IPL 2027માં રોહિત શર્મા ફરી બનશે MIનો કેપ્ટન? ફ્રેન્ચાઈઝીએ આ અંગે કરી સ્પષ્ટતા

IPL 2027 પહેલા મુંબઈ ઈન્ડિયન્સની કેપ્ટનશિપમાં ફેરફારની ચર્ચા ચાલી રહી છે. હાર્દિક પંડ્યાનું MI છોડવાનું લગભગ નિશ્ચિત લાગે છે, જેના કારણે ટીમ નિઃશંકપણે નવા કેપ્ટનની શોધમાં હશે. તાજેતરમાં એવા અહેવાલો સામે આવ્યા હતા કે મુંબઈ ઈન્ડિયન્સ મેનેજમેન્ટ IPL 2027 માટે રોહિત શર્માને કેપ્ટનશિપ સોંપવાની યોજના બનાવી રહ્યું છે. હવે મુંબઈ ઈન્ડિયન્સે આ અફવાઓનો અંત લાવ્યો છે અને સ્પષ્ટતા કરી છે કે કેપ્ટનશિપ અંગે કોઈ નિર્ણયનથી લેવામાં આવ્યો. હાર્દિક પંડ્યાના ટ્રેડ અંગે પણ એક અપડેટ સામે આવ્યું છે.

રોહિત શર્મા MIનો કેપ્ટન નહીં બને!

મુંબઈ ઈન્ડિયન્સના સૂત્રોએ સ્પષ્ટતા કરી કે રોહિત શર્માને કેપ્ટન નિયુક્ત કરવાના અહેવાલો ખોટા છે. તેણે સ્પષ્ટતા કરી કે આગામી IPL સિઝન માટે કેપ્ટનશિપ અંગે કોઈ ચર્ચા નથી થઈ. જો હાર્દિક પંડ્યા મુંબઈ ઈન્ડિયન્સ છોડી દે છે, તો MI પાસે રોહિત શર્મા ઉપરાંત કેપ્ટનશિપ માટે ઘણા સારા વિકલ્પો છે. રિપોર્ટમાં એમ પણ કહેવામાં આવ્યું છે કે સૂર્યકુમાર યાદવ અને તિલક વર્મા MIના આગામી કેપ્ટન બનવાની રેસમાં આગળ છે. ન્યુઝીલેન્ડના કેપ્ટન મિચેલ સેન્ટનર પણ દાવેદાર છે.

હાર્દિક પંડ્યાના ટ્રેડ પર અપડેટ

હાર્દિક પંડ્યાને IPL 2024 માટે મુંબઈ ઈન્ડિયન્સના કેપ્ટન તરીકે નિયુક્ત કરવામાં આવ્યો હતો. ત્યારબાદ MIને ઈચ્છિત પરિણામો નહતા મળ્યા. એવો અહેવાલ છે કે હાર્દિક પંડ્યાના ટીમ સાથેના સંબંધો બગડ્યા છે અને તેણે MI છોડવાનો નિર્ણય લીધો છે.

મુંબઈ ઈન્ડિયન્સના એક સૂત્રએ અહેવાલમાં એમ પણ જણાવ્યું હતું કે ટીમ હાર્દિક પંડ્યાની ટ્રેડ શક્યતાઓ પર નજર રાખી રહી છે અને અન્ય ટીમો તેને સાઇન કરવા માટે સારી ડીલની રાહ જોઈ રહી છે. અત્યાર સુધી MIને પંડ્યા માટે યોગ્ય ડીલ નથી મળી.

IPL ઓક્શન ક્યારે થશે?

મુંબઈ ઈન્ડિયન્સ માટે છેલ્લી IPL સિઝન સારી નહતી, જેના કારણે તે હવે તેની ટીમમાં કેટલાક ફેરફારો કરવા માંગશે. એવું કહેવામાં આવી રહ્યું છે કે બધી ટીમોએ નવેમ્બરના મધ્ય સુધીમાં તેમની રિટેન્શન યાદીઓ જાહેર કરવી પડશે. આ પછી IPL 2027 મિની ઓક્શન ડિસેમ્બરના બીજા અઠવાડિયામાં યોજાશે. આ પહેલા હાર્દિક પંડ્યાના ટ્રેડ અંગેની સ્થિતિ સ્પષ્ટ થઈ જશે. MI ઓક્શન દ્વારા તેની ટીમને મજબૂત બનાવવાનો પ્રયાસ કરશે.