની પરિસ્થિતિ સહિતના વિવિધ પાસાંઓને ધ્યાનમાં રાખીને પોલીસ વધુ તપાસ કરી રહી છે.