Jamnagar / પોક્સો કેસમાં ભોગ બનનારની ઉંમર સાબિત ન થતાં આરોપીને રાહત, પણ બળાત્કારના ગુનામાં 10 વર્ષની કેદ

જામનગર જિલ્લામાં વર્ષ 2024માં નોંધાયેલા સગીરાના અપહરણ અને બળાત્કારના કેસમાં જામનગરની પોક્સો અદાલતે મહત્ત્વપૂર્ણ ચુકાદો આપ્યો છે. કેસની સુનાવણી દરમિયાન ભોગ બનનારની ઉંમર કાયદેસર રીતે સાબિત ન થઈ શકતાં આરોપીને પોક્સો કાયદાની કલમો હેઠળ શંકાનો લાભ આપવામાં આવ્યો હતો. જોકે, બળાત્કારનો ગુનો પુરવાર થતાં પંચમહાલ જિલ્લાના ડ્રાઈવિંગ કામ સાથે સંકળાયેલા આરોપી ધર્મેશ નાયકને 10 વર્ષની સખત કેદ અને રૂ.25 હજારના દંડની સજા ફટકારવામાં આવી છે. આ ઉપરાંત ભોગ બનનારને સરકારની વળતર યોજના હેઠળ રૂ.1 લાખનું વળતર ચૂકવવા પણ અદાલતે હુકમ કર્યો છે.

આ કેસની વિગતો મુજબ, જામનગર જિલ્લામાં 13 વર્ષ અને ત્રણ માસની હોવાનું જણાવાયેલી એક સગીરાનું તા.3 માર્ચ, 2024ના રોજ બદકામના ઇરાદે અપહરણ કરવામાં આવ્યું હોવાની ફરિયાદ નોંધાઈ હતી. તા.10 એપ્રિલ, 2024ના રોજ ભોગ બનનાર બાળા મળી આવ્યા બાદ સમગ્ર બનાવ બહાર આવ્યો હતો. બાળા મળી આવી ત્યારે તે એક માસ અને પાંચ દિવસની ગર્ભવતી હોવાનું પણ સામે આવ્યું હતું. આ બનાવમાં પંચમહાલ જિલ્લાના ડ્રાઈવિંગ કામ સાથે સંકળાયેલા ધીરજ ઉર્ફે ધર્મેશ નાયક સામે અપહરણ, બળાત્કાર અને પોક્સો કાયદાની વિવિધ કલમો હેઠળ ગુનો નોંધી તેની ધરપકડ કરવામાં આવી હતી.

આ કેસની કાર્યવાહી જામનગરની પોક્સો અદાલતમાં ચાલી હતી. સુનાવણી દરમિયાન ભોગ બનનારની ઉંમર કાયદેસર રીતે સાબિત થઈ શકી ન હોવાનું અદાલતના ધ્યાને આવતાં આરોપીને પોક્સો કાયદાની કલમો હેઠળ શંકાનો લાભ આપવામાં આવ્યો હતો. જોકે, બળાત્કારનો ગુનો પુરવાર થતાં અદાલતે આરોપીને 10 વર્ષની સખત કેદની સજા અને રૂ.25 હજારનો દંડ ફટકાર્યો હતો. સાથે જ ભોગ બનનારને સરકારી વળતર યોજના હેઠળ રૂ.1 લાખ ચૂકવવા તા.15ના રોજ હુકમ કરવામાં આવ્યો હતો.

સરકારી વકીલ અને તપાસનીશ પીઆઈ સામે કાર્યવાહી માટે હુકમ
આ ચુકાદામાં અદાલતે ભોગ બનનારની ઉંમર સાબિત ન થઈ શકવાના મુદ્દે પણ ગંભીર નોંધ લીધી હતી. ભોગ બનનારની ઉંમર અંગે જરૂરી ખરાઈ અને પુરાવા રજૂ કરવામાં થયેલી ખામીના સંદર્ભમાં જિલ્લા સરકારી વકીલ જે.કે.ભંડેરી વિરુદ્ધ ચુકાદાની નકલ સાથે યાદી રાજ્યના ડિરેક્ટર ઓફ પ્રોસિક્યુશન વિભાગને મોકલવાનો હુકમ કર્યો છે.

તે જ રીતે, ભોગ બનનારની જન્મતારીખની ખરાઈ કર્યા વિના ચાર્જશીટ અને પુરાવા રજૂ કરવા બદલ તપાસનીશ અધિકારી પીઆઈ અલ્પેશકુમાર ચૌધરી વિરુદ્ધ યોગ્ય કાર્યવાહી કરવા માટે ચુકાદાની નકલ સાથે યાદી જિલ્લા પોલીસ વડાને મોકલવાનો પણ અદાલતે હુકમ કરતાં પોલીસ અને કાનૂની વર્તુળોમાં ચર્ચા જાગી છે.

આમ, ભોગ બનનારની ઉંમર સાબિત ન થવાને કારણે પોક્સોની કલમો હેઠળ આરોપીને રાહત મળી હોવા છતાં બળાત્કારના ગુનામાં સજા ફટકારવામાં આવી છે. સાથે જ તપાસ અને પુરાવા રજૂ કરવાની પ્રક્રિયામાં રહેલી ખામીઓ અંગે જવાબદારી નક્કી કરવા માટે અદાલતે સંબંધિત વિભાગોને કાર્યવાહી કરવા સૂચના આપી છે.