ગોધરા NEET કૌભાંડ / 26 પરીક્ષાર્થીઓના વાલીઓને પોલીસે પાઠવ્યાં સમન્સ, વાલીઓ નથી આપી રહ્યાં જવાબ

Godhra NEET Scam : પંચમહાલ જિલ્લાના ગોધરામાં નીટની પરીક્ષામાં ચોરી કરાવવાના ષડયંત્ર બહાર આવ્યું હતું. ગોધરામાં આવેલી જય જલારામ સ્કૂલને પરીક્ષા કેન્દ્ર ફાળવવામાં આવ્યું હતું, જેમાં NEET પરીક્ષાર્થીઓને ચોરી કરાવીને પાસ કરાવવાંનું ષડ્યંત્ર બહાર આવ્યું હતું. 

કૌભાંડનો પર્દાફાશ થયા બાદ  જય જલારામ સ્કૂલના પરીક્ષા કેન્દ્રના સંચાલક તુષાર ભટ્ટ, શાળાના આચાર્ય પુરુષોત્તમ શર્મા અને ત્રણ એજન્ટો- પરશુરામ રોય, વિભોર આનંદ અને આરીફ વહોરા સહિત પાંચ લોકોની ધરપકડ કરવામાં આવી હતી.  તુષાર ભટ્ટ 26 વિદ્યાર્થીઓની યાદી સાથે ઝડપાયો હતો. તુષાર ભટ્ટની કારમાંથી 7 લાખ રૂપિયાની રોકડ પણ મળી આવી હતી.

તુષાર ભટ્ટ પાસેથી મળેલી 26 વિદ્યાર્થીઓની યાદીમાં ગોધરા પરીક્ષા કેન્દ્રના 6 અને વણાંકબોરી પરીક્ષા કેન્દ્રના 20 વિદ્યાર્થીઓના નામનો સમાવેશ થાય છે. વણાંકબોરી પરીક્ષા કેન્દ્રમાં બેઠેલા મોટાભાગના વિદ્યાર્થીઓ બિહાર, ઝારખંડ, મહારાષ્ટ્ર અને અન્ય રાજ્યોના હોવાનું પણ બહાર આવ્યું હતું. 

પોલીસ તેના માતાપિતાનો સંપર્ક કરવાનો પ્રયાસ કરી રહી છે, પરંતુ તેમના તરફથી કોઈ જવાબ મળ્યો નથી. તપાસ કરનારા અધિકારીઓ પાસે આમાંથી કેટલાક વિદ્યાર્થીઓના સંપૂર્ણ સરનામા પણ નહોતા.

પંચમહાલના નાયબ પોલીસ અધિક્ષક એન.વી. પટેલે જણાવ્યું હતું કે તેઓએ નેશનલ ટેસ્ટિંગ એજન્સી પાસેથી વિદ્યાર્થીઓની વિગતો માંગી હતી અને હવે વિદ્યાર્થીઓના સરનામા સહિતના દસ્તાવેજો મેળવી લીધા છે. અમે તેમના દસ્તાવેજોની વિગતોનો ઉપયોગ કરીને તપાસ માટે હાજર થવા માટે તેમને નવેસરથી સમન્સ મોકલીશું.

એન.વી. પટેલના જણાવ્યા મુજબ, રાજ્ય બહારના માત્ર એક વિદ્યાર્થીએ પોલીસ સાથે વાત કરી હતી અને તપાસ માટે એપોઇન્ટમેન્ટ માંગી હતી.