દિલ્હી કેપિટલ્સનો બેટિંગ કોચ બન્યો યુવરાજ સિંહ, IPL 2027માં સાથે જોવા મળશે દાદા અને યુવી
ભૂતપૂર્વ ભારતીય મહાન ખેલાડી યુવરાજ સિંહ IPL 2027 માટે દિલ્હી કેપિટલ્સ ટીમમાં જોડાયો છે. તે આ સિઝનમાં ટીમના આસિસ્ટન્ટ અને બેટિંગ કોચ તરીકે સેવા આપશે. ખાસ વાત એ છે કે, યુવરાજ પોતાની કારકિર્દીમાં પહેલીવાર કોઈ ટીમનો કોચ બન્યો છે. ફ્રેન્ચાઈઝીએ મંગળવારે રિલીઝ થયેલા એક વીડિયોમાં આ જાહેરાત કરી હતી. આગામી IPL સિઝનમાં યુવરાજ સૌરવ ગાંગુલી અને ચામિંડા વાસ જેવા દિગ્ગજો સાથે કામ કરતો જોવા મળશે.
યુવરાજ પહેલીવાર કોચિંગ કરતો જોવા મળશે
44 વર્ષીય યુવરાજ સિંહે ભારતની 2007 અને 2011 વર્લ્ડ કપ જીતમાં મુખ્ય ભૂમિકા ભજવી હતી. હવે તે IPL ટીમ સાથે તેની કોચિંગ કારકિર્દીની શરૂઆત કરી રહ્યો છે. યુવરાજ સિંહનો ફ્રેન્ચાઈઝી સાથે જુનો સંબંધ રહ્યો છે. 2015માં તે દિલ્હી કેપિટલ્સ સાથે રેકોર્ડ 16 કરોડ રૂપિયામાં જોડાયો હતો અને બધી 14 મેચ રમ્યો હતો. વધુમાં, તાજેતરના વર્ષોમાં તેણે ઘણા યુવા અને અનુભવી ભારતીય ખેલાડીઓને મૂલ્યવાન સલાહ અને ટ્રેનિંગ આપી છે.
કોચ બન્યા પછી યુવરાજે શું કહ્યું?
યુવરાજ સિંહે કહ્યું કે તે દિલ્હી કેપિટલ્સ સાથે આ નવી ઈનિંગ શરૂ કરવા માટે ખૂબ જ ઉત્સાહિત છે. તેનો ટીમ સાથે લાંબા સમયથી સંબંધ છે અને તે માલિકોને સારી રીતે જાણે છે. તેણે સૌરવ ગાંગુલી અને બાકીના કોચિંગ સ્ટાફ સાથે નજીકથી કામ કરવાની ઈચ્છા પણ વ્યક્ત કરી. તેની શાનદાર IPL કારકિર્દી દરમિયાન યુવરાજે 132 મેચ રમી, 2,750 રન બનાવ્યા અને 36 વિકેટ લીધી. તાજેતરમાં દિલ્હી કેપિટલ્સે શ્રીલંકાના ભૂતપૂર્વ ઝડપી બોલર ચામિંડા વાસને બોલિંગ કોચ તરીકે નિયુક્ત કર્યો છે.
યુવરાજે અભિષેક અને ગિલ જેવા ખેલાડીઓ સાથે નજીકથી કામ કર્યું છે
યુવરાજ સિંહે અગાઉ અભિષેક શર્મા અને શુભમન ગિલ સહિત ઘણા યુવા ખેલાડીઓ સાથે નજીકથી કામ કર્યું છે, જેઓ ભારતીય ટીમના મુખ્ય ખેલાડીઓ બની ગયા છે. તેણે પોતાનો અનુભવ શેર કરીને આ ખેલાડીઓને તેમની રમત સુધારવામાં નોંધપાત્ર મદદ કરી છે. ખાસ કરીને અભિષેક શર્મા સાથે તેનું સંકલન ઉત્તમ રહ્યું છે, જેના કારણે તે આજે સૌથી ખતરનાક અને આક્રમક ડાબોડી T20 બેટ્સમેનોમાંથી એક છે.
