ભારતે ફરી કાઢી પાકિસ્તાનની ઝાટકણી! UNSCમાં આતંકવાદ સામે ઉઠાવ્યો અવાજ

ભારતે સંયુક્ત રાષ્ટ્ર સુરક્ષા પરિષદ (UNSC)માં આતંકવાદ સામે અવાજ ઉઠાવ્યો છે. સંયુક્ત રાષ્ટ્રમાં ભારતના કાયમી પ્રતિનિધિ, પર્વતાનેની હરીશે આડકતરી રીતે પાકિસ્તાનનો ઉલ્લેખ કરતા કહ્યું કે ભારત સરહદ પારથી થતા આતંકવાદ અને ગેરકાયદેસર હથિયારોની દાણચોરીનો ભોગ બન્યું છે.

UNSC ખાતે ભારતનું કડક વલણ

હરીશે કહ્યું, "ભારત દાયકાઓથી આતંકવાદનો ભોગ બની રહ્યું છે. સરહદ પારથી આવતા ગેરકાયદેસર હથિયારો અને હવે ડ્રોનનો ઉપયોગ આતંકવાદને વેગ આપી રહ્યો છે."

તેમણે ભાર મૂક્યો કે સુરક્ષા પરિષદે આતંકવાદી જૂથોને શસ્ત્રો પૂરા પાડનારાઓ સામે શૂન્ય સહિષ્ણુતા દાખવવી જોઈએ. ભારતે ધ્યાન દોર્યું કે નાના હથિયારો અને દારૂગોળાની દાણચોરી આતંકવાદી સંગઠનોને જીવંત રાખે છે. આ જૂથોને શસ્ત્રો મળતા રહે છે, જે સ્પષ્ટપણે દર્શાવે છે કે કોઈ તેમને સહાય, પૈસા અથવા ટેકો આપી રહ્યું છે. હરીશે કહ્યું કે સુરક્ષા પરિષદે તમામ પ્રકારના આતંકવાદ અને તેના સમર્થકો સામે કડક કાર્યવાહી કરવી જોઈએ.

'શસ્ત્ર પ્રતિબંધોનો યોગ્ય ઉપયોગ થવો જોઈએ'

ભારતે જણાવ્યું હતું કે યુએનએસસી દ્વારા લાદવામાં આવેલા શસ્ત્ર પ્રતિબંધો સંઘર્ષગ્રસ્ત વિસ્તારોમાં શસ્ત્રોના પુરવઠાને રોકવા માટે એક મહત્વપૂર્ણ માધ્યમ છે. તેનો ન્યાયી અને સતત અમલ થવો જોઈએ. નાના શસ્ત્રોની દાણચોરી અને ગાયબ થવું આંતરરાષ્ટ્રીય શાંતિ માટે નોંધપાત્ર ખતરો છે.

ભારતે જણાવ્યું હતું કે, હથિયારોની દાણચોરી અટકાવવા, નેટવર્કને વિક્ષેપિત કરવા, સરહદ અને કસ્ટમ કામગીરીનું સંકલન કરવા અને ગુપ્ત માહિતી શેર કરવા માટે દેશો વચ્ચે સહયોગ જરૂરી છે. યુએન પ્રોગ્રામ ઓફ એક્શન (PoA) અને ઇન્ટરનેશનલ ટ્રેસિંગ ઇન્સ્ટ્રુમેન્ટ (ITI)ને મજબૂત બનાવવા માટે રાષ્ટ્રીય કાયદા, નિકાસ નિયંત્રણો અને ક્ષમતા નિર્માણ પર ભાર મૂકવો જોઈએ.

હરીશે કહ્યું, "ભારત નાના હથિયારોને આતંકવાદી જૂથો સુધી પહોંચતા અટકાવવા માટે સંપૂર્ણપણે પ્રતિબદ્ધ છે. તે આતંકવાદ સામેની વૈશ્વિક લડાઈમાં યોગદાન આપવાનું ચાલુ રાખશે."

યુએન સેક્રેટરી-જનરલના અહેવાલને ટાંકીને, હરીશે કહ્યું કે નબળા વેરહાઉસ, ઢીલી સરહદ સુરક્ષા અને દાણચોરી નેટવર્ક આતંકવાદીઓને શસ્ત્રોની સપ્લાયને સરળ બનાવે છે. ઘરે બનાવેલા શસ્ત્રો ટ્રેસિંગને વધુ મુશ્કેલ બનાવે છે.