Ahmedabad: સ્વાતંત્ર્ય દિવસે શહેર પોલીસની સુરક્ષા અને સમર્પણની પ્રતિબદ્ધતા

આજે 79મા સ્વાતંત્ર્ય દિવસે, અમદાવાદ શહેર પોલીસે દેશની આઝાદી માટે બલિદાન આપનારા શહીદોને શ્રદ્ધાંજલિ આપી અને શહેરની સુરક્ષા માટે ખડેપગે રહેવાની ખાતરી આપી. અમદાવાદ શહેર આજે દેશનું સૌથી સુરક્ષિત શહેર ગણાય છે, જેનું શ્રેય અમદાવાદ પોલીસની કાર્યક્ષમતાને જાય છે.

અમદાવાદ પોલીસે રથયાત્રા, ક્રિકેટ મેચ જેવા  મહત્ત્વના  કાર્યક્રમોમાં ઉત્કૃષ્ટ ટ્રાફિક વ્યવસ્થાપન અને સુરક્ષા પૂરી પાડી છે. પ્લેન ક્રેશ જેવી ગંભીર ઘટનામાં પણ પોલીસની કામગીરી પ્રશંસનીય રહી, જ્યારે દર્દીઓ માટે ગ્રીન કોરિડોર બનાવી તેમને સમયસર હોસ્પિટલ પહોંચાડવામાં આવ્યા.

 શહેરના અલગ-અલગ રૂટ પર CCTV કેમેરા લગાવવામાં આવ્યા છે, અને ખાનગી ક્ષેત્રે 22,000થી વધુ CCTV ઇન્સ્ટોલ કરવાની યોજના છે. ચાલુ વર્ષે અનેક બાંગ્લાદેશી ઘૂસણખોરો પકડાયા, અને ચંડોળા તળાવ ખાતે ડિમોલેશન કામગીરી દરમિયાન પોલીસ જવાનોની બહાદુરી નોંધપાત્ર રહી.

મહિલા સુરક્ષા માટે પોલીસે વિશેષ 'સી' ટીમ દરેક પોલીસ સ્ટેશનમાં કાર્યરત કરી છે. ટેકનોલોજીના વધારા સાથે સાયબર ક્રાઇમના કેસમાં વધારો થયો છે, જેને રોકવા પોલીસે જનજાગૃતિની અપીલ કરી. ટ્રાફિક વ્યવસ્થામાં પણ નોંધપાત્ર સુધારો જોવા મળ્યો છે, જેમાં છેલ્લા બે વર્ષમાં અકસ્માતોમાં 20% ઘટાડો નોંધાયો. પોલીસે નાગરિકોને ટ્રાફિક નિયમોનું પાલન કરવા વિનંતી કરી. આ ઉપરાંત, યુવાનો માટે સમર કેમ્પનું આયોજન કરી સમાજ સાથે જોડાણ મજબૂત કરવાનો પ્રયાસ કરાયો છે. 

અમદાવાદ પોલીસનું આ સમર્પણ શહેરને સુરક્ષિત અને સમૃદ્ધ બનાવવામાં મહત્વનું યોગદાન આપે છે, જે સ્વાતંત્ર્ય દિવસની ઉજવણીને વધુ અર્થપૂર્ણ બનાવે છે.