અમદાવાદ NDPS કોર્ટનો મહત્ત્વપૂર્ણ ચુકાદો: નાઇજીરિયન ડ્રગ્સ કેરીયરને 15 વર્ષની કેદ-2 લાખનો દંડ

નાર્કોટિક્સ ડ્રગ્સ એન્ડ સાયકોટ્રોપિક સબ્સ્ટાન્સિસ (NDPS) એક્ટ હેઠળ ચાલતા એક જૂના કેસમાં અમદાવાદની સ્પેશિયલ NDPS કોર્ટે મહત્ત્વનો ચુકાદો આપ્યો છે.2018માં અમદાવાદ એરપોર્ટ પરથી પકડાયેલા નાઈજીરિયન નાગરિક ઝોહું એલેક્સિસ (Zohou Alexis)ને 15 વર્ષની સખત કેદ (Rigorous Imprisonment) અને 2 લાખ રૂપિયાનો દંડની સજા ફટકારવામાં આવી છે. આ ચુકાદો ડ્રગ્સ તસ્કરી વિરુદ્ધ કડક કાયદાકીય કાર્યવાહીનું પ્રતીક બન્યો છે, જે ગુજરાતમાં વધતા ઈન્ટરનેશનલ ડ્રગ્સ ટ્રાફિકિંગને રોકવા માટે મજબૂત સંદેશ આપે છે.

નાઇજીરિયન ડ્રગ્સ કેરીયરને 15 વર્ષની જેલની સજા 

આ કેસની શરૂઆત 2018ની ગરમીમાં થઈ હતી, જ્યારે અમદાવાદ ઈન્ટરનેશનલ એરપોર્ટ પરથી એક નાઈજીરિયન શખ્સને ડ્રગ્સ સાથે પકડવામાં આવ્યો હતો. 39 વર્ષીય ઝોહું એલેક્સિસ, જે નાઈજીરિયાનો રહેવાસી છે, તે તે સમયે એરપોર્ટ પરથી પસાર થઈ રહ્યો હતો. સ્પેશિયલ ઓપરેશન્સ ગ્રુપ (SOG) ક્રાઇમ બ્રાન્ચની ટીમે તપાસ દરમિયાન તેના હેન્ડબેગમાંથી કોકેઈનથી ભરેલી 73 કેપ્સ્યુલ્સ કબ્જે કરી હતી.આ કોકેઈનનું માર્કેટ વેલ્યુ આશરે 2.17 કરોડ રૂપિયા જેટલું હતું, જે ઈન્ટરનેશનલ ડ્રગ્સ માફિયાના મોટા નેટવર્કનો ભાગ હોવાનું જાણવા મળ્યું હતું.

પહેલા ત્રણ દિવસમાં 44 કેપ્સ્યુલ્સ મળ્યા હતા, પરંતુ વધુ તપાસમાં વધારાના 29 કેપ્સ્યુલ્સ પણ બહાર આવ્યા, જેનાથી કુલ 73 કેપ્સ્યુલ્સ થયા. પોલીસ અનુસાર, એલેક્સિસ પાસે એક નકલી પાસપોર્ટ પણ મળ્યો હતો, અને તે આ પહેલી વખત ડ્રગ્સ સ્મગલિંગ કરતો ન હતો. તપાસમાં જાણવા મળ્યું કે તે આફ્રિકન ડ્રગ્સ કાર્ટેલ માટે કામ કરતો હતો અને ભારતમાં કોકેઈનનું વિતરણ કરવા આવ્યો હતો. આ પકડ ગુજરાત પોલીસ માટે એક મોટી સફળતા હતી.

એલેક્સિસ વિરુદ્ધ NDPS એક્ટની કલમ 20 અને 27(A) હેઠળ કેસ નોંધાયો હતો. તપાસમાં NCB (નાર્કોટિક્સ કંટ્રોલ બ્યુરો) અને DRI (ડિરેક્ટોરેટ ઓફ રેવન્યુ ઈન્ટેલિજન્સ)ની પણ ભાગીદારી હતી. કોર્ટમાં 7 વર્ષથી વધુ સમય સુધી કેસ ચાલ્યો, જેમાં પુરાવા, સાક્ષીઓ અને લેબ રિપોર્ટ્સની તપાસ થઈ હતી.