Dahod news: ચાઈનીઝ દોરીથી બાઈક સવારનું ગળુ કપાયું, ગંભીર ઇજાગ્રસ્ત યુવકને આવ્યા 50 ટાંકા

ઉત્તરાયણ પર્વના થોડા દિવસો બાકી છે, ત્યારે રાજ્યમાં પ્રતિબંધિત ચાઈનીઝ દોરીના વેચાણ ગુજરાત પોલીસ દ્વારા કાર્યવાહી કરવામાં આવી રહી છે. તેવામાં દાહોદમાં ચાઈનીઝ દોરીથી યુવકનું ગળુ કપાયું હોવાની ઘટના સામે આવી છે. યુવકને હાથ અને ગળાના ભાગે ગંભીર ઈજા પહોંચતા સારવાર માટે હોસ્પિટલ ખસેડવામાં આવ્યો હતો. જ્યાં યુવકને ગળાના ભાગે 50 કરતાં વધુ ટાંકા આવ્યા હતા. 

દાહોદમાં ચાઈનીઝ દોરી વાગતાં બાઈક સવારને 50 ટાંકા આવ્યા

મળતી માહિતી મુજબ, દાહોદ શહેરના ગરબાડા ચોકડી નજીક ચાઈનીઝ દોરીથી બાઈક સવાર યુવકનું ગળું કપાઈ જવાની ગંભીર ઘટના બની છે. ઘટનામાં ગળાના ભાગે ચાઈનીઝ દોરી વાગતાં યુવક લોહીલુહાણ થયો હતો. યુવક પોતાના ઘરે જઈ રહ્યો હતો, આ દરમિયાન અચાનક દુર્ઘટના સર્જાઈ હતી.

ઘટનાને પગલે આસપાસના લોકોએ તાત્કાલિક ઈજાગ્રસ્ત યુવકને સારવાર અર્થે હોસ્પિટલ ખસેડ્યો હતો. ડૉક્ટરના જણાવ્યા મુજબ, યુવકના ગળાના ભાગે અંદાજે 50 ટકા જેટલાં ટાંકા આવ્યા હતા. 

સમગ્ર મામલે યુવકના પરિવારજનોએ શહેરમાં પ્રતિબંધિત ચાઈનીઝ દોરી સહેલાઈથી મળતી આવતી હોવાનો ગંભીર આક્ષેપ કર્યો હતો. પરિવારજનોએ ચાઈનીઝ દોરી વેચતાં વેપારીઓ સામે સરકાર કડક કાર્યવાહી કરે તેવી માગ કરી છે. 

ઉત્તરાયણ પર્વને પગલે શહેરમાં પ્રતિબંધિત ચાઈનીઝ દોરીના વેચાણ સામે ગુજરાત પોલીસ દ્વારા રાજ્યભરમાં કાર્યવાહી શરુ કરવામાં આવી છે. બે દિવસ પહેલા અમદાવાદ SOGએ અઢી કરોડથી વધુની કિંમતની ચાઈનીઝ દોરી ઝડપી પાડી હતી. વાપી અને સેલવાસમાં ચાઈનીઝ દોરીનું કનેક્શન સામે આવ્યું હતું. જણાવી દઈએ કે, ગુજરાતમાં ચાઈનીઝ દોરી પર પ્રતિબંધ છે. આવી દોરી રાખવી કે વેચવી ગુનો છે. કારણ કે ચાઈનીઝ દોરીને કારણે વાહનચાલકોના અકસ્માત તેમજ પશુ પક્ષીઓના જીવને પણ જોખમ થતું હોય છે.