BZ GROUP દ્વારા 6000 કરોડનું કૌભાંડ..! CID ક્રાઇમે નોંધી ફરિયાદ, ભુપેન્દ્રસિંહ ઝાલા ભૂગર્ભમાં

CEO Bhupendra Sinh zala BZ Group scam: સાબરકાંઠા જિલ્લાના તલોદ તાલુકાના વાવડીમાં રહેતા BZ GROUPના CEO ભુપેન્દ્રસિંહ ઝાલાએ રોકાણની સામે ત્રણ વર્ષમાં બમણા અને સામાન્ય રોકાણની સામે ઉંચા વળતરની લાલચ આપીને રૂપિયા છ હજાર કરોડનું કૌભાંડ આચર્યું હોવાનો આક્ષેપ થતાં ગાંધીનગર સીઆઈડી ક્રાઈમની અલગ અલગ ટીમ દ્વારા સાબરકાંઠા, વડોદરા, ગાંધીનગર અને રાજસ્થાન સહિત કુલ સાત સ્થળો પર દરોડા પાડીને અનેક મહત્વના દસ્તાવેજ તેમજ કેસને લગતા પુરાવા એકઠા કરીને કાર્યવાહી કરી છે. શંકાસ્પદ વ્યવહારો અને કૌભાંડ મામલે ગાંધીનગર CID ક્રાઈમ દ્વારા BZ GROUP વિરુદ્ધ ફરિયાદ દાખલ કરવામાં આવી છે. 

• મંગળવારે સીઆઈડી ક્રાઈમના BZ GROUP પર દરોડા
• કૌભાંડનો મુખ્ય આરોપી ભુપેન્દ્રસિંહ ફરાર
• સાબરકાંઠા, અરવલ્લી અને ગાંધીનગર તેમજ વડોદરામાં આવેલી સાત જેટલી ઓફિસમાં દરોડા
• તપાસ કરતા એકાઉન્ટમાં 175 કરોડ રૂપિયાના વ્યવહાર મળી આવ્યા
• ભૂપેન્દ્ર ઝાલાએ ખરીદી છે હિંમતનગરની ગ્રોમોર કોલેજ
• BZ GROUPમાં મોટા અધિકારીઓ અને સરકારી શિક્ષકોનું સૌથી વધારે રોકાણ

BZ કૌભાંડ મામલે CIDએ આપી જાણકારી

રાજકુમાર પાંડિયન ADGP CID ક્રાઇમેં પ્રેસ કોન્ફરન્સ કરી જાણકારી આપી કે, “BZ GROUP અને BZ ફાયનાન્સિયલ સર્વિસ પર મંગળવારે CID દ્વારા રેડ કરવામાં આવી હતી. જેમાં મુખ્ય આરોપી ભૂપેન્દ્રસિંહ ઝાલા સામે ફરિયાદ નોંધવાની પ્રક્રિયા શરૂ છે. 1 મહિનાથી BZ GROUP અને BZ ફાયનાન્સિયલ સર્વિસની અલગ અલગ ઓફિસો પર સર્વેલન્સ ગોઠવવામાં આવ્યું હતું. BZ GROUP સંચાલિત BZ ફાયનાન્સિયલ સર્વિસ અનઅધિકૃત સંસ્થા છે જેમાં મહિના 3 ટકાથી લઇને વર્ષે 33 ટકા સુધીનું વળતર આપવાની લાલચ આપતા હતા. રેડ દરમિયાન રૂ.175 કરોડ રૂપિયાના ટ્રાન્જેક્શન મળી આવ્યા છે. BZ GROUP અને BZ ફાયનાન્સિયલ સર્વિસ દ્વારા લોભામણી સ્કીમ માટે શિક્ષક અને નિવૃત્ત સરકારી કર્મચારીઓને ટાર્ગેટ કરવામાં આવતા હતા. CIDને રેડ દરમિયાન 16.37 લાખ રોકડા, એગ્રીમેન્ટ અને 34 ડોક્યુમેન્ટ મળી આવ્યા છે. જે મામલે ફરિયાદ નોંધવાની કામગીરી શરૂ છે. અનંત દરજી નામનો એક એજન્ટ પકડાયો છે. 5 જેટલા લોકો તથા કર્મચારીઓની અટકાયત કરવામાં આવી છે. BZ ફાયનાન્સિયલ સર્વિસ દ્વારા એજન્ટને 5 થી 25 ટકા કમિશન આપવામાં આવતું હતું. સમગ્ર કૌભાંડ 6 હજાર કરોડથી ઓછું કે વધુ રકમનું પણ હોય શકે છે.”

