IPL 2027 પહેલા CSKમાં મોટો ફેરફાર, 15 વર્ષ પછી આ અનુભવી ખેલાડીને ટીમમાંથી દૂર કરવામાં આવ્યો
છેલ્લું અપડેટ : 10 Oct 2026
IPL 2027 પહેલા પાંચ વખતની ચેમ્પિયન ફ્રેન્ચાઈઝી ચેન્નાઈ સુપર કિંગ્સ તેના સપોર્ટ સ્ટાફમાં મોટા અને ક્રાંતિકારી ફેરફારોના માર્ગે આગળ વધી રહી છે. અહેવાલો અનુસાર, ફ્રેન્ચાઈઝી દિગ્ગજ બેટિંગ કોચ માઈકલ હસ્સીથી અલગ થઈ ગઈ છે. આ મિસ્ટર ક્રિકેટ તરીકે ઓળખાતા ઓસ્ટ્રેલિયન દિગ્ગજની CSK સાથે ખેલાડી અને કોચ તરીકે 15 વર્ષ લાંભી ઐતિહાસિક સફરની અંત છે.
માઈકલ હસ્સી 15 વર્ષ પછી CSK છોડી રહ્યો છે
હસી 2018થી ચેન્નાઈ સુપર કિંગ્સના બેટિંગ કોચ તરીકે સેવા આપી રહ્યો છે અને ફ્લેમિંગ સાથે મળીને ટીમની અનેક ટાઈટલ જીતમાં મુખ્ય ભૂમિકા ભજવી હતી. અહેવાલો અનુસાર, CSK મેનેજમેન્ટે હસીને આ નિર્ણયની જાણ કરી છે. એવી પણ ચર્ચા છે કે હસી અન્ય IPL ફ્રેન્ચાઈઝીઓ સાથે સંપર્કમાં છે અને IPL 2027માં બીજી ટીમના કોચિંગ સ્ટાફમાં જોડાઈ શકે છે, જોકે હજુ સુધી કોઈ સત્તાવાર જાહેરાત નથી કરવામાં આવી.
હસીના ગયા પછી ચેન્નાઈ સુપર કિંગ્સે હજુ સુધી નવા બેટિંગ કોચની જાહેરાત નથી કરી. જોકે, ટોચના કોચિંગ સ્ટાફમાં ઐતિહાસિક ફેરફારો કરવામાં આવ્યા છે, જેમાં ભૂતપૂર્વ ભારતીય ફાસ્ટ બોલર ઝહીર ખાન લાંબા સમયથી હેડ કોચ રહેલા સ્ટીફન ફ્લેમિંગના સ્થાને હેડ કોચ તરીકે નિયુક્ત થયો છે, જ્યારે ભૂતપૂર્વ ફાસ્ટ બોલર મોહિત શર્માને બોલિંગ કોચ તરીકે નિયુક્ત કરવામાં આવ્યો છે.
CSK માટે બેટ્સમેન તરીકે 1768 રન બનાવ્યા
કોચિંગની જવાબદારી સંભાળતા પહેલા માઈકલ હસી ચેન્નાઈ સુપર કિંગ્સની બેટિંગનો આધાર હતો. તે શરૂઆતની IPL સિઝનમાં CSK માં જોડાયો અને 2009 સિવાય 2013 સુધી યેલો આર્મી માટે સતત રમ્યો. 2014માં મુંબઈ ઈન્ડિયન્સનું પ્રતિનિધિત્વ કર્યા પછી તે 2015માં CSK માં પાછો ફર્યો. ખેલાડી તરીકે તેણે ચેન્નાઈ માટે રમેલી 50 મેચોમાં 42.10ની પ્રભાવશાળી એવરેજ અને 123.64 ના સ્ટ્રાઈક રેટથી કુલ 1768 રન બનાવ્યા હતા.