વીજ કટોકટીની અસર દિવાળી પર પણ: અમદાવાદમાં આ વર્ષે લાઇટિંગમાં AMCનો મોટો કાપ, માત્ર 7 સ્થળોએ જ થશે રોશની

ગુજરાતમાં ચાલી રહેલી વીજળીની અછત વચ્ચે અમદાવાદ મ્યુનિસિપલ કોર્પોરેશન (AMC)એ દિવાળીના લાઇટિંગ આયોજનમાં મોટો ઘટાડો કરવાનો નિર્ણય લીધો છે. દર વર્ષે દિવાળી દરમિયાન શહેરની સરકારી અને હેરિટેજ ઇમારતો, ટ્રાફિક સર્કલો, બ્રિજ અને અંડરપાસને રોશનીથી શણગારવામાં આવે છે, પરંતુ આ વર્ષે વીજળીની બચતને ધ્યાનમાં રાખીને માત્ર સાત સ્થળોએ જ લાઇટિંગ કરવામાં આવશે. ગુરુવારે મળેલી AMCની સ્ટેન્ડિંગ કમિટીની બેઠકમાં આ નિર્ણય લેવામાં આવ્યો હતો.

માત્ર 7 સ્થળોએ જ દિવાળી લાઇટિંગ

સ્ટેન્ડિંગ કમિટીના ચેરમેન કમલેશ પટેલે જણાવ્યું હતું કે અગાઉ સાબરમતી નદીના બ્રિજ, ટ્રાફિક સર્કલો, અંડરપાસ અને સરકારી ઇમારતોને રોશનીથી શણગારવામાં આવતી હતી. જોકે, આ વર્ષે ધનતેરસથી લાભપાંચમ સુધી માત્ર સાબરમતી નદીના છ બ્રિજ અને નગરદેવી ભદ્રકાળી માતાના મંદિરને જ લાઇટિંગથી શણગારવામાં આવશે.

લાઇટિંગના સમયમાં પણ ઘટાડો

અગાઉ દિવાળી દરમિયાન લાઇટિંગ સાંજે 7 વાગ્યાથી બીજા દિવસે સવારે 7 વાગ્યા સુધી ચાલુ રાખવામાં આવતું હતું. પરંતુ આ વર્ષે દિવાળી અને બેસતા વર્ષ સિવાયના દિવસોમાં રાત્રે 1 વાગ્યે જ લાઇટ બંધ કરી દેવામાં આવશે. આમ, વીજળીની બચત માટે લાઇટિંગના સ્થળો ઉપરાંત તેના સમયગાળામાં પણ ઘટાડો કરવામાં આવ્યો છે.

પાણીનો બગાડ અટકાવવા ગેરકાયદેસર કનેક્શનો સામે કાર્યવાહી

સ્ટેન્ડિંગ કમિટીની બેઠકમાં પાણીના બગાડને અટકાવવા પણ મહત્વનો નિર્ણય લેવામાં આવ્યો છે. શહેરમાં જ્યાં પાણીનો વપરાશ વધુ છે તે વિસ્તારોમાં તપાસ કરવાની સૂચના આપવામાં આવી છે. ખાસ કરીને કાર વોશિંગ સ્ટેશનો, પીજી (PG) અને મોટી સંખ્યામાં રૂમ ધરાવતી લોજિંગ-બોર્ડિંગ સુવિધાઓમાં પાણીનાં કનેક્શન કાયદેસર છે કે નહીં તેની તપાસ કરવામાં આવશે. તપાસ દરમિયાન ગેરકાયદેસર કનેક્શન મળી આવશે તો તેને કાપી નાખવાની કાર્યવાહી કરવામાં આવશે.

મીઠાઈ-ફરસાણના વેપારીઓ માટે રેપિડ ટેસ્ટિંગ કીટ ફરજિયાત

દિવાળીના તહેવાર દરમિયાન માવાની મીઠાઈઓની ગુણવત્તા જાળવવા AMCએ પણ પગલાં લીધાં છે. રૂ. 5 લાખથી વધુનું ટર્નઓવર ધરાવતા મીઠાઈ અને ફરસાણના વેપારીઓ માટે રેપિડ ટેસ્ટિંગ કીટ રાખવી ફરજિયાત કરવામાં આવી છે. આ વ્યવસ્થાનો હેતુ ગ્રાહકો દુકાન પર જ માવાની મીઠાઈની ગુણવત્તા ચકાસી શકે તેવો છે. એક ટેસ્ટિંગ કીટની કિંમત અંદાજે રૂ. 3,000 છે. હાલમાં શહેરના 350 વેપારીઓ પાસે આવી કીટ ઉપલબ્ધ હોવાનું જણાવાયું છે.

સોલા STP દુર્ઘટનાની તપાસના આદેશ

બીજી તરફ, સોલા સ્થિત સુએજ ટ્રીટમેન્ટ પ્લાન્ટ (STP)માં બે કામદારોનાં મોતની ઘટના અંગે પણ સ્ટેન્ડિંગ કમિટીમાં ચર્ચા કરવામાં આવી હતી. કમિટીના ચેરમેને આ ઘટનાને દુઃખદ ગણાવી કોન્ટ્રાક્ટર સામે કાર્યવાહી કરવાની સાથે જવાબદાર અધિકારીઓની જવાબદારી પણ નક્કી કરવાની વાત કરી હતી. તેમણે જણાવ્યું હતું કે જો સુરક્ષાનાં સાધનોનો યોગ્ય ઉપયોગ કરવામાં આવ્યો હોત તો આ દુર્ઘટના ટાળી શકાઈ હોત. આ મામલે તપાસના આદેશ આપવામાં આવ્યા છે.