VIDEO/ વાઘોડિયા: નદીમાં પાણી પીવા ઉતરેલા યુવકને મગર ખેંચી ગયો

Vadodara Crocodile Attack: વડોદરાના વાઘોડિયા તાલુકાના કાગડીપુરા ગામે મગરના હુમલાની એક અત્યંત ભયાનક ઘટના સામે આવી છે. દેવ નદીમાં પાણી લેવા ગયેલા એક યુવકને મગર ખેંચી ગયો હતો અને કલાકો સુધી તેનો મૃતદેહ મોઢામાં દબોચીને નદીમાં ફરતો રહ્યો હતો. આખરે આજે (આઠમી મે) સવારે મગરે મૃતદેહ છોડી દેતા ગ્રામજનોએ ભારે જહેમત બાદ તેને બહાર કાઢ્યો હતો.

શું હતી સમગ્ર ઘટના?

મળતી માહિતી અનુસાર, વાઘોડિયાના વ્યારા નજીક આવેલા કાગડીપુરા ગામે રહેતો મિથુન વસાવા નામનો યુવક ગઈકાલે (સાતમી મે) બપોરે દેવ નદીના કિનારે પાણી લેવા માટે ગયો હતો. આ દરમિયાન નદીમાં ઓતરાઈને બેઠેલા વિશાળકાય મગરે અચાનક હુમલો કરી મિથુનને ઉંડા પાણીમાં ખેંચી ગયો હતો.

આ ઘટનાની જાણ થતાં જ વડોદરા ફાયર બ્રિગેડ અને વન વિભાગની ટીમ ઘટનાસ્થળે દોડી આવી હતી. જોકે, મગર યુવકનો મૃતદેહ લઈને આખી નદીમાં આટાફેરા મારી રહ્યો હતો. ઘણી વખત મગર સપાટી પર આવતો, પરંતુ ટીમ નજીક પહોંચે તે પહેલાં જ મૃતદેહ સાથે ઉંડા પાણીમાં ગરકાવ થઈ જતો હતો. સાંજ પડી જતાં અને અંધારું થતાં રેસ્ક્યુ કામગીરી મુલતવી રાખવાની ફરજ પડી હતી.

આજે સવારે મગરે મૃતદેહ છોડ્યો

આજે સવારે જ્યારે ગ્રામજનો નદી કિનારે એકઠા થયા ત્યારે મગરે યુવકનો મૃતદેહ છોડી દીધો હોવાનું માલૂમ પડ્યું હતું. મિથુનનો મૃતદેહ પાણીની સપાટી પર તરતો દેખાતા જ ગ્રામજનો હિંમતપૂર્વક નદીમાં ઉતર્યા હતા. જ્યારે ગ્રામજનો મૃતદેહ બહાર કાઢવાની પ્રયત્ન કરી રહ્યા હતા, ત્યારે નદીમાં રહેલા અન્ય મગરો પણ મૃતદેહની આસપાસ એકઠા થવા લાગ્યા હતા. જોકે, ગ્રામજનોએ ડર્યા વગર મોટા અવાજે હાકોટા પાડીને મગરોને ભગાડ્યા હતા અને ઝડપભેર મિથુનના દેહને કિનારે લાવ્યા હતા.

યુવકનો મૃતદેહ બહાર આવતા જ તેના પરિજનોમાં કરુણ આક્રંદ છવાઈ ગયો હતો. વડોદરાની નદીઓમાં મગરોની વધતી સંખ્યા અને વારંવાર થતા જીવલેણ હુમલાઓને કારણે સ્થાનિકોમાં હવે ફફડાટ સાથે રોષ પણ જોવા મળી રહ્યો છે.