ભારતીય ટીમે પહેલી T20 મેચ જીતી, ઇંગ્લેન્ડને 13 ઓવરમાં હરાવ્યું

ભારતીય ટીમ ઘરઆંગણે ઇંગ્લેન્ડ સામે 5 મેચની T20 શ્રેણી રમી રહી છે. પહેલી મેચ કોલકાતાના ઇડન ગાર્ડન્સ ખાતે રમાઈ હતી, જેમાં ભારતીય ટીમે શાનદાર જીત મેળવી હતી.

સૂર્યકુમાર યાદવની કેપ્ટનશીપમાં ભારતીય ટીમે ધૂમ મચાવી દીધી છે. તેણે ઈંગ્લેન્ડ સામેની 5 મેચની T20 શ્રેણીની પહેલી મેચ 7 વિકેટથી જીતી લીધી છે. મેચમાં ઇંગ્લેન્ડે ૧૩૩ રનનો લક્ષ્યાંક આપ્યો હતો, જેને ભારતીય ટીમે માત્ર ૧૨.૫ ઓવરમાં જ પૂર્ણ કરી લીધો હતો. આ જીતના હીરો અભિષેક શર્મા, અર્શદીપ સિંહ અને વરુણ ચક્રવર્તી હતા.

કોલકાતાના ઇડન ગાર્ડન્સ ખાતે રમાયેલી આ મેચમાં લક્ષ્યનો પીછો કરવા ઉતરેલી ભારતીય ટીમે ધમાકેદાર શરૂઆત કરી હતી. જોકે, સંજુ સેમસન 20 બોલમાં 26 રન બનાવીને આઉટ થયો હતો. જ્યારે કેપ્ટન સૂર્યકુમાર યાદવ ખાતું પણ ખોલાવી શક્યો નહીં. એક સમયે ભારતીય ટીમે 41 રનમાં 2 વિકેટ ગુમાવી દીધી હતી.

અભિષેકે 21 બોલમાં ફિફ્ટી ફટકારી

પછી અભિષેકે જવાબદારી સંભાળી અને માત્ર 21 બોલમાં ઝડપી અડધી સદી ફટકારી. આ દરમિયાન તેણે 6 છગ્ગા અને 3 ચોગ્ગા ફટકાર્યા. પોતાની ઇનિંગ્સના આધારે, અભિષેકે ભારતીય ટીમને ૧૨.૫ ઓવરમાં ૭ વિકેટે મેચ જીતવામાં મદદ કરી. આ રીતે ભારતીય ટીમે શ્રેણીમાં ૧-૦થી લીડ મેળવી લીધી છે. હવે આગામી એટલે કે બીજી મેચ 25 જાન્યુઆરીએ ચેન્નાઈમાં રમાશે.

કોલકાતામાં રમાયેલી ટી20 મેચમાં અભિષેકે 34 બોલમાં 79 રનની ઇનિંગ રમી હતી. આ ઇનિંગમાં તેણે 8 છગ્ગા અને 5 ચોગ્ગા ફટકાર્યા. તિલક વર્મા ૧૯ રન બનાવીને અણનમ રહ્યા અને હાર્દિક પંડ્યા ૩ રન બનાવીને અણનમ રહ્યા. અભિષેક અને તિલક વચ્ચે ત્રીજી વિકેટ માટે 42 બોલમાં 84 રનની ભાગીદારી થઈ. ઇંગ્લેન્ડ તરફથી એકમાત્ર ઝડપી બોલર જોફ્રા આર્ચર સફળ રહ્યો. તેણે 2 વિકેટ લીધી.

આંતરરાષ્ટ્રીય T20 ક્રિકેટમાં સૌથી વધુ વિકેટ લેનાર ભારતીય ક્રિકેટર

અર્શદીપ સિંહ આંતરરાષ્ટ્રીય T20 ક્રિકેટમાં સૌથી વધુ વિકેટ લેનાર ભારતીય ક્રિકેટર બની ગયો છે. ભારત અને ઇંગ્લૅન્ડ વચ્ચે ઇડન ગાર્ડન્સમાં રમાયેલી પ્રથમ T20 મેચની પહેલી જ ઓવરમાં તેણે સોલ્ટને પેવેલિયન ભેગો કર્યો હતો. ત્યાર બાદ ત્રીજી ઓવરમાં તેણે ડકેટની વિકેટ ઝડપી હતી. અર્શદીપે માત્ર 61 મેચમાં 97 વિકેટ ઝડપી યુઝવેન્દ્ર ચહલનો 96 વિકેટનો રૅકોર્ડ તોડી દીધો હતો. જો કે ચહલે આ 96 વિકેટ્સ 80 મેચમાં ઝડપી છે. ત્રીજા ક્રમે સ્વિંગ કિંગ ભુવનેશ્વર કુમાર છે જેણે 87 મેચમાં 90 વિકેટ ઝડપી છે.

ભારતીય પ્લેઇંગ 11: અભિષેક શર્મા, સંજુ સેમસન (વિકેટકીપર), તિલક વર્મા, સૂર્યકુમાર યાદવ, હાર્દિક પંડ્યા, રિંકુ સિંહ, નીતિશ રેડ્ડી, અક્ષર પટેલ, રવિ બિશ્નોઈ, વરુણ ચક્રવર્તી અને અર્શદીપ સિંહ.

ઇંગ્લેન્ડની પ્લેઇંગ 11: બેન ડકેટ, ફિલ સોલ્ટ (વિકેટકીપર), જોસ બટલર (કેપ્ટન), હેરી બ્રુક, લિયામ લિવિંગસ્ટોન, જેકબ બેથેલ, જેમી ઓવરટન, ગસ એટકિન્સન, જોફ્રા આર્ચર, આદિલ રશીદ અને માર્ક વુડ.