IND vs IRE / મેચ જીત્યા બાદ પણ ખુશ નથી રોહિત શર્મા, આ અંગે વ્યક્ત કરી ચિંતા

ભારતીય ટીમે T20 વર્લ્ડ કપની પોતાની પ્રથમ મેચમાં આયર્લેન્ડને 8 વિકેટે હરાવ્યું છે. પરંતુ આ મેચે ભારતની ચિંતા વધારી દીધી છે. ટીમ ઈન્ડિયાની ચિંતા પિચને લઈને છે. આયર્લેન્ડ સામેની મેચમાં પિચ પર અમર્યાદિત ઉછાળ જોવા મળ્યા હતા. જેના કારણે રોહિત શર્મા ઈજાગ્રસ્ત થયો હતો અને રિષભ પંત પણ ઈજાગ્રસ્ત થયો હતો. મેચ બાદ રોહિતે પિચને લઈને નિવેદન આપ્યું છે. એક રીતે તેણે ચિંતા વ્યક્ત કરી છે.

રોહિતે આયર્લેન્ડ સામે 52 રનની ઈનિંગ રમી હતી. તેણે 37 બોલનો સામનો કર્યો અને તેની ઈનિંગમાં ચાર ચોગ્ગા અને ત્રણ છગ્ગા ફટકાર્યા હતા. પંતે અણનમ 36 રન બનાવ્યા હતા. ભારતીય બોલરોએ આ પીચ પર આયર્લેન્ડની ટીમને 96 રનમાં આઉટ કરી દીધી હતી અને ત્યારબાદ 12.2 ઓવરમાં બે વિકેટ ગુમાવીને ટાર્ગેટ હાંસલ કર્યો હતો.

રોહિતે પીચ વિશે જણાવ્યું 

આ મેચ ન્યૂયોર્કના નસાઉ ઈન્ટરનેશનલ ક્રિકેટ સ્ટેડિયમમાં રમાઈ હતી. આ મેદાન 100 દિવસમાં તૈયાર કરવામાં આવ્યું છે. અહીં ડ્રોપ-ઈન પિચોનો ઉપયોગ કરવામાં આવ્યો છે. રોહિતે કહ્યું કે, પિચ હજુ સારી રીતે સેટલ નથી થઈ. મેચ બાદ રોહિતે કહ્યું, "તે એક નવું મેદાન છે, નવી જગ્યા છે. અહીં કેવી રીતે રમવું તે જોવા માંગીએ છીએ. પિચ હજી સ્થિર નથી થઈ. આ પિચને ઘણી મદદ મળી છે."

રોહિતે કહ્યું કે તે અહીં ચાર સ્પિનર્સને રમાડવાનું વિચારી પણ શકતો નથી. તેણે કહ્યું, "મને નથી લાગતું કે અમે અહીં ચાર સ્પિનર્સ સાથે રમી શકીશું. જ્યારે સ્થિતિ ફાસ્ટ બોલરોના પક્ષમાં હશે ત્યારે અમે તેમને ટીમમાં રાખીશું."

પાકિસ્તાન સામેના મેચ પર શું કહ્યું?

ભારતે તેની આગામી મેચ પાકિસ્તાન સામે રમવાની છે. જ્યારે રોહિતને આ મેચ વિશે પૂછવામાં આવ્યું ત્યારે તેણે કહ્યું, "મને ખબર નથી કે પિચમાંથી શું અપેક્ષા રાખવી, પરંતુ અમે એમ માનીને તૈયારી કરીશું કે પરિસ્થિતિ આવી જ રહેશે. તે મેચ એવી છે કે જ્યાં તમામ 11 ખેલાડીઓને જીતવા માટે યોગદાન આપવાનું હોય છે."