જાપાનમાં 7.4ની તીવ્રતાનો પ્રચંડ ભૂકંપ: સુનામીની ચેતવણી, દરિયાકાંઠાના વિસ્તારો ખાલી કરવા આદેશ

ઉત્તરી જાપાનમાં સોમવારે ભૂકંપના જોરદાર આંચકા અનુભવાયા છે. રિક્ટર સ્કેલ પર ભૂકંપની તીવ્રતા 7.4 નોંધાઈ છે. ભૂકંપના આ પ્રચંડ આંચકા બાદ જાપાનની હવામાન વિભાગની એજન્સીએ દરિયાકાંઠાના વિસ્તારોમાં સુનામીની ચેતવણી જારી કરી છે. પ્રશાસન દ્વારા લોકોને તાત્કાલિક દરિયાકાંઠાના વિસ્તારો છોડીને સુરક્ષિત અને ઊંચાઈવાળા સ્થળો પર જવા માટે સૂચના આપવામાં આવી છે.

ભૂકંપનું કેન્દ્ર 

અહેવાલો અનુસાર, ઉત્તર જાપાનમાં સાનરિકુ કિનારા નજીક જોરદાર ભૂકંપ અનુભવાયો હતો. ભૂકંપ દરિયા કિનારા પર આવ્યો હતો. સ્થાનિક સમય મુજબ સાંજે આશરે 4:53 વાગ્યે (07:53 GMT) ભૂકંપના આંચકા અનુભવાયા હતા. ભૂકંપનું કેન્દ્ર સમુદ્રતળ નીચે લગભગ 10 કિલોમીટર (6 માઇલ) ની ઊંડાઈએ હતું. જાપાનના જાહેર પ્રસારણકર્તા, NHK એ અહેવાલ આપ્યો છે કે આ પ્રદેશમાં 3 મીટર (10 ફૂટ) ઊંચાઈ સુધી સુનામી (સમુદ્ર મોજા) આવવાની આશંકા છે અને તે ખૂબ જ ટૂંક સમયમાં આ વિસ્તારને અસર કરી શકે છે. સુનામીની ચેતવણી પહેલાથી જ જારી કરવામાં આવી છે, અને સ્થાનિક અધિકારીઓએ રહેવાસીઓને સતર્ક રહેવા અને ઊંચી જમીન પર જવાની સલાહ આપી છે.

સુનામીની ચેતવણી

જાપાન મેટ્રોલોજિકલ એજન્સીએ જણાવ્યું છે કે દરિયા કિનારે હાઈ એલર્ટ જાહેર કરવામાં આવ્યું છે. દરિયાકાંઠાના રહેવાસીઓને ચેતવણી આપવામાં આવી છે કે તેઓ મોજાના કિનારા સુધી પહોંચવાની રાહ જોયા વિના સુરક્ષિત સ્થળોએ ખસી જાય.

પરમાણુ પ્લાન્ટ્સની સ્થિતિ

જાપાનની ન્યુક્લિયર રેગ્યુલેટરી ઓથોરિટી દ્વારા અસરગ્રસ્ત વિસ્તારોમાં આવેલા પરમાણુ પાવર પ્લાન્ટ્સની તપાસ કરવામાં આવી રહી છે. અત્યાર સુધીના અહેવાલો મુજબ, કોઈ પણ પ્લાન્ટમાં કોઈ અસાધારણ ખામી કે રેડિયેશન લીકેજ નોંધાયું નથી, જે રાહતના સમાચાર છે.

બચાવ કામગીરી અને જાનહાનિ

સરકાર દ્વારા ડિઝાસ્ટર કંટ્રોલ રૂમ સક્રિય કરવામાં આવ્યો છે. રાહત અને બચાવ કામગીરી માટે ટીમો રવાના કરી દેવામાં આવી છે. હજુ સુધી જાનહાનિ કે સંપત્તિના નુકસાનના સત્તાવાર આંકડા જાહેર થયા નથી, પરંતુ ભૂકંપની તીવ્રતા જોતા મોટા પાયે નુકસાનની ભીતિ સેવાઈ રહી છે.