પાવાગઢમાં માલવાહક રોપ-વેનો કંટ્રોલ ફેઇલ; ટ્રોલી અને મશીન નીચે પટકાયા, સદનસીબે જાનહાનિ ટળી

યાત્રાધામ પાવાગઢ ખાતે આસો નવરાત્રિના પવિત્ર પર્વ દરમિયાન મોટી સંખ્યામાં શ્રદ્ધાળુઓ શ્રી કાલિકા માતાજીના દર્શનાર્થે આવી રહ્યા છે. ભક્તોની ભારે ભીડ અને સુવિધાને ધ્યાનમાં રાખીને વહેલી સવારથી જ રોપ-વે સેવા કાર્યરત છે. તેવામાં માલવાહક રોપ-વેમાં અકસ્માતની ઘટના બની છે. જેમાં માચીથી ડુંગર પર સામાન લઈ જતી ટ્રોલીનું કંટ્રોલ ફેઇલ થતાં ટ્રોલી અને મશીન નીચે ધસી આવ્યા હતા અને રોપ-વેના ફાઉન્ડેશન સાથે અથડાયા હતા. સદનસીબે આ દુર્ઘટનામાં કોઈ જાનહાનિ થઈ નહોતી.

માલવાહક રોપ-વેનો કંટ્રોલ ખોરવાતાં ટ્રોલી અને મશીન નીચે પટકાયા

મળતી માહિતી મુજબ, પાવાગઢમાં ઉષા બ્રેકો કંપની સંચાલિત માલવાહક રોપ-વેમાં ડુંગર સુધી સામાન પહોંચાડવામાં આવતી ટ્રોલીનું કંટ્રોલ ફેઈલ થયું હતું. જેમાં રોપ-વે પરથી ટ્રોલી અને મશીન નીચ ધસી આવ્યા હતા. આ બનાવમાં કોઈને ઈજા કે જાનહાનિ થઈ નથી. ઘટનાની જાણ થતાં સ્થાનિક અધિકારીઓ, હાલોલના સબ-ડિવિઝનલ મેજિસ્ટ્રેટ(SDM) અને પોલીસનો કાફલો સ્થળ પર દોડી પહોંચ્યો હતો.

પેસેન્જર રોપ-વેની સેવા રાબેતા મુજબ ચાલુ

આ દુર્ઘટના માલવાહક રોપ-વેમાં સર્જાઈ છે. તેવામાં સમગ્ર મામલે તંત્રએ સ્પષ્ટતા કરી છે કે, પેસેન્જર રોપ-વેની સેવા રાબેતા મુજબ ચાલુ છે.

નવરાત્રિમાં પાવાગઢ રોપ-વે સેવાનો સમય

નવરાત્રિમાં મોટી સંખ્યામાં માઈભક્તો દર્શનાર્થે આવી રહ્યા છે, ત્યારે યાત્રાળુઓની સુગમતા માટે રોપ-વે સેવાની કામગીરીમાં પણ ખાસ આયોજન કરવામાં આવ્યું છે. સામાન્ય દિવસોમાં સવારે 5:00 વાગ્યાથી શરુ થતી રોપ-વે સેવા નવરાત્રિના તહેવાર દરમિયાન વહેલી સવારે 4:00 વાગ્યાથી જ કાર્યરત છે. ખાસ કરીને આસો નવરાત્રિના નોરતાના મહત્ત્વના દિવસો જેવા કે એકમ, ત્રીજ, સાતમ, આઠમ, નોમ, તેરસ, ચૌદસ અને પૂનમના દિવસે રોપ-વે સેવા સવારે 4:00 વાગ્યાથી શરૂ થઈને રાત્રિના 9:00 વાગ્યા સુધી સતત ચાલુ રાખવામાં આવશે.