ઈરાનની ૩૦ હજાર મહિલા 'નિન્જા વોરિયર્સ': શું અમેરિકા સામે યુદ્ધના મેદાને ઉતરશે

ઈરાનની રાજધાની તેહરાનમાં તાલીમ લઈ રહેલી મહિલા નિન્જા વોરિયર્સ (Ninja Warriors) હાલ ચર્ચામાં છે. અહીંની કુનોઈચી નિન્જા સ્કૂલની મહિલાઓના શાનદાર કરતબો અને માર્શલ આર્ટ્સના વીડિયો સોશિયલ મીડિયા પર વાયરલ થઈ રહ્યા છે. અંદાજે 30 હજાર મહિલાઓ આ સ્કૂલમાં તાલીમ લઈ ચૂકી છે. ત્યારે સવાલ ઉઠી રહ્યો છે કે શું આ મહિલાઓ અમેરિકાને ટક્કર આપવા તૈયાર થઈ રહી છે? જોકે, હકીકતમાં આ સ્કૂલનો મુખ્ય ઉદ્દેશ્ય આત્મરક્ષા, શારીરિક તંદુરસ્તી અને આત્મવિશ્વાસ વધારવાનો છે, સૈન્ય કાર્યવાહી કરવાનો નહીં.

1989માં થઈ હતી સ્કૂલની શરૂઆત

અહેવાલ મુજબ, કુનોઈચી નિન્જા સ્કૂલની સ્થાપના વર્ષ 1989માં કોચ અકબર ફરાજીએ કરી હતી. કુનોઈચી જાપાની ભાષાનો શબ્દ છે, જેનો અર્થ મહિલા નિન્જા થાય છે. શરૂઆતમાં મર્યાદિત સંસાધનો સાથે શરૂ થયેલો આ કાર્યક્રમ સમય જતાં વિસ્તર્યો હતો. રાષ્ટ્રીય માર્શલ આર્ટ્સ ફેડરેશન હેઠળ ચાલતા આ તાલીમ કાર્યક્રમમાં મહિલાઓને વિવિધ શારીરિક કૌશલ્યો શીખવવામાં આવે છે.

હવામાં કરતબો અને હથિયારોની તાલીમ

સ્કૂલની મહિલાઓ તાલીમ દરમિયાન નાનાં-મોટાં કરતબો, શરીરનું સંતુલન જાળવવું, સ્ટાફ એટલે કે લાંબી લાકડી વડે પ્રેક્ટિસ અને ટીમવર્ક જેવી પ્રવૃત્તિઓ કરે છે. વાયરલ વીડિયોમાં મહિલાઓ એકબીજાને ઊંચકીને સમન્વય સાથે કરતબો કરતી જોવા મળે છે.

નિન્જુત્સુ (Ninjutsu) તાલીમમાં પરંપરાગત તકનીકો, શરીર પર નિયંત્રણ, એકાગ્રતા અને આત્મરક્ષાની પદ્ધતિઓનો સમાવેશ થાય છે. આ અભ્યાસ મહિલાઓને સંભવિત જોખમો સામે વધુ સજાગ બનવામાં મદદ કરી શકે છે.

મહિલાઓમાં વધે છે આત્મવિશ્વાસ

આ સ્કૂલ માત્ર માર્શલ આર્ટ્સ શીખવવાનું કેન્દ્ર નથી, પરંતુ મહિલાઓના સશક્તિકરણનું માધ્યમ પણ બની રહી છે. નિયમિત તાલીમથી શારીરિક તંદુરસ્તી, લવચીકતા, સંતુલન અને માનસિક શિસ્ત વિકસે છે. વિવિધ ઉંમરની મહિલાઓ એકસાથે અભ્યાસ કરતી હોવાથી તેમનામાં સહકાર અને ટીમવર્કની ભાવના પણ મજબૂત બને છે.

શું અમેરિકા સામે લડશે આ મહિલા વોરિયર્સ?

ઈરાન અને અમેરિકા વચ્ચેના તણાવને કારણે ‘30 હજાર મહિલા વોરિયર્સ’નો મુદ્દો લોકોનું ધ્યાન ખેંચી રહ્યો છે. જોકે, આ મહિલાઓને અમેરિકાની સામે લડવા માટે તૈયાર કરવામાં આવી રહી છે એવો કોઈ પુરાવો અહેવાલમાં આપવામાં આવ્યો નથી. તેમની તાલીમનો મુખ્ય હેતુ માર્શલ આર્ટ્સ, આત્મરક્ષા, ફિટનેસ અને આત્મવિશ્વાસ વધારવાનો છે.

સોશિયલ મીડિયા પર તેમના પ્રદર્શનને કારણે આ સ્કૂલને આંતરરાષ્ટ્રીય ઓળખ મળી રહી છે. આ મહિલાઓની કહાની દર્શાવે છે કે યોગ્ય તાલીમ અને તક મળે તો મહિલાઓ પણ શારીરિક કૌશલ્ય અને શિસ્તના ક્ષેત્રમાં નોંધપાત્ર સિદ્ધિ મેળવી શકે છે.