સીઆઈડી ક્રાઈમને મળી હતી અરજી

ગાંધીનગર સીઆઈડી ક્રાઈમને થોડા દિવસ પહેલા એક અરજી મળી હતી કે સાબરકાંઠા જિલ્લાના વાવડીમાં રહેતા ભુપેન્દ્રસિંહ ઝાલા નામની વ્યક્તિએ BZ GROUP હેઠળ રોકાણની અલગ અલગ સ્કીમ રજૂ કરીને કરોડો રૂપિયાનું કૌભાંડ આચર્યું છે. જેના આધારે સીઆઈડી ક્રાઇમે BZ GROUP પર દરોડા પાડ્યા હતા. જેમાં જાણવા મળ્યું હતું કે ભુપેન્દ્રસિંહ ઝાલાએ બીઝેડ ફાઈનાન્સિયલ કંપનીમાં ત્રણ વર્ષ માટે નાણાંના રોકાણની ડબલ રકમ અને સામાન્ય રોકાણની સામે ઉંચા વ્યાજની ઓફર આપી હતી. આ માટે તેણે તલોદના રણાસણ, હિંમતનગર, વિજાપુર, મોડાસા, માલપુર, ગાંધીનગર, વડોદરા તેમજ રાજસ્થાનમાં ઓફિસ શરૂ કરીને એજન્ટોની મદદથી છ હજાર કરોડની રકમનું કૌભાંડ આચર્યું હતું. જે કેસની તપાસના અનુસંધાનમાં મંગળવારે સીઆઈડી ક્રાઈમે સાબરકાંઠા, અરવલ્લી અને ગાંધીનગર તેમજ વડોદરામાં આવેલી સાત જેટલી ઓફિસમાં સામુહિક દરોડા પાડીને કોમ્પ્યુટર, પ્રિન્ટર, લેપટોપ તેમજ ડોક્યુમેન્ટ જપ્ત કર્યા હતા. સાથેસાથે બે બેંક એકાઉન્ટ મળી આવ્યા હતા. જેમાં એક એકાઉન્ટમાં 175 કરોડ રૂપિયાના વ્યવહાર મળી આવ્યા હતા. જોકે પોલીસ દરોડા પાડે તે પહેલા જ આ કૌભાંડનો મુખ્ય આરોપી ભુપેન્દ્રસિંહ ફરાર થઈ ગયો હતો. સીઆઇડી ક્રાઈમે આશંકા સેવી છે કે BZ GROUP દ્વારા અંદાજિત 6000 કરોડનું કૌભાંડ આચરવામાં આવ્યું છે જેને લઈને વધુ તપાસ હાથ ધરી છે.

આરોપી ભૂપેન્દ્ર ઝાલા ફરાર

જોકે પોલીસ દરોડા પાડે તે પહેલાં જ પૉન્ઝી સ્કીમ થકી કરોડોનું કૌભાંડ આચરનારા બી-ઝેડ ગ્રુપનો CEO ભૂપેન્દ્રસિંહ ઝાલા ફરાર થઈ ગયો હતો. આ મામલે હાલ કંઈપણ કહેવા અંગે તપાસ અધિકારીઓએ ચુપકીદી સેવી છે. પરંતુ, આ કૌભાંડની તપાસમાં મસમોટા અને ચોંકાવનારા નામ સામે આવે તેવી સંભાવના છે.

આ પણ વાંચો: 6000 કરોડનું સ્કેમ : ગુજરાતમાં 7 જગ્યાએ BZ Group પર CID ક્રાઈમના દરોડા, મુખ્ય આરોપીના સીએમ-સીઆર સાથે ફોટો