Rajkot/ વીરપુરમાં 50 ફૂટ ઊંચા પુલ પરથી બોલેરો નીચે ખાબકી છતાં ચાલકનો આબાદ બચાવ
છેલ્લું અપડેટ : 03 Feb 2026
રાજકોટ નેશનલ હાઇવે પર વીરપુર પાસે આજે એક કાળજું કંપાવનારો અકસ્માત સર્જાયો હતો. એક અજાણ્યા વાહન ચાલકે ટક્કર મારતા બોલેરો પીકઅપ પુલની રેલિંગ તોડીને અંદાજે 40 થી 50 ફૂટ નીચે ખાબકી હતી. આ ભયાનક અકસ્માતમાં ગાડીનો કચ્ચરઘાણ નીકળી ગયો હોવા છતાં ચાલકનો ચમત્કારિક બચાવ થયો છે.
કેવી રીતે બની ઘટના?
પ્રાપ્ત માહિતી અનુસાર, બોલેરો પીકઅપનો ચાલક પોરબંદરથી રાજકોટ તરફ જઈ રહ્યો હતો. તે સમયે વીરપુર પાસે હાઈવે પર એક અજાણ્યા વાહન ચાલકે બોલેરો પીકઅપને જોરદાર ટક્કર મારી હતી. ટક્કર એટલી જોરદાર હતી કે બોલેરો ચાલકે કાબૂ ગુમાવ્યો અને ગાડી પુલની સુરક્ષા રેલિંગ તોડીને નીચે પડી હતી. અંદાજે 40 થી 50 ફૂટની ઊંચાઈએથી ગાડી નીચે પટકાતા તેનો કચ્ચરઘાણ નીકળી ગયો હતો.
ચમત્કારિક બચાવ
"રામ રાખે તેને કોણ ચાખે" એ કહેવત અહીં સાર્થક થતી જોવા મળી હતી. આટલી ઊંચાઈએથી ગાડી નીચે ખાબકી હોવા છતાં, ડ્રાઈવરને માત્ર સામાન્ય ઈજાઓ પહોંચી છે અને તે સુરક્ષિત છે. ગાડીની હાલત જોતા કોઈ માની ન શકે કે અંદર બેઠેલી વ્યક્તિ જીવિત બચી હશે.
પોલીસ તપાસ
અકસ્માત સર્જીને અજાણ્યો વાહન ચાલક ઘટનાસ્થળેથી નાસી છૂટવામાં સફળ રહ્યો હતો. ઘટનાની જાણ થતા જ વીરપુર પોલીસ કાફલો ઘટનાસ્થળે દોડી આવ્યો હતો. અજાણ્યા વાહન ચાલક વિરુદ્ધ ગુનો નોંધી તેની શોધખોળ શરૂ કરી છે. અકસ્માતને પગલે હાઈવે પર થયેલી ટ્રાફિકની સમસ્યા હળવી કરી હતી.
