VIDEO: CSK vs PBKS / ચેન્નાઈનો કિલ્લો ભેદવા ઉતરશે પંજાબ, ગાયકવાડની ટીમ પહેલી જીતની શોધમાં
છેલ્લું અપડેટ : 03 Apr 2026
IPLની 19મી સિઝનમાં પોતાની પહેલી મેચમાં રાજસ્થાન રોયલ્સ સામે મોટી હાર બાદ ચેન્નાઈ સુપર કિંગ્સ (CSK) હવે પંજાબ કિંગ્સ (PBKS) નો સામનો કરશે. આ મેચ આજે (3 એપ્રિલ) ચેન્નાઈના ચેપોક સ્ટેડિયમમાં રમાશે, જે ચેન્નાઈનો ગઢ છે, પરંતુ આ મેચ જીતવા માટે તેને રમતના દરેક વિભાગમાં સારું પ્રદર્શન કરવાની જરૂર પડશે.
CSKની પહેલી મેચમાં નિરાશાજનક શરૂઆત થઈ હતી. તેની યુવા ટીમ ગુવાહાટીમાં કોઈપણ વિભાગમાં સારું પ્રદર્શન કરવામાં નિષ્ફળ ગઈ અને રાજસ્થાન સામે કારમી હારનો સામનો કરવો પડ્યો. CSK હવે તે હારને પાછળ છોડીને પોતાના અભિયાનની નવી શરૂઆત કરવાનો પ્રયાસ કરશે. તાજેતરના T20 વર્લ્ડ કપ દરમિયાન ચેન્નાઈની પિચના વર્તનને ધ્યાનમાં લેતા, તે બેટિંગ માટે સારી વિકેટ હોવી જોઈએ.
એમએસ ધોની બહાર રહેશે
CSKનો સ્ટાર ખેલાડી મહેન્દ્ર સિંહ ધોની ગુવાહાટી નહતો ગયો, કારણ કે તે પગની ઈજામાંથી સ્વસ્થ થઈ રહ્યો છે. જોકે, તે પંજાબ કિંગ્સ સામેની મેચ માટે ડગઆઉટમાં રહે તેવી શક્યતા છે, જેનાથી કેપ્ટન ઋતુરાજ ગાયકવાડને ફાયદો થશે. સંજુ સેમસન CSK માટે પોતાની પહેલી મેચમાં ખાસ પ્રભાવ પાડવા નિષ્ફળ ગયો અને તે સુધારો કરવા માટે ઉત્સુક હશે.
ડેવાલ્ડ બ્રેવિસ પર સસ્પેન્સ યથાવત
રાજસ્થાન રોયલ્સ સામેની મેચ માટે CSK ડેવાલ્ડ બ્રેવિસની સેવાઓ નહતું મેળવી શક્યું, તે સાઈડ સ્ટ્રેનમાંથી સંપૂર્ણપણે સ્વસ્થ થયો છે કે નહીં તે હજુ પણ સ્પષ્ટ નથી. ટોપ ઓર્ડરના બેટ્સમેનોની બિનઅસરકારકતાને કારણે સરફરાઝ ખાનને ઈમ્પેક્ટ પ્લેયર તરીકે લાવવામાં આવ્યો હતો, પરંતુ તે તેનો લાભ લેવામાં નિષ્ફળ ગયો, જોકે તે આરામદાયક દેખાતો હતો.
જેમ જેમ ટુર્નામેન્ટ આગળ વધશે, તેમ તેમ કાર્તિક શર્મા જેવા યુવા ખેલાડીઓ પર વધુ અપેક્ષાઓ રાખવામાં આવશે. બોલિંગની દૃષ્ટિએ મેટ હેનરી અને નૂર અહેમદ જેવા બોલર્સ વૈભવ સૂર્યવંશીની આક્રમક બેટિંગની તુલનામાં ફિક્કા પડ્યા હતા. તેઓ સુધારો કરવા માટે આતુર હશે.
ગુજરાત સામે પંજાબની જીત
પંજાબ કિંગ્સની વાત કરીએ તો તેણે ગુજરાત ટાઈટન્સ સામે જીતવા માટે કેટલીક મુશ્કેલ પરિસ્થિતિઓને પાર કરી હતી. તેને ઓસ્ટ્રેલિયાના કૂપર કોનોલી તરીકે વિશ્વસનીય નંબર ત્રણ બેટ્સમેન મળ્યો છે. તેણે ટીમને ખરાબ શરૂઆતથી બચાવવામાં અને પાછલી મેચમાં જીત મેળવવામાં મુખ્ય ભૂમિકા ભજવી હતી.
પંજાબ કિંગ્સની બોલિંગ પણ મજબૂત દેખાય છે. અનુભવી સ્પિનર યુઝવેન્દ્ર ચહલે ટાઈટન્સ સામે તેની લાઈન અને ગતિ વિવિધતાથી પ્રભાવિત કર્યા હતા. તેણે મિડલ ઓવર્સમાં રન ફ્લો રોક્યો અને બે મહત્ત્વપૂર્ણ વિકેટ લીધી. તેને ફાસ્ટ બોલર વિજયકુમાર વૈશાખનો સારો ટેકો મળ્યો.
IPL 2026 માટે બંને ટીમો
પંજાબ કિંગ્સ: શ્રેયસ અય્યર (કેપ્ટન), પ્રિયાંશ આર્યા હરનુર સિંહ, મિચેલ ઓવેન, વિષ્ણુ વિનોદ, નેહલ વઢેરા, અઝમતુલ્લાહ ઉમરઝઈ, માર્કો યાનસન, માર્કસ સ્ટોઈનિસ, અર્શદીપ સિંહ, ઝેવિયર બાર્ટલેટ, યુઝવેન્દ્ર ચહલ, લોકી ફર્ગ્યુસન, હરપ્રીત બરાર, વિજયકુમાર વૈશાખ, યશ ઠાકુર, કૂપર કોનોલી, બેન દ્વારશુઇસ, મુશીર ખાન, પ્રવીણ દુબે, વિશાલ નિષાદ, સૂર્યાંશ શેડગે, પ્રભસિમરન સિંહ, પાઈલા અવિનાશ, શશાંક સિંહ.
ચેન્નાઈ સુપર કિંગ્સ: ઋતુરાજ ગાયકવાડ (કેપ્ટન), ડેવાલ્ડ બ્રેવિસ, એમએસ ધોની, ઉર્વીલ પટેલ, સંજુ સેમસન, શિવમ દુબે, રામકૃષ્ણ ઘોષ, શ્રેયસ ગોપાલ, જેમી ઓવરટોન, ખલીલ અહેમદ, અંશુલ કંબોજ, ગુરજપનીત સિંહ, મુકેશ ચૌધરી, નૂર અહેમદ, અકેલ હોસેન, પ્રશાંત વીર, મેથ્યુ શોર્ટ, અમન ખાન, મેટ હેનરી, રાહુલ ચહર, ઝકારી ફાલ્ક્સ, સ્પેન્સર જોન્સન, કાર્તિક શર્મા, સરફરાઝ ખાન, આયુષ મ્હાત્રે.
