Video/ જેતપુરની હોટલ-રેસ્ટોરન્ટમાં ઘરેલુ ગેસ સિલિન્ડરનો દુરુપયોગ, તંત્રના દરોડામાં 4 સિલિન્ડર સીઝ
છેલ્લું અપડેટ : 16 Mar 2026
રાજકોટ જિલ્લાના જેતપુર શહેર અને ગ્રામ્ય વિસ્તારોમાં વહીવટી તંત્ર દ્વારા ઘરેલુ ગેસ સિલિન્ડરના વ્યવસાયિક ઉપયોગ મામલે કડક કાર્યવાહી હાથ ધરવામાં આવી છે. જિલ્લા કલેક્ટર ડો. ઓમ પ્રકાશના માર્ગદર્શન હેઠળ મામલતદાર અને પુરવઠા વિભાગની ટીમે વિવિધ હોટલો અને રેસ્ટોરન્ટ્સમાં આકસ્મિક ચેકિંગ હાથ ધરી 4 ઘરેલુ ગેસ સિલિન્ડર જપ્ત કર્યા છે.
યુદ્ધની પરિસ્થિતિ વચ્ચે તંત્રની તકેદારી
વર્તમાન સમયમાં મધ્ય પૂર્વના દેશોમાં ચાલી રહેલી યુદ્ધની પરિસ્થિતિને કારણે ગેસ પુરવઠા પર અસર પડવાની શક્યતા છે. આવા સમયે સામાન્ય જનતાને ઘરેલુ ગેસનો પૂરતો પુરવઠો મળી રહે અને કોઈ અછત ન સર્જાય તે હેતુથી તંત્ર દ્વારા આ ચેકિંગ તેજ કરવામાં આવ્યું છે. ઘરેલુ ઉપયોગ માટેના સબસિડીવાળા ગેસનો ઉપયોગ જ્યારે હોટલ કે રેસ્ટોરન્ટ જેવા વ્યવસાયિક એકમોમાં થાય છે, ત્યારે સામાન્ય ગ્રાહકોના હક પર તરાપ વાગે છે, જેને અટકાવવા આ ઝુંબેશ શરૂ કરાઈ છે.
મામલતદાર અને પુરવઠા વિભાગની સંયુક્ત કાર્યવાહી
જેતપુર મામલતદાર અને પુરવઠા વિભાગની ટીમે શહેરના મુખ્ય માર્ગો પર આવેલી ખાણીપીણીની લારીઓ, હોટલો અને રેસ્ટોરન્ટમાં ઓચિંતું ચેકિંગ કર્યું હતું. આ તપાસ દરમિયાન કેટલાક એકમોમાં ઘરેલુ ગેસ સિલિન્ડરનો ઉપયોગ થતો જોવા મળ્યો હતો. તંત્ર દ્વારા સ્થળ પર જ કાર્યવાહી કરી 4 સિલિન્ડર સીઝ કરવામાં આવ્યા હતા અને કાયદેસરની કાર્યવાહી હાથ ધરી હતી.
આગામી દિવસોમાં પણ કાર્યવાહી રહેશે ચાલુ
વહીવટી તંત્ર દ્વારા સ્પષ્ટ ચેતવણી આપવામાં આવી છે કે આગામી દિવસોમાં પણ જેતપુર શહેર અને તાલુકાના વિસ્તારોમાં આ પ્રકારની આકસ્મિક તપાસ ચાલુ રહેશે. જો કોઈ વ્યવસાયિક એકમ ઘરેલુ ગેસ સિલિન્ડરનો ઉપયોગ કરતા ઝડપાશે તો તેની સામે કડક દંડનીય કાર્યવાહી કરવામાં આવશે.
